Vafilipiya 3 - Testamente Leyimpsha Xichangana

Pawulo atshika hinkwasvu hikolaho ka Kriste

¹ Kutani svosvi vamakwerhu, titsakeleni Hosini. Asvinikarhati kutlhela nimitsalela svofana, nasvona svipfuna kumitiyisa.

² Chavani timbzana, chavani vatirhi lavobiha, chavani kuyimba lokobiha

³ hikuva hi hina hingayamukela kuyimba ka xiviri, hina lava higandzelaka Xikwembu hi Moya wa xona, hina lavatidzunisaka ha Yesu Kriste, hingavekiki kutshemba ka hina ka lesviyendliwaka hi vanhu ntsena.

⁴ Svatwala lesvaku ningaveka kutshemba ka mina ka lesva miri. Loko munhu mun'wana ayanakanya lesvaku angatshemba miri, mina nitlula yena:

⁵ Niyimbisiwile na nahali n'wana wa masiku ya ntlhanu ni manharhu ntsena; ni wa rixaka ra Israyele, wa nyimba ya Benjamini; ni Muheberu n'wana wa Vaheberu; hi tlhelo ra kuhlayisa Nawu, anili Mufarisi.

⁶ Loko kuli kuhiseka, hi mina ningaxanisa kereke; hi tlhelo ra kuva munhu wolulama hi kuhlayisa Nawu, aningali na xisandzu.

⁷ Kambe lesvi anitiseketela ngopfu hi svona, nisvilangutile svili lesvi svingahapfuniki nchumu ka mina hikolaho ka Kriste.

⁸ Kungali svona ntsena: Nitekile hinkwasvu svili lesvingahapfuniki nchumu, loko sviringanisiwa ni risima leritlulaka hinkwasvu, ra kutiva Yesu Kriste Hosi ya mina. Hikolaho ka yena, nifularhele hinkwasvu ni svivona na svili nsila ntsena, lesvaku nitakuma Kriste,

⁹ ni kukumiwa na nili xilo xin'we na yena, ningahali na kululama lokunga ka mina, loku nikukumaka hi kuhlayisa Nawu, kambe nili ni kululama loku kunyikiwaka hi kupfumela ka Kriste, kululama loku kuhumaka ka Xikwembu, loku kuyimaka henhla ka kupfumela.

¹⁰ Ninavela ntsena kutiva Kriste, ni matimba ya kupfuka ka yena kufeni, nikota ni kuhlangana na yena kuvavisekeni ka yena, niyendliwa lweyi afanaka na yena kufeni,

¹¹ hi kutshemba lesvaku loko sviyendleka, na mina nitakuma kupfuka xikarhi ka vafi.

Ta kutsutsumela mahlweni

¹² Anivuli lesvaku nisvikumile svosvo, kumbe lesvaku nihetisekile, ihim; kambe niringeta kutikarhata lesvaku nisvikuma sviva sva mina, hikuva Yesu Kriste anikumile aniyendla wa yena.

¹³ Vamakwerhu, loko ali mina, aniyanakanyi lesvaku nisvikumile, kambe niyendla xilo xin'we ntsena: Nirivala sva le ndzhaku, ni kuringeta hi matimba kuyafika ka lesvinga le mahlweni;

¹⁴ kutani nitsutsuma na nikongomile sva le mahlweni lesvaku nitakuma hakelo, kunga kuvitana ka Xikwembu ha Yesu Kriste, loku hakona xihivitanelaka vutomi bza le henhla.

¹⁵ Hina hinkwerhu lava hihetisekeke moyeni, hifanele kuva ni miyanakanyu leyotano; kambe loko, ka svin'wana, miyanakanya hi ndlela yin'wana, Xikwembu xitasvihlavutela ka n'wina.

¹⁶ Ntsena ahikhomeni svitiya ka lesvi hingafika ka svona.

¹⁷ Vamakwerhu, tekelani mina n'wina hinkwenu. Himipfulele ndlela leyinene, hi kolaho langutani lavafambaka ha yona.

¹⁸ Nitshama nimibzela mhaka leyi hakanyingi, kutani svosvi nitlhela nimibzela yona na nirila: Ku ni lavotala lava kuhanyeni ka vona vanga valala va xihambanu xa Kriste.

¹⁹ Makumu ya vona i kulova; xikwembu xa vona i khwiri ra vona; vatidzunisa hi lesvi avatafanela kuva ni tingana ha svona; vayanakanya sva misava leyi ntsena.

²⁰ Kambe ra hina kaya ri le matilweni, kutani hi langutela hi mbilu hinkwayu Muponisi wa hina lweyi angatata na ahuma kona, anga Hosi Yesu Kriste.

²¹ Atahundzula miri wa hina lowusolekaka, awuyendla lowufanaka ni miri wa yena lowokwetsima, hi matimba lawa ha wona akotaka kuveka hinkwasvu hansi ka mfumu wa yena.