Vaheveru 11 - Testamente Leyimpsha Xichangana

Ta matimba ya kupfumela

¹ Kutani-ke, kupfumela i kutshemba lokutiyeke henhla ka svilo lesvilanguteliwaka, ni kukholwa svinene hi tlhelo ra svilo lesvingavoniwiki.

² Hikuva hakona, vanhu va khale vakumile vumboni bzinene.

³ Hi kupfumela, hitwisisa lesvaku tilo ni misava svitumbuluxiwile hi rito ra Xikwembu, hi lesvaku lesvivoniwaka sviyendliwile svihuma ka lesvingavoniwiki.

⁴ Hi kupfumela, Abele ahumesele Xikwembu timhamba letiyamukelekeke kutlula ta Kayini, kutani hikolaho ka svona akumile vumboni bzinene avuliwa lweyi alulameke, Xikwembu na xili karhi xitiyisa svosvo hi kuyamukela tinyiko ta yena. Afile, kambe hi mhaka ya kupfumela ka yena, wahavulavula.

⁵ Hi kupfumela, Enoki atlakuliwile aya henhla, lesvaku atakala angavoni rifu; kutani angahavoniwanga, hikuva Xikwembu aximutekile. Aali ni kupfumela, hikuva loko angasitlakuliwa aya henhla, akumile vumboni bza lesvaku “aatsakisile Xikwembu”,

⁶ kutani handle ka kupfumela asvikoteki kutsakisa Xikwembu. Mani na mani lweyi alavaka kutshinelela Xikwembu afanele kupfumela lesvaku xiko na, ni lesvaku xihakela lava vaxilavaka.

⁷ Hi kupfumela, Nowa ayingisile svinene loko Xikwembu ximutivisa lesvi asvingasivoneka; kutani ayaka ngalawa kutaponisa va njangu wa yena; hi kuyendla svosvo, ayavanyisile misava, ava ayamukela kululama loku kunyikiwaka hi mhaka ya kupfumela.

⁸ Hi kupfumela, Abrahamu, siku leri avitaniweke ha rona kurhurha aya tikweni leri Xikwembu aximutshembisile rona, ayingisile, arhurha hambilesvi aangakutivi lomu ayakakona.

⁹ Hi kupfumela, atshamile tikweni leri atshembisiweke rona afana ni muluveli tikweni ra van'wana, ahanya matendeni na ali na Izaki na Yakobe, vajandzhaka va xitshembiso xin'we ni xa yena.

¹⁰ Mhaka hi lesvaku aalangutela doropa leringa ni masungulu lamanene, leri muyaki ni muyendli wa rona xinga Xikwembu.

¹¹ Hi kupfumela, Sara hi xiviri asvikotile kuxurha nyimba hambilesvi aali mhika, na ahundzeliwile hi nkarhi, hikuva ativile lesvaku lweyi amutshembiseke watshembeka.

¹² Hikolaho, ka munhu mun'we lweyi asvofana ni loko afile, kuhumile vatukulu lavotala vafanaka ni tinyeleti ta tilo ni misava ya ribuwa ra lwandle.

¹³ Vanhu lava hinkwavu vafele kupfumeleni, na vangakumanga lesvi avatshembisiwile svona, kambe vasvivonile ni kusvitsakela hi le kule, na vali karhi vativula valuveli ni vayendzi misaveni.

¹⁴ Vanhu lava vavulavulisaka lesvi, vakombisa svinene lesvaku valava tiko leringa ra vona.

¹⁵ Loko ingi vatsundzukile tiko leriya vahumeke ka rona, avatava vakumile nkarhi wa kutlhelela ka rona.

¹⁶ Kambe, hilaha svinga hakona, vanavela tiko lerinene kutlula leriya, anga lesvaku ra le tilweni; hi kolaho Xikwembu axi na tingana hi vona, ni loko vaxivula Xikwembu xa vona, hikuva xivalungiselile doropa.

¹⁷ Hi kupfumela, Abrahamu, siku leri aringiweke ha rona, anyiketile Izaki alitarini. Abrahamu aanyikiwile svitshembiso, kambe atiya ahumesa mhamba hi n'wana wa yena yelweyi wa mun'we;

¹⁸ kasi Xikwembu axite ka yena: “Vatukulu va wena vatahuma ka Izaki.”

¹⁹ Ayehleketile lesvaku Xikwembu xasvikota ni kupfuxa vanhu kufeni; hi kolaho, loko hivulavula tani hi xikombiso atlhele ayamukela Izaki ingi ohuma hi le kufeni.

