Vafilipiya 1 - Testamente Leyimpsha Xichangana

Kuxeweta

¹ Mina Pawulo, nandza wa Kriste Yesu, na Timotewu nandzakulorhi, hitsalela vakwetsimi va Xikwembu hinkwavu lavatshamaka Filipi, lavanga va ka Yesu Kriste, svin'we ni vabixopo va kereke ni vadiyakoni, hili:

² Timpsalu ni kurhula asvive na n'wina, svihuma ka Xikwembu Tatana wa hina, ni le ka Hosi Yesu Kriste.

Ta loko Pawulo akhongelela vakriste va le Filipi

³ Nikhensa Xikwembu xa mina minkama hinkwayu, loko nimiyanakanya.

⁴ Nkama wun'wana ni wun'wana loko ni mikhongelela n'wina hinkwenu, nikhongela hi kutsaka,

⁵ hikolaho ka ndlela leyi minipfuneke ha yona ntirhweni wa Evhangeli, kusukela siku rosungula kufikela namuntlha.

⁶ Ni ni kutshemba svinene ka lesvaku Xikwembu lexisunguleke ntirho lowosaseka xikarhi ka n'wina, xitawuyisa mahlweni kuyafika makumu ya wona, hi siku ra Yesu Kriste.

⁷ Hikolaho, nikuma na svinilulamelile kuyanakanya hi ndlela leyi henhla ka n'wina hinkwenu, hikuva mi le mbilwini ya mina, ingava kubohiweni kumbe kuhlamuleni ka mina ni le kutiyiseni ka Evhangeli, kutani n'wina hinkwenu miyaveliwile nkateko wun'we na mina.

⁸ Xikwembu i mboni ya mina ya lesvaku nilava ngopfu kuva na n'wina hinkwenu, hi kunavela loku kuhumaka ka Kriste Yesu.

⁹ Xikhongelo xa mina hi lexi: Nikhongela lesvaku rirhandzu ra n'wina riya mahlweni rikula masiku hinkwawu, riva ni vutivi ni kutwisisa loku kuhetisekeke,

¹⁰ na mitakota kuhlawula lesvinga svinene kutlula svin'wana; hi ndlela yoleyo, mitava lavatengeke, mingahali na nandzu kufikela sikwini ra Kriste;

¹¹ vutomi bza n'wina bzitatala hi mihandzu ya lesvolulama, leyitisiwaka ha Yesu Kriste, lesvaku Xikwembu xidzunisiwa ni kutwalisiwa ha yona.

Kuhanya i Kriste

¹² Nilava lesvaku mitiva lesvi, vamakwerhu: Lesvi svinihumeleleke svipfunile kuyisa Evhangeli mahlweni hakunene.

¹³ Svifike laha valanguteli hinkwavu va yindlo ya vuhosi ni lavan'wana hinkwavu vasvivoneke lesvaku nibohiwa hikolaho ka Kriste.

¹⁴ Kubohiwa ka mina kuyendlile lesvaku vamakwerhu lavotala vaveka kutshemba ka vona ka Hosi, vava vakanya timbilu vavula Rito na vangachavi nchumu.

¹⁵ Van'wana kunene vatwalisa Kriste hi moya wa mavondzo ni vumpsaka; kambe van'wana vasviyendla hi timbilu letibaseke;

¹⁶ vona lava vayendla hi kunirhandza, hi kutiva lesvaku Xikwembu xininyikile ntirho wa kulwela Evhangeli.

¹⁷ Kambe lavan'wana vatwalisa Kriste hi moya wa kuphikizana, na svingahumi timbilwini ta vona; vapimisa lesvaku vangayengetela kunixanisa, lesvi nahabohiweke.

¹⁸ Asvi na mhaka svosvo. Hi tindlela leti hinkwatu, hambi kuli hi kukanganyisa, hambi kuli hi ntiyiso, Kriste watwalisiwa, kutani hi svona lesvi svinitsakisaka. Mina nahatatsaka ha svona,

¹⁹ hikuva nitiva lesvaku lesvi hinkwasvu svitapfuna lesvaku nitshunxiwa, hikolaho ka mikhongelo ya n'wina ni kuseketeliwa hi Moya wa Yesu Kriste.

²⁰ Kulangutela ka mina ni kutshemba ka mina, hi lesvaku aningakhomiwi hi tingana nikutsongo, kambe hi kutiya ka mina ningachavi nchumu, svosvi kukota minkama hinkwayu, nitatwalisa vukulu bza Kriste mirini wa mina, hambi hi kuhanya kumbe hi kufa ka mina.

²¹ Hikuva ka mina, kuhanya i Kriste, ni kufa i kuvuyeliwa.

²² Loko svifanela lesvaku nihanya laha misaveni, ka mina svitanipfuna kutirha lesvivekaka mihandzu. Kambe lexi nifanelaka kuhlawula xona, anixitivi.

²³ Nisusumetiwa hala ni hala: Kunavela ka mina i kurhurha niyatshama na Kriste, hikuva hi svona lesvisasekeke ngopfu;

²⁴ kambe hikolaho ka n'wina lesviyampsaka hi loko ni ya mahlweni nihanya laha misaveni.

²⁵ Hi kukholwa svinene mhaka leyi, nitiva lesvaku nitaxwa na n'wina ni kuheta masiku na nili na n'wina hinkwenu, lesvaku nimipfuna kuya mahlweni na mili karhi mitsaka kupfumeleni.

²⁶ Hikolaho, loko nitlhela nita hitatshama na n'wina, mitakota kutidzunisa ha Yesu Kriste kutlula ni khale, hikolaho ka mina.

²⁷ Ntsena, mahanyela ya n'wina mafanela kufambelana ni Evhangeli ya Kriste, lesvaku hambi ni ta nitatamivona, hambi ni ngati, nitatwa lesvaku mahayimile na mitiyile moyeni wun'we, milwa svin'we hi mbilu yin'we, milwela kupfumela loku kutisiwaka hi Evhangeli.

²⁸ Nasvona mingachavisiwi nikutsongo hi lavalwaka na n'wina; hi ndlela leyi vatasvivona lesvaku vatsandzeka, ni lesvaku n'wina mahlula, kutani svosvo svihuma ka Xikwembu.

²⁹ Hikuva minyikiwile nkateko wotirhela Kriste, kungali ntsena hi lesvi mipfumeleke ka yena, kambe hi lesvi mixanisekaka hikolaho ka yena.

³⁰ Svosvi, n'wina na mina hilwa nyimpi yin'we leyi minivoneke nilwa yona, leyi mitwaka lesvaku nahalwa yona ni svosvi.