Vafilipiya 2 - Testamente Leyimpsha Xichangana

Ta Kutitsongahata ni kutlakusiwa ka Kriste

¹ Lesvi mikumeke kukhongoteleka ka Kriste, lesvi misusumetiwaka hi rirhandzu ra yena ni kuhlanganisiwa hi Moya, nasvona lesvi mitwelanaka vusiwana ni kukombana timpsalu,

² hetisisani kutsaka ka mina hikuva ni miyehleketo yofana, ni rirhandzu rofana, ni moya wun'we, ni kuyanakanya kun'we.

³ Mingayendleni nchumu hi moya wa kutirhandza, kumbe hi kutidzunisa hi sva hava, kambe mun'wana ni mun'wana aatitsongahate ka van'wana, angayanakanyi lesvaku wavatlula hi vunene.

⁴ Mun'wana ni mun'wana wa n'wina angatshuki atikarhatela lesvi svinga sva yena ntsena, kambe aatikarhatele ni lesvi svinga sva van'wana.

⁵ Kuhanyisana ka n'wina akuve loku mikukumaka ka Yesu Kriste:

⁶ Aali ni xiyimu xin'we ni Xikwembu, kambe angatiringanisanga ni Xikwembu,

⁷ kambe atitshikile hi kuteka xiyimu xa xikarawa, avelekiwa na ali lweyi afanaka ni vanhu. Loko avoniwile na ali lweyi afanaka ni munhu,

⁸ atitsongahatile, ava lweyi ayingisaka kufika kufeni, afa hi rifu ra xihambanu.

⁹ Hikolaho Xikwembu ximutlakusile svinene, kutani ximunyikile vito leringa henhla ka mavito hinkwawu,

¹⁰ lesvaku, avitweni ra Yesu, matsolo hinkwawu makhinsama matilweni, ni laha misaveni, ni le hansi ka misava,

¹¹ ni tindzimi hinkwatu tivula lesvaku Yesu Kriste i Hosi, akudzuniseni ka Xikwembu Tatana.

Mifanela kuvangama kukota tinyeleti

¹² Varhandziwa, kufana ni lesvi miniyingiseke masiku hinkwawu, ni svosvi, kungali ntsena loko nili na n'wina kambe ngopfungopfu loko ningali na n'wina, tirhelani kuponisiwa ka n'wina hi kuchava ni kurhurhumela;

¹³ hikuva i Xikwembu lexitirhaka ka n'wina lexiyendlaka lesvaku mitsakela ni kuyingisa kurhandza ka xona.

¹⁴ Yendlani svilo hinkwasvu handle ka kuvulavulela matlhelweni ni kuphikizana,

¹⁵ lesvaku mitapfumala nandzu, miva lavabaseke, miva vana va Xikwembu lavangaliki na xisandzu xikarhi ka rixaka lerohomboloka, leritiyalisaka; mifanela kuphatima xikarhi ka rona kufana ni tinyeleti, laha misaveni,

¹⁶ na mili karhi minamarhela Rito ra vutomi, kutani sikwini ra Kriste, nitakota kutidzunisa loko nikuma lesvaku kutikarhata ka mina ntirhweni wa mina akuvanga ka mahala.

¹⁷ Hambi loko nifanela kutlhantekela vutomi bza mina henhla ka mhamba ya n'wina ya kupfumela, leyi migandzelaka Xikwembu ha yona, nitsakile ni kutlangela svin'we na n'wina hinkwenu.

¹⁸ Svitano na n'wina: Tsakani, mitlangela svin'we na mina.

Ta Timotewu na Epafrodito

¹⁹ Ni ni kutshemba ka Hosi Yesu lesvaku kungali khale nitarhuma Timotewu ata le ka n'wina, lesvaku na mina nitiyisiwa hi kukuma mahungu ya kuhuma ka n'wina.

²⁰ Ani na mun'wana lweyi afanaka na yena, lweyi ahisekelaka kumipfuna hi mbilu hinkwayu ya yena.

²¹ Lavan'wana hinkwavu vatikarhatela ntsena lesvinga sva vona, kungali sva Yesu Kriste.

²² Kambe kutshembeka ka Timotewu makutiva, ni hilaha angatirhisana na mina hakona ntirhweni wa Evhangeli, afana ni n'wana lweyi atirhaka svin'we ni tatana wa yena.

²³ Hikolaho, natshemba lesvaku nitamurhuma, hi xihantla loko nivona hilaha svilo sva mina svingatafamba hakona.

²⁴ Kutani ni ni kutshemba ka Hosi lesvaku kungali khale, na mina hi xiviri nitata le ka n'wina.

²⁵ Nasvona niyanakanya lesvaku svafanela kumitlhelisela Epafrodito makwerhu, lweyi anganipfuna mintirhweni ni le kulweni ka mina, lweyi amimurhumile kutanipfuna ka lesvi anipfumala svona.

²⁶ Aanavela ngopfu kutlhela amivona hinkwenu, nasvona asvimukanakanisa ngopfu kutiva lesvaku mitwile ta kuvabza ka yena.

²⁷ Hakunene avabzile; aali kusuhi ni kufa, kambe Xikwembu ximutsetselelile, nasvona kungali yena ntsena, na mina xinitsetselelile, lesvaku ningatwi kuvaviseka henhla ka kuvaviseka.

²⁸ Hikolaho, ninavela kuhantla nimurhuma ka n'wina lesvaku loko mitlhela mimuvona, mitatsaka, ni mbilu ya mina yitahungula kuvaviseka.

²⁹ Loko svilitano, muyamukeleni hi kutsaka hinkwaku kukota makwenu Hosini. Xiximani vanhu lavotano,

³⁰ hikuva aali kusuhi ni kufa, afela ntirho wa Kriste, na ali karhi apfumela kunyiketa vutomi bza yena, lesvaku atahetisa ntirho wa kunipfuna lowu awufanele kutirhiwa hi n'wina.