Timhaka 5 - Testamente Leyimpsha Xichangana

Ta Ananiya na Safira

¹ Kambe akuli ni wanuna lweyi avaku i Ananiya, ni nsati wa yena Safira; aaxavise nsimu,

² kutani loko atipambulele male ka nxavu wakona hi kutwanana ni nsati, atisa lesvisaleke, asviveka mahlweni ka vapostola.

³ Hi loko Petrosi aku ka yena: “Ananiya, hikolaho ka yini upfumelela Sathana kunghena mbilwini ya wena, lesvaku uhembela Moya Wokwetsima, ni kutipambulela hi tlhelo ka nxavu wa nsimu xana?

⁴ Ni loko uyixavisile, xana ntsengo awungali wa wena ke? Mhaka leyi uyipfumelelise kuyini mbilwini ya wena xana? Awuhembelanga vanhu, kambe uhembele Xikwembu.”

⁵ Loko Ananiya atwa marito wolawo, awela hansi, afa. Kutani hinkwavu lavatweke mhaka leyi vakhomiwa hi kuchava lokukulu.

⁶ Kutani majaha manghena, mamuphutsela, mamurhwala mahuma na yena, maya mulahla.

⁷ Loko kulave kuhundza mawora manharhu, nsati wa Ananiya anghena na yena, na angativi lesvihumeleleke.

⁸ Petrosi amuvutisa, aku: “Nibzele, xana hi wona ntsengo lowu mingaxavisa nsimu ha wona ke?” Aku: “Ina! Hi wona.”

⁹ Hi loko Petrosi aku ka yena: “Mitwananele yini kuringa Moya wa Hosi xana? Vona, minkondzo ya lavangaya lahla nuna wa wena hi leyi nyangweni; na wena vatakurhwala vahuma na wena.”

¹⁰ Hi nomo-lo awela milengeni ya Petrosi, anhlala afa. Loko majaha manghenile, mamukuma na afile, kutani mamurhwala mahuma na yena, maya mulahla kusuhi ni nuna wa yena.

¹¹ Kutani kuchava lokukulu kukhoma kereke hinkwayu ni vanhu hinkwavu lavatweke timhaka leti.

Ta vapostola loko vayendla mahlori ni svihlamaliso

¹² Akuyendliwa mahlori layotala ni svihlamaliso lesvotala hi mavoko ya vapostola, xikarhi ka vanhu. Vajondzisiwa hinkwavu avatolovela kuhlengeletana rikupakupeni ra Solomoni, na vali mbilu yin'we.

¹³ Kambe loko vali vanhu van'wana, ni mun'we angatiyanga nhlana kutinghenisa xikarhi ka vapostola, hambilesvi tiko arivadzunisa ngopfu.

¹⁴ hambi svilitano, ntsengo wa vona awuya wuyengeteleka hi vavanuna ni vavasati lavanyingi lavapfumeleke ka Hosi,

¹⁵ kukondza kufika laha vavabzi vatisiwaka mintsendzeleni, vavekiwa masangwini ni le tinhlakeni, lesvaku loko Petrosi ahundza, van'wana va vona vatakhumbiwa hambi kuli hi ndzhuti wa yena ntsena.

¹⁶ Nasvona, vanhu vamadoropa lawa marhendzeleke Yerusalema, avata na vali vanyingi, vatisa timbabzi, ni lavakarhatiwaka hi mimoya ya chaka; kutani hinkwavu avahanyisiwa.

Ta kuxanisiwa ka vapostola

¹⁷ Kuteloko Muprista lwenkulu, ni vaseketeli va yena hinkwavu, lava avali va ntlawa wa Vasaduki ndhawini leyi, vangheneliwa hi vukwele,

¹⁸ kutani vakhoma vapostola, vavapfalela jele ra le doropeni.

¹⁹ Kambe ntsumi ya Hosi yipfula svipfalu sva jele nivusiku, yivahumesela handle, yiku:

²⁰ “Fambani miyayima Tempeleni, mitivisa vanhu timhaka hinkwatu ta vutomi lebzimpsha lebzi.”

²¹ Hi loko vona vayingisa, vayanghena Tempeleni loko rilava kuxa, kutani vajondzisa kona. Kambe loko Muprista lwenkulu ni vaseketeli va yena vafika, vavitana huvu ya Sanedri, yinga nhlengeletanu ya vakulukumba hinkwavu va tiko ra Israyele, kutani varhuma vanhu jele kuyateka vapostola.

