Vaheveru 10 - Testamente Leyimpsha Xichangana

¹ Lesvi Nawu wunga ndzhuti ntsena wa lesvosaseka lesvingatahumelela, ahi ntiyiso wa xiviri wa svilo svakona, xilesvo svingakala svingasvikoti, kuva timhamba tin'we ni leti tihumesiwaka hi kuphindhaphindha malembe hinkwawu, kuyendla lesvaku lavatshinelelaka Xikwembu vava lavahetisekeke.

² Loko Nawu awusvikotile, timhamba ingi tingayimanga kuhumesiwa xana? Hikuva lavagandzelaka Xikwembu, loko ingi vabasisiwile hi kuhetiseka, avatatitwa na vangahali na svijoho!

³ Kasi, hi kuhumesa timhamba leti, vanhu avatsundzuxiwa hi ta svijoho sva vona, lembe rin'wana ni rin'wana.

⁴ Hikuva svingakala svingayendleki lesvaku ngati ya maduna ni ya sviphongo yisusa svijoho.

⁵ Hikolaho ka svona, loko Kriste atile laha misaveni, ate: “Awunavelanga timhamba ni tinyiko, kambe univumbele miri.

⁶ Timhamba letihisiwaka ni timhamba tosusa svijoho, awusvitsakelanga.

⁷ Kutani nite: ‘Hi mina lweyi, we Xikwembu, nitile kutayendla kurhandza ka wena, hilaha svingatsaliwa hakona henhla ka mina bukwini ya Nawu.’”

⁸ Kusunguleni, ate: “Awunavelanga ni kutsakela timhamba ni tinyiko, kumbe timhamba letihisiwaka ni timhamba letisusaka svijoho.” Avulile svosvo hambi loko svilo lesvi svihumesiwa hi kulandza Nawu.

⁹ Kutani atlhela aku: “Vona, nitile kutayendla kurhandza ka wena.” Hikolaho, Yesu Kriste ahelisa lesvosungula lesvaku atanghenisa sva vumbirhi.

¹⁰ Kutani, lesvi ayendleke kurhandza loku ka Xikwembu, hina hiyendliwile lavahlawulekeke hi miri wa Yesu Kriste, lowu awunyiketeke kuva mhamba kan'we ntsena sviva svihela kolaho.

¹¹ Nasvona, Muprista mun'wana ni mun'wana ayima atirha ntirho wa yena masiku hinkwawu, ahumesa hi kuphindhaphindha timhamba tofana, letingakotiki kususa svijoho ni siku ni rin'we.

¹² Kasi Kriste ahumesile kan'we mhamba yin'we yosusa svijoho, kutani atshame vokweni ra xinene ra Xikwembu.

¹³ Kusukela kolaho ayimela lesvaku Xikwembu xiveka valala va yena hansi ka minkondzo yakwe.

¹⁴ Hikuva, hi kuhumesa mhamba kan'we ntsena, ayendlile lesvaku lavangakwetsimisiwa, vakuma kuhetiseka lokungaheliki.

¹⁵ Moya Lowokwetsima na wona wuveka vumboni bza svona ka hina; hikuva wurhange wuku:

¹⁶ “Lowu hi wona ntwananu, lowu ningatawuyendla na vona, ndzhaku ka masiku wolawo, kuvula Hosi: Nitanghenisa milawu ya mina timbilwini ta vona, niyitsala miyehleketweni ya vona.”

¹⁷ Kutani wuyengeta wuku: “Aningahatsundzuki kambe svijoho sva vona, ni mintirho ya vona leyohomboloka.”

¹⁸ Hikolaho, laha kunga ni kurivalela ka svilo lesvi, timhamba tosusa svijoho atahalaveki.

