Vaefesa 1 - Testamente Leyimpsha Xichangana

Kuxeweta

¹ Mina Pawulo, mupostola wa Kriste Yesu hi kurhandza ka Xikwembu, nitsalela vakwetsimi va Xikwembu [lavanga le Efesa], lavatshembekaka ka Yesu Kriste, nili:

² Timpsalu ni kurhula asvive na n'wina, svihuma ka Xikwembu Tatana wa hina, ni le ka Hosi Yesu Kriste.

Minkateko ya moya ka Kriste

³ Akudzunisiwe Xikwembu, Tatana wa Hosi ya hina Yesu Kriste, lexingahikatekisa ka Kriste hi minkateko ya moya wa kuhambanahambana, henhla matilweni:

⁴ Ni loko misava yingasitumbuluxiwa, Xikwembu axihihlawulile ka Kriste, lesvaku hitava lavahlawulekeke ni kupfumala nandzu mahlweni ka xona.

⁵ Hikolaho ka rirhandzu ra xona, xilulamisile khale lesvaku, ha Yesu Kriste, xitahitshineta kusuhi na xona, xihiyendla vana va xona. Lesvi, akuli kurhandza ka xona ni makungu ya xona,

⁶ kuyendlela lesvaku hixidzunisa ni kuxitwalisa hi mhaka ya timpsalu ta xona, leti xihinyikeke ka N'wana wa xona lweyi arhandzekaka.

⁷ Hikuva, hi kufa ka Kriste, haponisiwa, hirivaleliwa svijoho sva hina. Timpsalu ta Xikwembu i tikulu ngopfu,

⁸ tinga leti xingahichululela tona! Hi vutlhari hinkwabzu bza xona ni kuyanakanya hinkwaku ka xona,

⁹ Xikwembu xiyendlile lesvi kusukela khale axilava kusviyendla ha Kriste: Xihitivisile kurhandza ka xona loku akufihliwile,

¹⁰ loku axilava kukuyisa mahlweni, minkama yakona yikondza yihetiseka. Kurhandza ka xona i kuhlanganisa svivumbiwa hinkwasvu, sva le matilweni ni sva laha misaveni, nhloko ya svona ava Kriste.

¹¹ Hakunene Xikwembu xiyendla hinkwasvu hilaha xirhandzaka hakona ni hilaha xipimaka hakona, kutani xihlawule hina Vayuda kuva vamajandzhaka va xona ka Kriste, hi kutilulamisela ka xona ka khale,

¹² kuyendlela lesvaku hina hinga lavosungula kuva ni kutshemba ka Kriste, hidzunisa kutwala ka xona Xikwembu.

¹³ Asvili tano na n'wina vamatiko, loko mitwile Rito ra ntiyiso, anga Evhangeli ya kuponisiwa ka n'wina: Mipfumelile ka Kriste, kutani Xikwembu ximifungile hi Moya Lowokwetsima lowu axitshembisile kuminyika wona.

¹⁴ Moya lowu i xitshembiso xa ndzhaka ya hina leyi hingatayikuma, leyi Xikwembu xinyikaka kutshunxeka loku kuhetisekeke ka lavanga va xona, kuyendlela lesvaku vadzunisa kutwala ka xona.

Kukhongela ka Pawulo

¹⁵ Hikolaho na mina, kusukela loko nitwile ta kupfumela ka n'wina ka Hosi Yesu, ni ta rirhandzu ra n'wina ka vahlawuliwa va Xikwembu hinkwavu,

¹⁶ anitshikanga kukhensa hikolaho ka n'wina. Namiyanakanya mikhongelweni ya mina;

¹⁷ nikombela lesvaku Xikwembu xa Hosi ya hina Yesu Kriste, Tatana lweyi adzunekaka, ximinyika Moya wa vutlhari, xitipfuletela ha wona ka n'wina, lesvaku mitaxitiva svinene

¹⁸ na mahlo ya timbilu ta n'wina mavoningiwile, mitativa lesvaku kulangutela loku ximivitanelaka kona hi loku koyini, ni lesvaku kutala ka ndzhaka ya xona leyosaseka ngopfu leyitshembisiwaka vahlawuliwa va xona, hi leyoyini,

¹⁹ mitativa ni vukulu lebzingapimekiki bza matimba ya xona lamatirhaka xikarhi ka hina lavapfumelaka. Matimba lamakulu lawa,

²⁰ mahali wona lawa ximatirhiseke ngopfu, loko xipfuxile Kriste kufeni, xiva ximuveka vokweni ra xona ra xinene henhla matilweni.

²¹ Kriste wafuma kona, henhla ka hinkwasvu lesvinga ni vukulukumba, ni kufuma, ni matimba, ni vuhosi; na svona, a le henhla ka mavito hinkwawu lawa mangavuliwaka, kungali minkameni leyi ntsena, kambe ni ka minkama leyingatata.

²² Kutani Xikwembu xivekile hinkwasvu hansi ka minkondzo ya Kriste, xitlhela ximuveka Kerekeni, kuva nhloko ya hinkwasvu.

²³ Kereke i miri wa yena, yihetiseka hikolaho ka yena lweyi ahetisisaka svilo hinkwasvu hi matlhelo hinkwawu.