²² Kambe loko varhumiwa vafika jele, vakuma vapostola na vangali kona; kutani vatlhela, vayabzela huvu vaku:

²³ “Hikumile jele na ripfaliwile svinene, ni valanguteli na vayimile tinyangweni; kambe loko hipfula, hikume kungali na munhu.”

²⁴ Loko ndhuna ya Tempele ni Vaprista lavakulu vatwa marito wolawo, vakanakana ngopfu, vangativi lesvaku kungava kuhumelele yini hi vapostola.

²⁵ Kambe kufika munhu mun'we, avabzela mahungu, aku ka vona: “Masvivo, vavanuna lava mivangheniseke jele, va le Tempeleni, vakarhi vajondzisa vanhu.”

²⁶ Hi loko ndhuna ya Tempele ni varhumiwa va huvu vaya vayavakhoma, kambe kungali hi kuvadlidlimbeta, hikuva avachava vanhu lesvaku vangavakhandla hi maribze.

²⁷ Kuteloko vavuyile ni vapostola, vavayimisa hubzeni, kutani Muprista lwenkulu atengisana na vona, aku:

²⁸ “Hi mibzele svinene lesvaku mingatshukeni mijondzisa hi vito lero; kambe langutani ke, mitatile Yerusalema hi jondzo ya n'wina, kutani milava kuhiveka nandzu wa rifu ra munhu lweyi!”

²⁹ Kambe Petrosi ni vapostola lavan'wana vahlamula, vaku: “Hi fanele kuyingisa Xikwembu kutlula vanhu.

³⁰ Xikwembu xa vatatana va hina xipfuxile Yesu kufeni, ndzhaku ka loko mimudlayile hi kumuhayeka mhandzeni.

³¹ Hi yena lweyi Xikwembu xingamutlakusa, atshama vokweni ra xona ra xinene kuva Murhangeli ni Muponisi, lesvaku atanyika Vaisrayele akuhundzuka ni kurivaleliwa ka svijoho.

³² Kutani hina hi timboni ta timhaka leti, hina svin'we ni Moya Wokwetsima lowu Xikwembu xiwunyikeke lava vaxiyingisaka.”

Ta Gamaliyele

³³ Loko vahuvo vatwa marito lawa, vakariha ngopfu, kutani vatilulamisela kuvadlaya.

³⁴ Kambe Mufarisi mun'we lweyi avaku i Gamaliyele, mujondzisi wa Nawu lweyi aadzunisiwa hi tiko hinkwaru, ayima hubzeni; aleleta lesvaku vapostola vahumesiwa handle hi nkamanyana.

³⁵ Kutani aku ka huvu: “Vavanuna va Israyele, tivoneleni ka lesvi milavaka kusviyendla ka vanhu lava;

³⁶ hikuva ahi khale ngopfu kuhumeleleke Tudasi, lweyi aativula munhu wa matimba; aaseketeliwa hi vanhu lavalavaka kuva mune wa madzana (400), kambe avuye adlayiwa, kutani hinkwavu lava avayima na yena, vahangalasiwa vanyamalala.

³⁷ Ndzhaku ka yena kuhumelele Yudasi wa Galileya, nkameni wa kutsalisiwa ka vanhu, axenga lavotala, vamulandza; kambe na yena alovile, kutani hinkwavu lava avayima na yena, vahangalasiwa.

³⁸ Svosvi-ke nili ka n'wina: Hambanani ni vanhu lava, mivatshika; hikuva loko makungu lawa, kumbe ntirho lowu, wuhuma ka vanhu, wutahela;

³⁹ kambe loko wuhuma ka Xikwembu, mingakala mingavasiveli, kutani mingakumiwa na milwile ni Xikwembu.” Va huvu vamuyingisa.

⁴⁰ Loko vavitanile vapostola ni kuvanyiketa lesvaku vabiwa hi minkhavi vavaleleta lesvaku vangatshuki vajondzisa hi vito ra Yesu, kutani vavatshunxa.

⁴¹ Loko vali vona, vahuma hubzeni na vatsakile, hikuva avakumiwile na vali lavafanelaka kusoliwa hikolaho ka vito ra Yesu.

⁴² Kutani masiku hinkwawu, avangarhuteli kujondzisa ni kupaluxa Evhangeli Tempeleni ni le minjangwini ya vanhu, vaku: “Kriste, hi yena Yesu.”