Timhaka 6 - Testamente Leyimpsha Xichangana

Ta kuhlawuliwa ka lava va ntlhanu ni vambirhi

¹ Hi masiku wolawo, loko vajondzisiwa vayavatala, van'wana va vona lava avavulavula Xigirika vatseketsela lava avavulavula ririmi ra Xiyuda, vaku vafelekazi va ka vona vatsoniwa loko kuphakeliwa sva siku rin'wana ni rin'wana.

² Kutani lava vambirhi vavitana ntlawa wa vajondzisiwa, vaku: “Asvifanelanga lesvaku hipfa hitshika kuvula rito ra Xikwembu, hiyatirha ntirho wa kuphamela.

³ Loko svilitano vamakwerhu, hlawulani vavanuna va ntlhanu ni vambirhi xikarhi ka n'wina lavativekaka na vali lavateleke hi Moya ni vutlhari, lesvaku hi vaveka kuvona timhaka leti.

⁴ Loko hili hina, hitaya mahlweni ni svikhongelo, hivula ni Rito.”

⁵ Marito wolawo mayamukeliwa hi nhlengeletanu hinkwayu; kutani vahlawula Stefano, wanuna lweyi ateleke hi kupfumela ni Moya Wokwetsima; vahlawula na Filipi, na Prokoro, na Nikanoro, na Timoni, na Parmena, na Nikolawu wa Antiyoka, munhu lweyi aarhange ayamukeliwa Xiyudeni.

⁶ Nhlengeletanu yivatisa ka vapostola; kaku loko vona vakhongelile, vavatlhanteka mavoko.

⁷ Rito ra Xikwembu riya mahlweni; na yona nhlayo ya vajondzisiwa yiya yitala ngopfu Yerusalema, nasvona vaprista lavotala vatinyiketa kupfumeleni.

Ta kukhomiwa ka Stefano

⁸ Stefano aatale hi timpsalu ni matimba, ayendla svihlamaliso lesvikulu ni mahlori lamakulu xikarhi ka tiko.

⁹ Kambe kuhumelela van'wana vasinagoga leyivuliwaka ya Vatshunxiwa, van'we vali lavahumaka Kirene ni le Alexandriya, van'wana vahuma Kilikiya ni le Aziya; kutani vayima vakanetana na Stefano.

¹⁰ Kambe vahluleka kulwa ni vutlhari lebzi Moya wungamunyika kuvulavula ha bzona.

¹¹ Kutani vakucetela vavanuna kuvula lesvi: “Himutwile avulavula timhaka letisandzaka Moxe ni Xikwembu.”

¹² Nasvona vapfuxa mpfilumpfilu tikweni, ni ka vakulukumba ni Vatsali, kutani vamuwela henhla, vamukhoma, vamuyisa hubzeni;

¹³ vahumesa timboni ta mavunhwa, titamuhembela tiku: “Munhu lweyi, angatshiki kuvulavula timhaka letisandzaka ndhawu leyi ya kuhlawuleka, asandza ni Nawu;

¹⁴ hikuva hi mutwile loko ahlaya lesvaku Yesu lweyi wa Nazareta atahelisa ndhawu leyi, ahundzuluxa ni mikhuva leyi hinganyikiwa hi Moxe.”

¹⁵ Kutani hinkwavu lavatshameke hubzeni, loko vamulangutisa, vavona mombo wa yena wufana ni mombo wa ntsumi.