Vafilipiya 4 - Testamente Leyimpsha Xichangana

Mikhongotelo

¹ Hikolaho vamakwerhu, n'wina lava nimirhandzaka ni kunavela kumivona, n'wina lava minga kutsaka ka mina ni hari ya nhloko ya mina, yimani na mitiyile Hosini hi ndlela yoleyo, varhandziwa vanga.

² Nikhongotela Evhodiya, nikhongotela na Sintika, lesvaku lesvi vanga va Hosi, vafanele kutwanana.

³ Nakukombela na wena mutirhikulorhi lweyi atshembekaka: Pfuna vamamana lava; vaniseketelile svinene ntirhweni wa Evhangeli, na vali na Klemente, ni vatirhikulorhi lavan'wana, lava mavito ya vona matsaliweke bukwini ya vutomi.

⁴ Titsakeleni Hosini masiku hinkwawu; nitlhela nivulisa svosvo, nili: Titsakeleni!

⁵ Vunene bza n'wina abzitiviwe hi vanhu hinkwavu; Hosi yi le kusuhi.

⁶ Mingavileli ha nchumu; kambe timhakeni hinkwatu, khongelani, mitivisa Xikwembu lesvi misvipfumalaka, mikombela na mili karhi mikhensa;

⁷ kutani kurhula ka Xikwembu lokutlulaka kutwisisa hinkwaku, kutahlayisa timbilu ta n'wina ni miyanakanyu ya n'wina ka Yesu Kriste.

⁸ Kuheteleleni vamakwerhu, hinkwasvu lesvinga ntiyiso, hinkwasvu lesvichavisekaka, hinkwasvu lesvilulameke, hinkwasvu lesvibaseke, hinkwasvu lesvitsakisaka, hinkwasvu lesvikhensekaka, ni loko kuli ni svin'wana lesvinga ni vunene kumbe kudzuneka, svilo lesvi hinkwasvu, tshamani na mili karhi misviyanakanya.

⁹ Lesvi misvijondzeke ni kusvikuma, lesvi misvitweke ni kusvivona ka mina, sviyendleni, kutani Xikwembu xa kurhula xitava na n'wina.

Ta Pawulo loko akhensa nyiko ya Vafilipiya

¹⁰ Nitsakisiwile ngopfu Hosini hi mhaka ya lesvi, ndzhaku ka nkama lowo hundzeke, mipfuxeteke torha ra n'wina ra kunipfuna; torha leri amili na rona hakunene, ntsena amingali na yona ndlela yonikomba rona.

¹¹ Anihlayi svosvo hi kutitwa na nili mupfumali, hikuva nijondzile kutsaka hi lesvi nitikumaka na nili ka svona.

¹² Nitiva kupfumala, nitiva ni kutaleliwa. Hinkwaku, minkameni hinkwayu, nijondzile xihundla xa kuyamukela kutaleliwa ni ndlala, kutaleliwa ni vusiwana, na ningavileli.

¹³ Ningayendla hinkwasvu hi matimba ya Lweyi anitiyisaka.

¹⁴ Hambi svilitano, miyendlile hi timpsalu, loko minipfunile kurhwala maxangu ya mina.

¹⁵ N'wina Vafilipiya, masvitiva hi n'wexe lesvaku, masungulweni ya ntirho wa Evhangeli, loko nisukile Makedoniya, akuvanga ni kereke ni yin'we leyingapfunetana na mina, handle ka n'wina ntsena; hivile xilo xin'we akutaleliweni ni le vusiwaneni.

¹⁶ Hikuva, hambi kuli le Thesalonika, minirhumelile sva kunipfuna ka lesvi anisvipfumala, nasvona kungali kan'we ntsena.

¹⁷ Ahi lesvaku nilava kukuma tinyiko, kambe nilava lesvaku n'wina mikuma mihandzu leyi yingatayandza yimitwalisa.

¹⁸ Nikumile hakelo hinkwayu, ni kutlula. Ni ni lesvotala, hikuva Epafrodito anitisele tinyiko letihumaka ka n'wina. Tinyiko leti tifana ni mhamba leyinun'hwelaka, leyi yamukelekaka ka Xikwembu, yixitsakisa.

¹⁹ Kutani Xikwembu xa mina xitaminyika hi ntalu hinkwasvu lesvi misvipfumalaka, hi kuya hi rifuwo ra xona ni kudzuneka ka xona ka Yesu Kriste.

²⁰ Ka Xikwembu Tatana wa hina, akuve kudzuneka hi masiku ni masiku! Amen!

Ta marungula yohetelela

²¹ Rungulani vahlawuliwa lavanga ka Yesu Kriste. Vamakwerhu lava ninga na vona halenu vamirungula.

²² Vahlawuliwa hinkwavu vamirungula, ngopfu va munti wa Khezari.

²³ Timpsalu ta Hosi Yesu Kriste ative ni mimoya ya n'wina!