Timhaka 3 - Testamente Leyimpsha Xichangana

Ta kuhanyisiwa ka xilema nyangweni ya Tempele

¹ Siku rin'wana, Petrosi na Yohani avatlhantukela Tempeleni nimajambu, hi nkama wa xikhongelo.

² Kona Tempeleni, nyangweni leyihlayiwaka “Leyosaseka”, akuli ni munhu lweyi avelekiweke na ali xilema; avatolovela kumurhwala, vamuveka kona masiku hinkwawu, lesvaku atakombela xanchumu ka lava nghenaka Tempeleni.

³ Loko munhu lweyi avona Petrosi na Yohani na vali kusuhi ni kunghena Tempeleni, avakombela xanchumu.

⁴ Kambe Petrosi na Yohani vamuhonokela, kutani Petrosi aku: “Hi langute.”

⁵ Munhu lweyi avalanguta svinene, apimisa lesvaku vatamunyika xanchumu.

⁶ Kambe Petrosi aku ka yena: “Silivhere a ni na yona, hambi nsuku a ni na wona, kambe lexi ninga na xona, nitakunyika xona: Hi vito ra Yesu Kriste wa Nazareta, nili: Famba!”

⁷ Kutani amukhoma hi voko ra xinene, amuyimisa; hi nomo-lo minkondzo ni mahlakala sva yena svitiya.

⁸ Kutani o kakatsuku, ava ayima afamba; anghena Tempeleni na ali na vona, afambafamba, atlulatlula, adzunisa Xikwembu,

⁹ kutani vanhu hinkwavu vamuvona na ali karhi afamba, na adzunisa Xikwembu.

¹⁰ Loko vavona lesvaku hi yena lweyi aatshamela kukombela zimole Tempeleni, nyangweni leyivuliwaka “Leyosaseka”, vakhomiwa hi kuchava, vahlamalisiwa svinene hi lesvi svimuhumeleleke.

Ta kujondzisa ka Petrosi rikupakupeni ra Solomoni

¹¹ Lesvi munhu lweyi aanamarhela Petrosi na Yohani, vanhu hinkwavu vahlamala, vata ka vona hi kutsutsuma, rikupakupeni leri avaku i ra Solomoni.

¹² Loko Petrosi asvivona, aku ka vona: “Vavanuna va Israyele, hikolaho ka yini mihlamala mhaka leyi, mihihonokela hi mukhuva lowu xana, ingi hi loko ali hina hingayendla lesvaku munhu lweyi afamba, hi matimba ya hina kumbe hi vukhongeli bza hina?

¹³ Xikwembu xa Abrahamu ni xa Izaki ni xa Yakobe, Xikwembu xa vatatana va hina, xidzunisile nandza wa xona Yesu, lweyi mingamunyiketa, mitlhela mimulandzula mahlweni ka Pilato; kambe Pilato yena aahlayile lesvaku atlhantlhiwa.

¹⁴ Yesu aali lweyi ahlawulekeke, lweyi alulameke; kambe n'wina mimulandzulile, mikombela kutshunxeliwa mudlayi,

¹⁵ kutani midlaya munyiki wa vutomi; kambe Xikwembu ximupfuxile kufeni; hina hi timboni ta svona.

¹⁶ Hikolaho, lesvitiyiseke munhu lweyi mimutivaka ni kumuvona, i vito ra Yesu ni kupfumela ka vito leri; kutani kupfumela loku, kuhanyisile munhu lweyi hakunene, hi matimba ya Yesu, hilaha misvivonaka hakona n'wina hinkwenu.

¹⁷ “Kutani-ke valekwerhu, nasvitiva lesvaku n'wina ni tihosi ta n'wina, miyendlile svilo lesvo hi kupfumala vutivi,

¹⁸ kambe hi mukhuva wolowo, Xikwembu xiyendlile lesvaku kuhetiseka lesvi xingasvitivisa khale hi milomo ya vaprofeta hinkwavu: Hi lesvaku Mesiya wa xona aata xanisiwa.

¹⁹ “Loko svilitano, tilayeni, mitlhelela ka Xikwembu, lesvaku svijoho sva n'wina svirivaleliwa,

²⁰ ni lesvaku minkama yotitimela leyihumaka Hosini yisungula, ni lesvaku Hosi yimirhumela Yesu, yena lweyi angavekiwa kuva Mesiya wa n'wina;

²¹ afanele kutshama tilweni, kukondza kufika minkama ya kupfuxetiwa ka svilo hinkwasvu, leyi Xikwembu xingayivula nikhale, hi milomo ya vaprofeta va xona lavohlawuleka.

²² Hakunene Moxe ahlayile, aku: ‘Yehovha Xikwembu xa n'wina xitamihumesela muprofeta lweyi afanaka na mina, ahuma xikarhi ka va ka n'wina; mitamuyingisa ka hinkwasvu lesvi angatamibzela svona.

²³ Kutani mun'wana ni mun'wana lweyi angayingisiki muprofeta lweyi, atasusiwa tikweni.’

²⁴ Nasvona, vaprofeta hinkwavu lavangavulavula kusukela ka Samuwele ni ka lavateke ndzhaku ka yena, na vona vativisile ta masiku lawa.

²⁵ Hi n'wina valandzeli va vaprofeta, hi n'wina vantwananu lowu Xikwembu xingawuyendla ni vatatana va n'wina, loko xite ka Abrahamu: ‘Hi vatukulu va wena, nitakatekisa tinxaka hinkwatu ta misava.’

²⁶ Loko Xikwembu xirhumelile nandza wa xona, ximuhumesile hi le ka n'wina kusunguleni lesvaku amikatekisa hi kuhundzula mun'wana ni mun'wana wa n'wina amikhuveni ya yena leyobiha.”