Timhaka 9 - Testamente Leyimpsha Xichangana

Ta kuhundzuka ka Sawulo

¹ Lesvi Sawulo aahisekela kuchavisa ni kudlaya vajondzisiwa va Hosi, aya ka Muprista lwenkulu,

² kuyakombela mapapela lawa matsaleliweke masinagoga ya Damaska, lesvaku loko atshuka akuma lavalandzaka Ndlela ya Hosi, vavanuna kumbe vavasati, avayisa Yerusalema na vabohiwile.

³ Loko ahali ndleleni, ali kusuhi na Damaska, hi nomo-lo kuvonakala loku kuhumaka tilweni kumurhendzela.

⁴ Kutani awela hansi, atwa rito leringe ka yena: “Sawulo, Sawulo! Unixanisela yini?”

⁵ Yena aku: “U mani, Hosi?” Rito riku: “Hi mina Yesu, lweyi umuxanisaka.

⁶ Kambe pfuka uyima, unghena doropeni, kutani utabzeliwa lesvi ufanelaka kuyendla svona.”

⁷ Lava avafamba na yena, vayima vangahlayi nchumu, hikuva avatwa rito, kambe vangavoni munhu.

⁸ Sawulo asuka ayima, kambe loko apfula mahlo, angahakoti kuvona; kutani vamukhoma hi voko, vamuyisa Damaska.

⁹ Kutani atshama masiku manharhu, na angavoni, angaji, anganwi nchumu.

¹⁰ Akuli ni mujondzisiwa mun'we le Damaska lweyi avaku i Ananiya; Hosi yivulavula na yena hi xivoniso, yiku: “Ananiya!” Yena aku: “Hi mina lweyi, Hosi.”

¹¹ Hosi yiku ka yena: “Suka uyima, uya ndleleni leyihlayiwaka ‘Leyi ya kululama’, kutani ndlwini ya Yuda ulava munhu wa kuhuma Tarso lweyi vange i Sawulo; akarhi akhongela;

¹² hi xivoniso, avonile munhu lweyi vange i Ananiya na li karhi anghena, amutlhanteka mavoko lesvaku atlhela avona.”

¹³ Ananiya ahlamula, aku: “Hosi, nitwile lavotala va vulavula hi munhu lweyi, ni lesvaku ayendlile lesvobiha ngopfu ka vahlawuliwa va wena le Yerusalema.

¹⁴ Kutani ni kola, anyikiwile matimba hi Vaprista lavakulu kukhoma vanhu hinkwavu lavakhongelaka vito ra wena.”

¹⁵ Hosi yiku ka yena: “Yana, hikuva munhu lweyi i xitirho lexi ningatihlawulela xona kuyapaluxa vito ra mina ka vamatiko, ni ka tihosi, ni ka Vaisrayele;

¹⁶ nasvona mina nitamukomba hinkwasvu lesvi afanelaka kuvaviseka ha svona, hikolaho ka vito ra mina.”

¹⁷ Ananiya afamba, ayanghena ndlwini, kutani atlhanteka Sawulo mavoko, aku: “Sawulo makwerhu, nirhumiwile hi Hosi, anga yena Yesu lweyi atikombiseke ka wena ndleleni leyi ungata ha yona; anirhumile ka wena lesvaku utlhela uvona, ni lesvaku utala hi Moya Wokwetsima.”

¹⁸ Hi nomo-lo, svilo lesvifanaka ni tihakatimba svisuka matihlweni ya Sawulo, kutani atlhela avona, asuka ayima, akhuvuliwa.

¹⁹ Kuteloko ajile svakuja, atlhela akuma matimba. Sawulo atshama ni vajondzisiwa va le Damaska masiku mangali mangani.

Ta Sawulo loko atwalisa Rito Damaska

²⁰ Kutani hi kuhantlisa asungula kupaluxa ta Yesu masinagogeni, aku: “Lweyi hi yena N'wana wa Xikwembu.”

²¹ Hinkwavu lavamutwaka, vahlamala ngopfu, vaku: “Xana munhu lweyi ahi yena lweyi aaringeta kuhelisa lavakhongelaka vito lero Yerusalema ke? Xana ni halenu angatelanga kutavakhoma, avayisa ka Vaprista lavakulu ke?”

²² Kambe Sawulo aali karhi ayengeteleliwa matimba, amiyeta Vayuda lavayakeke Damaska, hi kuvakombisa lesvaku Yesu i Mesiya.

Ta Sawulo loko abaleka Vayuda

²³ Ndzhaku ka masiku lamanyingi, Vayuda vatwanana kudlaya Sawulo.