Ta kuva hitshinelela Xikwembu

¹⁹ Kutani-ke, vamakwerhu, lesvi hinga ni kutshemba lokutiyeke kunghena xivandleni xohlawuleka hikolaho ka ngati ya Yesu,

²⁰ hi ndlela leyimpsha, leyihanyaka, leyi ahipfuleleke yona yihundza hi le xikarhi ka nguvu ya xisirhelelo, wunga miri wa yena,

²¹ na svona, lesvi hinga ni Muprista wa matimba lweyi afumaka yindlo ya Xikwembu,

²² ahitshineleleni Xikwembu hi mbilu leyinamarhelaka ntiyiso ni kupfumela lokuhetisekeke; timbilu ta hina leti n'watsekiweke, atibase tihambana ni ripfalu lerobiha, ni miri wa hina wuva lowuhlampsiweke hi mati lawa yotenga.

²³ Ahikhomeni svitiya kulanguteleni loku hikutwalisaka, na hingakanakani, hikuva lweyi ahitshembiseke watshembeka.

²⁴ Ahilaveni tindlela topfuxana, hikombana rirhandzu ni mintirho leyinene.

²⁵ Hingatshukeni hitshika kuhlengeletana, kufana ni lesvi van'wana vatoloveleke kuyendla svona, kambe hi khongotelana, ngopfu ngopfu lesvi mivonaka lesvaku siku ra Hosi riya ritshunela.

²⁶ Loko hiya mahlweni hijoha ha vomu ndzhaku ka loko hinyikiwile kutiva ntiyiso, akahali na mhamba yin'wana yosusa svijoho,

²⁷ kambe kuyo sala ntsena kulangutela lokuchavisaka ka kuyavanyisiwa, ni vukarhi lebzipfurhaka lebzingatahelisa valala va Xikwembu.

²⁸ Munhu lweyi atlulaka Nawu wa Moxe adlayiwa na angatsetseleliwanga, loko vumboni bza vanhu vambirhi kumbe vanharhu bzihumesiwile.

²⁹ Kutani-ke, miyehleketa yini hi munhu lweyi akandziyeleke milengeni ya N'wana wa Xikwembu, lweyi anyamiseke ngati ya ntwananu leyi angakwetsimisiwa ha yona, atlhela arhuketela Moya wa timpsalu, xana? Xana munhu lweyi atabiwa hi nhonga leyovavisa kufika kwihi ke?

³⁰ Hikuva hamutiva lweyi anga te: “Kurihisa i ka mina, hi mina ningataba vajohi.” Atlhela aku: “Hosi yitayavanyisa tiko ra yona.”

³¹ I mhaka leyichavisaka kuwela mavokweni ya Xikwembu lexihanyaka.

³² Yanakanyani masiku lawa mahundzeke, kaku loko mivoningiwile, mingatiyisela kulweni lokukulu ni le kuvavisekeni.

³³ Nkarhi wun'wana amiyimisiwa mahlweni ka vanhu mirhuketeliwa ni kuxanisiwa; nkarhi wun'wana amiyima ni lava avaxanisiwa hi ndlela yoleyo.

³⁴ Mikombile timpsalu ka lava vapfaleliweke jele; nasvona misvitekile hi moya wa kutsaka loko svilo sva n'wina sviphangiwa, hikuva amitiva lesvaku mi ni rifuwo leritlulaka svosvo, leringatava kona hilaha kungaheliki.

³⁵ Hikolaho, mingaheleni mbilu, hikuva kutiyisela ku ni hakelo leyikulu.

³⁶ Svafanela lesvaku mitiyisela, akuva mitakota kuyendla kurhandza ka Xikwembu, mitayamukela lesvi xingamitshembisa svona.

³⁷ Hikuva, hilaha Matsalwa mavulaka hakona, “kahasale nkarhinyana ntsena, kutani lweyi ataka atafika, angakala angahlweli.

³⁸ Kambe mululami wa mina, atahanya hi kupfumela, kutani loko atlhelela ndzhaku, moya wa mina awungamutsakeli.”

³⁹ Kutani hina ahi va ntlawa wa lavatlhelelaka ndzhaku vayakuloveni, kambe hi va ntlawa wa lavanga ni kupfumela, lesvaku hihlayisa mimoya ya hina.