Vaefesa 5 - Testamente Leyimpsha Xichangana

Ta kuhanya kuvonakaleni!

¹ Lesvi minga vana va Xikwembu lavarhandzekaka, ringetani kuva lava vafanaka na xona.

² Hanyani hi moya wa rirhandzu, tani hi Kriste lweyi ahirhandzeke ni kutinyiketa hikolaho ka hina ahumesela Xikwembu nyiko ni mhamba ya risima, leyi yixitsakisaka.

³ Mi vahlawuliwa va Xikwembu, kutani vuwosvi, ni sva chaka hinkwasvu, ni makwanga, asvilaveki xikarhi ka n'wina, ni kukumbuka svingakumbukiwi.

⁴ Mingatirhiseni marito ya kurhuketela, ni ya vuphukuphuku, ni ya mafenya, hikuva amalaveki; tirhisani ntsena marito lamakhensaka Xikwembu!

⁵ Tivani mhaka leyi: Aku na munhu ni mun'we lweyi angatayaveliwa ndzhaka Mfun'wini wa Kriste ni wa Xikwembu, loko ahahanya hi vuwosvi, kumbe lweyi ayendlaka sva nsila, kumbe lweyi anga ni makwanga, hambi lweyi agandzelaka svikwembu sva hava.

⁶ Kungavi na munhu lweyi amikanganyisaka hi marito lamangapfuniki nchumu: Svijoho lesvi, hi svona lesviyendlaka lesvaku vukarhi bza Xikwembu bziwela vanhu lavangayingisiki.

⁷ Hikolaho mingatshukeni mitolovelana ni vanhu lavotano.

⁸ Hikuva khale n'wina hi n'wexe amili munyameni, kambe svosvi, lesvi mingahundzuka vanhu va Hosi, mi le kuvonakaleni. Hanyani kufana ni vanhu va kuvonakala,

⁹ hikuva kuvonakala hi kona loku kuvekaka mihandzu leyotala, yinga ya vunene ni kululama ni ntiyiso.

¹⁰ Kambisisani, mivona lesvitsakisaka Hosi.

¹¹ Mingatshukeni mitolovelana ni lavayendlaka lesvokala svingapfuni nchumu sva munyama; svisoleni rivaleni,

¹² hikuva hambi kuli kuvula ntsena lesvi vasviyendlaka xihundleni, svikhomisa tingana.

¹³ Loko svilo lesvi hinkwasvu svisoliwa rivaleni, kuvonakala kutakomba lesvi svinga svona,

¹⁴ hikuva xin'wana ni xin'wana lexikombiwaka lesvi xinga xisvona, xihundzuka kuvonakala. Hikolaho vange: “Pfuka wena lweyi uyetleleke, pfuka xikarhi ka vafi, kutani Kriste atakuvoninga.”

¹⁵ Loko svilitano, kambisisani svinene mahanyela ya n'wina; mingahanyeni tani hi vanhu lavangatwisisiki nchumu, kambe hanyani kufana ni lavatlhariheke.

¹⁶ Londzovotani nkama lowu minga na wona, hikuva masiku lawa hinga ka wona mabihile.

¹⁷ Hikolaho, mingaveneni sviphukuphuku, kambe ringetani kutwisisa lesvi Hosi yirhandzaka svona.

¹⁸ Minganweneni vhinyu rimidakwa, hikuva rivanga timholova, kambe matshan'wini ya svosvo mitala hi Moya.

¹⁹ Khongotelanani hi tipisalema ni tinsimu, miyimbelela sva Moya; twalisani Hosi hi tinsimu ni tipisalma, miyidzunisa hi timbilu ta n'wina hinkwatu.

²⁰ Masiku hinkwawu, khensani Xikwembu Tatana hikolaho ka svilo hinkwasvu, hi vito ra Hosi ya hina Yesu Kriste.

Ta vavasati ni vanuna va vona

²¹ Titsongahateni, van'we ka van'wana, hikolaho ka xichavu lexi minga na xona ka Kriste.

²² N'wina vavasati, titsongahateni ka vanuna va n'wina, kukota loko mititsongahata ka Hosi.

²³ Hikuva nuna i nhloko ya nsati wa yena, kukota lesvi Kriste na yena anga nhloko ya Kereke, nasvona Kriste i muponisi wa Kereke, yinga miri wa yena;

²⁴ kutani, kufana ni lesvi Kereke yititsongahataka ka Kriste, vavasati na vona avatitsongahate ka vanuna va vona, timhakeni hinkwatu.

²⁵ N'wina vavanuna, rhandzani vasati va n'wina kukota lesvi Kriste na yena angarhandza Kereke, kutani anyiketa vutomi bza yena hikolaho ka yona.

²⁶ Ayendlile lesvi lesvaku atayihlawulekisa hi rito ra yena, ayiyendla leyitengeke hi kuyikhuvula hi mati.

²⁷ Anavelile kuyimisa Kereke mahlweni ka yena, hi kusaseka ka yona hinkwaku, na yingali na xivati kumbe minkonya, kumbe xin'wana lexifanaka na svona, kambe yili leyihlawulekeke, leyingaliki ni xisandzu.

²⁸ Hi ndlela yoleyo, vavanuna na vona vafanela kurhandza vasati va vona, hilaha varhandzaka miri wa vona hakona. Lweyi arhandzaka nsati wa yena, watirhandza,

²⁹ hikuva akusitshama kuva ni munhu lweyi avengaka nyama ya yena, kambe wayifihluta, wayikufumeta, tani hi lesvi Kriste na yena ayendlelaka Kereke,

³⁰ hikuva hina hi svirho sva miri wa yena. Matsalwa mahlaya svosvo, mali:

³¹ “Hikolaho, wanuna atasukela tatana wa yena ni mamana wa yena, ayanamarhela nsati wa yena, kutani lavambirhi vatava nyama yin'we ntsena.”

³² Xihundla lexi i xikulu, kambe ni vulavulisa svosvi hi kufananisa Kriste ni Kereke.

³³ Kutani asvive tano ka n'wina hinkwenu: Wanuna aarhandze nsati wa yena, kukota loko atirhandza; na yena wansati aave ni xichavu ka nuna wa yena.