Vaefesa 4 - Testamente Leyimpsha Xichangana

Ta vun'we Mirini wa Kriste

¹ Hikolaho-ke, mina ninga mubohiwa ntirhweni wa Hosi, na mikhongotela kuhanya hi ndlela leyifambelanaka ni kuvitaniwa ka n'wina.

² Masiku hinkwawu, titsongahateni, miva ni musa, milehisa mbilu; kombani rirhandzu ra n'wina hi kuyingiselana.

³ Yendlani hi matimba kuhlayisa vun'we lebzinyikiwaka hi Moya, mihanyisana hi kurhula.

⁴ Ku ni miri wun'we, ni Moya wun'we, tani hi lesvi kunga ni kulangutela kun'we loku Xikwembu xingaminyika kona, siku leri ximivitaneke;

⁵ ku ni Hosi yin'we, ni kupfumela kun'we, ni ntsakamiso wun'we;

⁶ ku ni Xikwembu xin'we, Tatana wa vanhu hinkwavu, lexi xivafumaka hinkwavu, lexitirhaka hi vona ni kutshama ka vona hinkwavu.

⁷ Hambi svilitano, hi timpsalu mun'wana ni mun'wana wa hina anyikiwile nyiko leyinga ya yena, leyi angayaveliwa yona hi Kriste,

⁸ hikuva Matsalwa mali: “Siku leri atlhantukeleke henhla, afambile ni van'wana vakhomiwa lavotala, anyikile vanhu tinyiko.”

⁹ Xana marito lamange: “Atlhantukele henhla”, makomba yini ke? Makomba lesvaku aaxikile hansi, ayafika ni le hansi ka misava.

¹⁰ Lweyi axikeke, wahali yena lweyi atlhantukeleke henhla, kuhundza ni matilo hinkwawu, lesvaku atata matilo ni misava hi vukona bza yena.

¹¹ Nasvona, hi yena “lweyi anyikeke vanhu tinyiko”, van'we kuva vapostola, van'wana kuva vaprofeta, van'wana kuva vavuli va Evhangeli, van'wana kuva vafundhisi ni vajondzisi.

¹² Ntirho wa vona i kupfuna vahlawuliwa va Xikwembu lesvaku vatakota kutirhela van'wana, vayaka miri wa Kriste.

¹³ Kutani kuheteleleni, hitahlangana svin'we hinkwerhu ka vun'we lebzitisiwaka hi kupfumela ka N'wana wa Xikwembu ni kumutiva, kutani hihundzuka vanhu lavawupfeke, hikula ni kufika ka xiyimu lexihetisekeke xa Kriste.

¹⁴ Kutani ahingahavi vatsongwana lavatsekatsekisiwaka, nasvona ahingehepengwisiwi hi jondzo yokala yingali yona, hi kuxengiwa hi vanhu lavakanganyisaka van'wana ni kuvahambukisa hi maqhinga ya vona.

¹⁵ Matshan'wini ya svosvo, hitahanya ntiyisweni hi moya wa rirhandzu, hikula hi matlhelo hinkwawu ka Kriste, yena lweyi anganhloko.

¹⁶ Miri hinkwawu wutiyisiwa hi yena, na svirho hinkwasvu sva wona svili karhi svihlanganisiwa ni kukhomana svinene, sviyendla xilo xin'we. Kutani loko xirho xin'wana ni xin'wana xitirha ntirho wa xona hi mfanelo, miri hinkwawu wukula, wuyakiwa rirhandzwini.

Ta mahanyela ya khale ni ya vukriste

¹⁷ Hikolaho, nivula lesvi ni kusvitiyisa hi vito ra Hosi, nili: Mingahahanyeni kufana ni lesvi vamatiko vahanyisaka xisvona, hi kuyanakanya ka vona lokungapfuniki nchumu.

¹⁸ Miyanakanyu ya vona yi le munyameni; ava na kuyaveliwa vuton'wini bza Xikwembu, hikuva ka vona vutivi abzikona, nasvona timbilu ta vona titlanyalile,

¹⁹ kutani avahali na tingana; vatinyiketile ka mikhuva ya manyala, vayendla sva nsila hinkwasvu, vangakoti kutikhoma.

²⁰ Kambe loko mili n'wina, ahi svona lesvi misvijondzeke hi tlhelo ra Kriste;

²¹ timhaka ta yena mititwile, kutani lesvi minga vanhu va yena Yesu, mijondzisiwile ntiyiso lowu wunga ka yena.

²² Hikolaho, tshikani mahanyela ya n'wina ya khale, mihlivila munhu wa khale lweyi aawonhiwa hi mhaka ya kunavela ka yena loku kukanganyisaka.

²³ Mimoya ya n'wina ni kuyehleketa ka n'wina asvihundzuke sviva lesvimpsha.

²⁴ Yambalani munhu lwe mumpsha lweyi avumbiweke hi xifaniso xa Xikwembu, lweyi atikombaka hi kululama ka yena ni kuhlawuleka lokunga ni ntiyiso.

²⁵ Hikolaho-ke, tshikani mavunhwa; mun'wana ni mun'wana aavulavuli ntiyiso ka munhukulobze, hikuva hinkwerhu hi svirho sva miri wun'we.

²⁶ Loko mitshuka mihlundzuka, mingaweli kujoheni; jambu ringatshuki ripela na mahahlundzukile,

²⁷ nasvona minganyiki Diyavulosi nkama.

²⁸ Lweyi aatolovela kuyiva, angahayi mahlweni ayiva; kambe aatikarhate atirha hi mavoko ya yena, atirhela sva kutipfuna ha svona, lesvaku atakota kupambulela lweyi apfumalaka.

²⁹ Akuvulavuleni ka n'wina mingatshukeni mitirhisa marito ya tingana, kambe tirhisani ntsena marito lamapfunaka, lawa mayakisaka ni kuhlamula lesvilavekaka, kutani kuvulavula ka n'wina kutatisa kukateka ka lava vamiyingisaka.

³⁰ Mingakhomisini tingana Moya Lowokwetsima wa Xikwembu, hikuva i mfungu wa Xikwembu wukomba lesvaku mi vanhu va xona, ni lesvaku siku rata, leri xingatamiponisa ha rona.

³¹ Lesvi sva kubava hinkwasvu, ni mahlundzu hinkwawu, ni kukariha hinkwaku, asvisusiwe xikarhi ka n'wina; tshikani kuholova ni kurhuketelana, misusa mona hinkwawu.

³² Matshan'wini ya svona, twelanani vusiwana, mitsetselelana, mirivalelana, kufana ni lesvi Xikwembu na xona ximirivaleleke ka Kriste.