Vaefesa 2 - Testamente Leyimpsha Xichangana

Ta kuhuma kufeni ni kunghena vuton'wini

¹ Khale amifile moyeni hikolaho ka milandzu ya n'wina ni svijoho sva n'wina.

² Minkameni yoleyo, amihanya ka svona, loko mahalandza svihena lesvobiha sva misava leyi. Amili hansi ka hosana leyifumaka mimoya ya le henhla mpfhukeni, wunga moya lowutirhaka ni svosvi xikarhi ka vanhu lavangayingisiki Xikwembu.

³ Na hina hinkwerhu khale ahifana na vona, hihanya hi kunavela ka nyama ya hina ya laha misaveni, hiyendla hinkwasvu lesvitsakisaka miri ni kuyehleketa ka hina; kutani na hina, hi kutumbuluka, ahifaneliwile hi vukarhi bza Xikwembu, kufana ni vanhu van'wana.

⁴ Kambe Xikwembu xi ni timpsalu svinene, hikolaho ka rirhandzu lerikulu leri xingahirhandza ha rona.

⁵ Hikolaho, hambilesvi ahifile hi mhaka ya milandzu ya hina, xihivuyisile vuton'wini svin'we na Kriste. I timpsalu ta Xikwembu leti timiponiseke.

⁶ Hi kuhihlanganisa na Kriste Yesu, xihipfuxile kufeni svin'we na yena, ni kuhiyendla lavafumaka na yena henhla matilweni.

⁷ Xiyendlile lesvi kukomba minkarhi leyitaka, kutala lokungapimekiki ka timpsalu ta xona, hi vunene lebzi xihiyendleleke bzona ha Yesu Kriste.

⁸ Hikuva hi tona timpsalu ta Xikwembu leti timiponiseke, hikolaho ka kupfumela; kutani lesvi asvihumi ka n'wina, kambe i nyiko ya Xikwembu.

⁹ Aku na xotikulisa ha xona mhakeni leyi, hikuva asvihumi kutikarhateni ka n'wina.

¹⁰ Hikuva hina hivumbiwile hi Xikwembu, kutani, ka Yesu Kriste, Xikwembu xihivumbele kutirha mintirho leyinene, leyi xihilungiseleke yona khale, lesvaku hitayendla yona.

Hi vanhu van'we ka Kriste

¹¹ N'wina vamatiko, lava va khale hi kuvelekiwa amihlayiwa “lavokala vangayimbanga” hi Vayuda lavatihlayaka “lavoyimba”, hikolaho ka kuyimba lokuyendliwaka hi mavoko ya vanhu mirini wa vona, tsundzukani lesvi amili xisvona.

¹² Minkameni yoleyo, amihambene na Kriste, amingahlayiwi nchumu xikarhi ka Vaisrayele, amingali na kuyaveliwa ka mintwananu ya xitshembiso. Amihanya misaveni leyi na mingali na kulangutela, nasvona mingali na Xikwembu.

¹³ Kambe svosvi, ka Yesu Kriste, n'wina lava va khale amili kule ni Xikwembu, mitshinetiwile kusuhi na xona hi kufa ka Kriste.

¹⁴ Kriste hi xiviri, hi yena kurhula ka hina, hikuva ayendlile lesvaku Vayuda ni vamatiko vava vanhu van'we. Hi kunyiketa miri wa yena, ahirimuxile khumbi leri arivahambanisa ni kuvavenganisa.

¹⁵ Ahelisile Nawu lowunga ni svileriso ni svinawanawana; ayendlile lesvi lesvaku, hi tinxaka leti timbirhi, atavumba vanhu van'we lavampsha lavahlanganaka ka yena, kutani svitisa kurhula.

¹⁶ Hi kufa ka yena xihambanwini, Kriste ahelisile rivengo, kutani, hi xihambanu, ahlanganisile tinxaka leti timbirhi tiva vanhu van'we, avavuyisa ka Xikwembu.

¹⁷ Atile atapaluxa Evhangeli ya kurhula ka n'wina vamatiko lava amili kule ni Xikwembu, ni ka Vayuda lava avali kusuhi na xona.

¹⁸ Hi yena lweyi ayendleke lesvaku hina hinkwerhu, Vayuda ni vamatiko, hikota kuta hi Moya wun'we mahlweni ka Xikwembu.

¹⁹ Hikolaho-ke, n'wina vamatiko amahali va le handle ni vanhu van'wanyana, kambe mi va munti wun'we ni vahlawuliwa va Xikwembu, mi va njangu wa xona.

²⁰ Na n'wina miyakiwa henhla ka masungulu lamavekiweke hi vapostola ni vaprofeta, ribze lerikulu ra masungulu na ali yena Yesu Kriste hi xiviri.

²¹ Hikolaho ka yena, yindlo hinkwayu yihlangana yitiya, yikula svin'we yiyendla tempele leyohlawuleka Hosini;

²² ka yena na n'wina miyakiwa kun'we ni van'wana, miyendla yindlo laha Xikwembu xitshamaka kona hi Moya wa xona.