²⁴ Kambe yena ativisiwa makungu ya vona. Avamutumbelelile tinyangweni ta doropa, vusiku ni nhlekanhi, lesvaku vatamudlaya;

²⁵ kambe vajondzisiwa va yena vamuteka nivusiku, vamuxikisa rithangwini ra doropa hi kumuxikisa hansi na ali ndzhaveni.

Ta Sawulo loko afikile Yerusalema

²⁶ Loko Sawulo afikile Yerusalema, aringeta kutihlanganisa ni vajondzisiwa; kambe vamuchava hinkwavu, vangakholwi lesvaku ahundzuke mujondzisiwa.

²⁷ Kutani Barnaba amuteka, amuyisa ka vapostola, avahlamusela hilaha Sawulo avoneke Hosi hakona, loko ali ndleleni, ni lesvaku Hosi yivulavule na yena; ahlamusela ni hilaha angajondzisa hakona hi vito ra Yesu doropeni ra Damaska, na angachavi nchumu.

²⁸ Kutani Sawulo atshama na vona Yerusalema, na ali karhi afambafamba doropeni hinkwaku, ajondzisa hi vito ra Hosi na angachavi nchumu;

²⁹ nasvona avulavula ni kuhlamulana ni Vayuda vakuvulavula Xigirika; kambe vona varingeta kumudlaya.

³⁰ Kuteloko vamakwavu Hosini vasvitwile, vamuyisa Khezariya, kutani vamuhundzisela mahlweni kuya Tarso.

³¹ Nkameni wolowo, kereke ayili ni kurhula tikweni hinkwaru ra Yudeya, ni ra Galileya, ni ra Samariya, na yili karhi yiyakisiwa ni kuhanya kuxiximeni ka Hosi; kutani ayihandza, yitiyisiwa hi Moya Wokwetsima.

Ta kuhanyisiwa ka Eniya

³² Loko Petrosi ali karhi afambafamba hinkwaku, afika ni le ka vahlawuliwa va Hosi lavayakeke Lida.

³³ Kolano akuma munhu lweyi avaku i Eniya, lweyi aali xilema, ahetile malembe ya ntlhanu ni manharhu na ayetlele sangwini.

³⁴ Kutani Petrosi aku ka yena: “Eniya! Yesu Kriste wa kuhanyisa; pfuka, utisongela sangu ra wena.” Hi nomo-lo apfuka ayima.

³⁵ Hinkwavu lavayakeke Lida ni le Saroni, vamuvona, kutani vatinyiketa ka Hosi.

Ta Dorkazi loko apfuxiwa kufeni

³⁶ Doropeni ra Yopa, akuli ni mujondzisiwa wa xisati, lweyi avaku i Tabita (hi Xigirika: Dorkazi, hi lesvaku N'wa-Mhunti); aatolovela kutirha mintirho leyinene, arhandza ni kunyika.

³⁷ Hi masiku wolawo akhomiwa hi vuvabzi, kutani afa. Kuteloko vahlampsile ntsumbu wa yena, vamuveka ndlwini ya le henhla.

³⁸ Doropa ra Yopa arili kusuhi na Lida; hi kolaho, loko vajondzisiwa vatwa lesvaku Petrosi a le Lida, vamurhumela vavanuna vambirhi, vayamukombela lesvaku ata Yopa, angahlweli.

³⁹ Kutani Petrosi asekeleka, afamba na vona. Kuteloko afikile, vamuyisa ndlwini ya le henhla; vafelakazi hinkwavu vamurhendzela, na vali karhi varila, vamukomba tinguvu ni sviyambalu lesvi Dorkazi aasvirhunga loko ahahanya.

⁴⁰ Kambe Petrosi avahumesela handle hinkwavu; akhinsama hi matsolo, akhongela; kutani ahundzukula ka ntsumbu, aku: “Tabita, pfuka!” Kuteloko Tabita apfula mahlo, loko avona Petrosi, apfuka atshama.

⁴¹ Hi loko yena amukhoma hi voko, amuyimisa; kutani loko avitanile vakwetsimi va Hosi ni vafelakazi, asiya Dorkazi a ka vona na se ahanya.

⁴² Mhaka leyi yitiviwa hi vayaki va doropa hinkwaru ra Yopa; kutani vanhu lavotala vapfumela ka Hosi.

⁴³ Petrosi axwa Yopa masiku lamanyingi, kaya ka wanuna lweyi avaku i Simoni, muchuki wa svikhumba.