²⁰ Hi kupfumela, Izaki akatekisile Yakobe na Esawu mayelanu ni lesvi asvahatahumelela mahlweni.

²¹ Hi kupfumela, Yakobe, loko ali karhi afa, akatekisile mun'wana ni mun'wana wa vana va Yosefa, akhongela na atiseketelile henhla ka nhonga ya yena.

²² Hi kupfumela, Yosefa, kuheteleleni ka vutomi bza yena, avulile ta kuhuma ka Vaisrayele tikweni ra Gibita, kutani alerisa lesvi vafanelaka kuyendla svona hi marhambu ya yena.

²³ Hi kupfumela, loko Moxe apsaliwile, vapsali va yena vamutumbetile nkarhi woringana tihweti tinharhu, hi kuvona kusaseka ka n'wana, kutani avachavanga svileriso sva hosi.

²⁴ Hi kupfumela, Moxe, loko akulile, ayalile kuvuliwa n'wana wa n'wana waxisati wa Faro.

²⁵ Matshan'wini ya svosvo, atihlawulele kuxaniseka svin'we ni vanhu va Xikwembu, handle ka kutitsakisa nkarhinyana hi kuhanya kujoheni.

²⁶ Ayehleketile lesvaku kurhuketeliwa hikolaho ka Mesiya i rifuwo leritlulaka vukosi hinkwabzu bza Gibita, hikuva aalangutela hakelo leyi yahataka.

²⁷ Hi kupfumela, Moxe asukile tikweni ra Gibita na angachavi vukarhi bza hosi, hikuva atiyiselile ingi hi loko ali karhi avona lweyi angavoniwiki.

²⁸ Hi kupfumela, alungisile Paska, an'watsekela asvipfalu hi ngati lesvaku Mudlayi wa mativula angakhumbi mativula ya Vaisrayele.

²⁹ Hi kupfumela, Vaisrayele vatsemakanyile Lwandle Ropshuka kufana ni laha kuwomeke. Kambe loko Vagibita varingetile kuyendla svosvo, vamintiwile hi mati.

³⁰ Hi kupfumela, rithangu ra doropa ra Yeriko rihirimuxiwile, ndzhaku ka loko rirhendzeliwile hi masiku ya ntlhanu ni mambirhi.

³¹ Hi kupfumela, Rahabi lweyi wa nghwavana angalovanga ni lava vangayala kuyingisa, hikuva ayamukelile vahloli hi malwandla.

³² Kutani ningahavula yini svin'wana? Hikuva nkarhi wunganihelela loko ningamibzela hi ta Gidiyoni, na Baraka, na Samisoni, na Jefta, ni ta Davhida na Samuwele, ni ta vaprofeta.

³³ Vanhu lava, hi mhaka ya kupfumela, vahlulile matiko; vayavanyisile hi kululama, vakumile lesvi avatshembisiwile svona; vapfalile milomo ya tinghonyama.

³⁴ Vatimile ndzilo wa matimba makulu, vapona kutlhaviwa hi matlhari, vakuma matimba na vali lavatsaneke, vahundzuka tinghwazi ta matimba kulweni, vabalekisa tinyimpi ta valala.

³⁵ Vavasati vatlhele vayamukela vafi va vona lavapfuxiweke kufeni. Van'wana vaxanisiwile ngopfu mirini, kambe vayala kutshunxiwa, lesvaku vatapfukela vuton'wini lebzinene.

³⁶ Van'wana vaxanisiwile ni kutseketseliwa ni kubiwa, hambi kuli kubohiwa hi machini, vanghenisiwa jele.

³⁷ Vakhandliwe hi maribze, vasahiwa hi le xikarhi, vadlayiwile hi matlhari vafambafamba hinkwaku na vayambele svikhumba sva tinyempfu ni sva timbuti, vasvelile, vali maxangwini, vatwisiwa kuvaviseka,

³⁸ vona lava misava ayingavafanelanga! Vatsendzelekile mananga ni le tintshaveni, ni le timhakweni, ni le makheleni ya laha misaveni.

³⁹ Kutani vanhu lava hinkwavu, hambi loko kupfumela ka vona kutikombile svinene, avakumanga lesvi avatshembisiwile svona.

⁴⁰ Hikuva Xikwembu axili ni makungu man'wana lamanene hi tlhelo ra hina, lesvaku vangayendliwi lavahetisekeke loko hina hingali kona.