Vaefesa 3 - Testamente Leyimpsha Xichangana

Ta ntirho wa Pawulo xikarhi ka vamatiko

¹ Mina Pawulo, mubohiwa avutirheleni bza Kriste Yesu, namikhongelela n'wina vamatiko.

² Mitava mitwile hilaha Xikwembu, hi timpsalu ta xona, xininyikeke hakona ntirho lowu lesvaku nimipfuna,

³ hikuva xitivisile xihundla xa makungu ya xona ka mina, nitsalile mhaka leyi hi kukomisa,

⁴ kutani loko mihlaya lesvi nisvitsaleke, mingavona hilaha ni twisisaka xihundla xa Kriste hakona.

⁵ Minkameni leyihundzeke, vanhu avabzeliwanga xihundla xoxo hi ndlela leyi Moya wungaxihlavutela ha yona svosvi, ka vapostola va Xikwembu lavohlawuleka ni ka vaprofeta.

⁶ Xihundla hi lexi: Hi mhaka ya Evhangeli, vamatiko vayaveliwa ndzhaka svin'we na hina Vayuda, vayendla svirho svin'we na hina mirini wun'we, nasvona vayaveliwa xitshembiso xin'we na hina ka Yesu Kriste.

⁷ Ninyikiwile kuva nandza wa Evhangeli leyi hi timpsalu ta Xikwembu, leti nitikumeke hi matimba ya xona lamatirheke ka mina.

⁸ Mina, ninga lwentsongo ngopfu ka vahlawuliwa va Xikwembu hinkwavu, ninyikiwile nkateko lowu wa kufikisa ka vamatiko Evhangeli ya rifuwo leringakontekiki ra Kriste,

⁹ ni kuyendla lesvaku vanhu hinkwavu vativa hilaha xihundla xa makungu ya Xikwembu xiyendlekaka hakona. Xikwembu, lexinga mutumbuluxi wa hinkwasvu, xitlhotile xihundla lexi minkameni hinkwayu leyihundzeke,

¹⁰ lesvaku minkameni ya svosvi, hi kutirhisa kereke, xitativisa vutlhari bza xona hi matlhelo hinkwawu ya bzona ka mimoya ya tihosana ni ya matimba henhla matilweni.

¹¹ Xikwembu xiyendlile lesvi hi kulandza kutilulamisela ka xona ka khale, loku xikuhetisiseke ha Yesu Kriste, Hosi ya hina.

¹² Hi kuhlangana na yena, ni kupfumela ka yena, hi tshunxekile kuta mahlweni ka Xikwembu na hingali na kukanakana.

¹³ Hikolaho nakombela nili: Mingaheleni mbilu, loko mivona lesvaku nixaniseka hikolaho ka n'wina; hinkwasvu lesvi svipfuna n'wina.

Ta rirhandzu ra Kriste

¹⁴ Hikolaho ka svosvo, nikhinsama hi matsolo mahlweni ka Tatana,

¹⁵ lweyi njangu, wun'wana ni wun'wana, matilweni ni la misaveni, wuhlayiwaka hikolaho ka yena.

¹⁶ Nikombela Xikwembu lesvaku ntalwini wa kudzuneka ka xona, ximinyika matimba, hi Moya wa xona, kutiya ka munhu wa n'wina wa le ndzeni,

¹⁷ ni lesvaku Kriste ayaka timbilwini ta n'wina hi kupfumela. Nikhongela lesvaku mimila timintsu rirhandzwini ni kuveka masungulu ya n'wina henhla ka rona,

¹⁸ ni lesvaku, svin'we ni vahlawuliwa hinkwavu va Xikwembu, mikuma matimba ya kutwisisa kuyanama, ni kuleha, ni kutlakuka, ni kuyeta ka rirhandzu ra Kriste.

¹⁹ Mawaku loko ingi mingativa rirhandzu ra yena, hambi loko svingayendleki kuritiva hi kuhetiseka kutani, mitatala hi vukona bza Xikwembu matlelo hinkwawu.

²⁰ Ka yena lweyi akotaka kuyendla, hi matimba lamatirhaka ka hina, kutlula ngopfu svinene hinkwasvu lesvi hingasvikombelaka, kumbe lesvi hingasvipimisaka,

²¹ ka yena akuve kudzuneka kerekeni ni le ka Yesu Kriste, hi minkama ni minkama hilaha kungaheliki. Amen!