Vaefesa 6 - Testamente Leyimpsha Xichangana

Ta vana ni vapsali

¹ Vana, yingisani vapsali va n'wina, hikuva hi svona lesvilulameke mahlweni ka Hosi.

² Matsalwa mali: “Uxixima tatana wa wena ni mamana wa wena” (hi wona Nawu loworhanga lowunga ni xitshembiso),

³ “akuva ukateka, ni lesvaku uhanya masiku layotala misaveni leyi.”

⁴ Na n'wina vatatana, mingaxaniseni vana va n'wina, kambe mivawundla, hi kuvalaya ni kuvajondzisa ta Hosi.

Ta svikarawa ni vinyi va svona

⁵ N'wina svikarawa, yingisani vinyi va n'wina va laha misaveni, hi xichavu ni kurhurhumela, misviyendla hi mbilu leyibaseke, kufana ni loko mitirhela Kriste hi xiviri;

⁶ na svona, kungali ntsena loko vamilangutile, wonge hi loko milava kutsakisa vanhu, kambe, lesvi minga svitirhi sva Kriste, yendlani kurhandza ka Xikwembu hi mbilu hinkwayu.

⁷ Tirhani ntirho wa n'wina hi kutsaka, kufana ni loko mitirhela Hosi, kungali vanhu;

⁸ tsundzukani lesvaku Hosi yitanyika mun'wana ni mun'wana, hambi xikarawa, hambi lweyi angaliki xikarawa, hi kuya hi lesvinene lesvi asviyendleke.

⁹ Na n'wina vinyi, yendlisani svosvo ka svikarawa sva n'wina: Tshikani kukho misviholovela, na mili karhi mitiva lesvaku n'wina ni svikarawa sva n'wina mi ni n'winyi wun'we matilweni, ni lesvaku angayi hi nghohe.

Ta kulwa ni lesvobiha

¹⁰ Kuheteleleni nili, tiyani svinene, minamarhela Hosi, mitiseketela hi ntamu wa yona lowungatsandziwiki hi nchumu.

¹¹ Yambalani svisirhelelo ni matlhari hinkwawu lawa Xikwembu ximinyikaka wona, lesvaku mitakota kuyima milwa ni mindzingo yobiha ya Diyavulosi.

¹² Hikuva ahilwi ni vanhu va misava leyi, kambe hilwa ni mimoya leyobiha leyinga mpfhukeni: Hilwa ni vafumi, ni vuhosi, ni vakhinyavezi va misava leyi ya munyama, ni mimoya yobiha leyi hanyaka pfukeni.

¹³ Hikolaho tamelani svisirhelelo ni matlhari hinkwawu ya Xikwembu na wahali nkama, lesvaku mitakota kutilwela hi siku ra khombo; kutani loko mitava milwile kuyafika makumu, mitatikuma na mahatiyile.

¹⁴ Loko svilitano, tshamani na mitilulamisile. Tikhameni hi ntiyiso wuva bandi ra n'wina. Yambalani kululama xiva xisirhelelo xa n'wina xa le xifuveni,

¹⁵ ni kuhisekela kupaluxa Evhangeli ya kurhula kuva masandhazi ya n'wina.

¹⁶ Minkama hinkwayu, rhwalani kupfumela, xiva xisirhelelo xa n'wina, kutani mitakota kutimela ha xona mimpaxwa hinkwayu leyipfurhaka ya nala.

¹⁷ Yamukelani kuponisiwa, xiva xigqoko xa n'wina xa le nhlokweni, kutani Rito ra Xikwembu riva tlhari ra n'wina leri Moya wuminyikaka rona.

¹⁸ Yendlani hinkwasvu lesvi hi kukhongela, mikombela kupfuniwa hi Xikwembu; khongelani minkama hinkwayu hilaha Moya wumiletelaka hakona. Hikolaho, tshamani na mihiteka, mingakarhali kukhongelela vahlawuliwa va Xikwembu hinkwavu.

¹⁹ Na mina minikhongelela, lesvaku Xikwembu xinipfula xifuva loko nilava kujondzisa, nitakota kuvulavula na ningachavi nchumu, ni kutivisa vanhu xihundla xa Evhangeli.

²⁰ Nimuyimeli wa Evhangeli leyi, hambi loko nipfaleliwile jele, hi kolaho khongelani lesvaku nitiya nhlana, niyihlaya hilaha nifanelaka kuyihlaya hakona.

Marungula yohetelela

²¹ Tikiko, makwerhu lweyi arhandzekaka ni mupfuni lweyi atshembekeke ntirhweni wa Hosi, atamitivisa mahungu hinkwawu ya mina, lesvaku na n'wina mitativa hinkwasvu sva kuhanya ka mina ni lesvi nisviyendlaka.

²² Hi svona lesviyendlaka lesvaku ni murhumela ka n'wina, mitativa hilaha hipfukeke hakona, nasvona atakota kumitiyisa timbilu.

²³ Kurhula ni rirhandzu leringa ni kupfumela, asvive ni vamakwerhu, svihuma ka Xikwembu Tatana, ni ka Hosi Yesu Kriste.

²⁴ Timpsalu ative ni hinkwavu lavarhandzaka Hosi ya hina Yesu Kriste hi rirhandzu leringawonhakiki!