Timhaka 28 - Testamente Leyimpsha Xichangana

Ta Pawulo loko ali xihlaleni xa Malta

¹ Kuteloko hi ponile hi ndlela yoleyo, hibzeliwa lesvaku xihlale xakona xivuliwa Malta.

² Vayaki va xona vahikomba timpsalu letohlamalisa; vahiyamukela hinkwerhu, vahitshivelela ndzilo lowukulu, hikuva mpfula ayina, nasvona akuli ni xirhami.

³ Pawulo atshovatshova mahlahla, alavakuma hoxa ndzilweni, kambe nyoka yihuma kona hi kutwa kukufumela, yitsondzela voko ra yena.

⁴ Loko vayaki va xihlale vavona nyoka leyi na yilengalenga vokweni ra Pawulo, vabzelana vaku: “Munhu lweyi i mudlayi hakunene; hambi loko aponile matini, Tilo aringapfumeli lesvaku ahanya.”

⁵ Kambe Pawulo adzudzela nyoka ndzilweni, na angavavisiwanga nikutsongo.

⁶ Vona avalangutela lesvaku atapfimba, kumbe ahantla awela hansi, afa; kambe loko valangutelile nkama wa kuleha, vavona lesvaku akuhumeleli nchumu xa kuhlamalisa ka yena, kutani vahundzula kupimiso, vaku: “Munhu lweyi i xikwembu xin'wana.”

⁷ Kusuhi ni mbangu lowu, akuli ni masimu ya ndhuna ya xihlale, leyi avaku i Publiyo; munhu lweyi ahiyamukela svinene, ahirhurhela ndlwini ya yena masiku manharhu.

⁸ Kambe kukumeka lesvaku tatana wa Publiyo aayetlelile, miri wa yena wuhisa ni kukhomiwa hi le ndzeni. Pawulo anghena ka yena; akhongela, kutani amutlhanteka mavoko, amuhanyisa.

⁹ Loko mhaka leyi yihumelelile, timbabzi tin'wana ta xihlale, tita, tihanyisiwa hinkwatu na vona.

¹⁰ Vahikhensa hi kuhumesa tinyiko tinyingi; kutani siku leri hisukaka, vahilongelela lesvi hingatasvilava ariyendzweni.

Ta Pawulo loko afika Roma

¹¹ Loko kuhundzile tihweti tinharhu, hifamba hi ngalawa ya kuhuma Alexandriya, leyi avaku i “ya svikwembu sva mahahla”; ahihetile vuxika na hili xihlaleni.

¹² Kutani loko hifikile Sirakuza, hixwa masiku manharhu kona.

¹³ Loko hihuma kona, hilulama ni ribuwa hiko hifika Rexjiyo. Hi siku leritlhantamaka moya wa le dzongeni wupfuka, kutani hi masiku mambirhi hiyafika Puteyoli.

¹⁴ Kona hikuma vamakwerhu lavakombelaka lesvaku hixwa masiku ya ntlhanu ni mambirhi na vona; kutani hi ndlela leyo hiyafika Roma.

¹⁵ Loko vamakwerhu va le Roma vatwa lesvaku hafika, vatatahitlhangaveta ntsendzeleni wa Apiyo, laha kuvuliwaka “svitolo svinharhu”; kuteloko Pawulo avavona, akhensa Xikwembu, atiyisa mbilu.

¹⁶ Loko hifikile Roma, Pawulo apfumeleliwa kuva ni yindlo ya yena yexe, atshama ni sochwa leri rimurindzaka.

Ta Pawulo loko achumayela le Roma

¹⁷ Ndzhaku ka masiku manharhu, Pawulo arhamba lavanga vakulukumba xikarhi ka Vayuda; kuteloko vahlengeletanile, aku ka vona: “Vavanuna valekwerhu, hambi loko ningayendlanga nchumu kujohela tiko kumbe mikhuva ya vatatana, nibohiwile Yerusalema, kutani ninyiketiwile mavokweni ya Varoma.

¹⁸ Loko vona vanivutisile, valavile kunitshunxa, hikuva aningayendlanga nchumu lowufanekeliwaka hi rifu.

¹⁹ Kambe lesvi Vayuda avayala svosvo, svinibohile kukombela kuyavanyisiwa hi Khezari, hambi loko ningali na lexi ningamangalelaka tiko ra le kwerhu ha xona.

²⁰ Hikolaho ni mivitanile lesvaku nitamivona ni kuvulavula na n'wina, hikuva nibohiwile hi chini leri hikolaho ka lweyi Vaisrayele vamulanguteleke.”

²¹ Vaku ka yena: “Ahisiyamukela mapapela lamahumaka Yudeya, lamahlamuselaka timhaka ta wena; hambi vali Vayuda va ka hina, ni mun'we wa vona angatanga kutahitivisa kumbe kuvula mhaka yobiha henhla ka wena.

²² Kutani hifanele kutwa miyanakanyu ka wena uyivula hi nomo wa wena, hikuva loko yili jondzo leyi yohambuka, hayitiva lesvaku ya yaliwa hinkwaku.”

²³ Vamuvekela siku, kutani vata ka yena na vali vanyinginyana, ka yindlo leyi aatshama ka yona. Pawulo avahlamusela ta Mfumu wa Xikwembu, atitiyisa hi vumboni bza yena; aringeta ni kuvakombisa ta Yesu, hi kuvula Nawini wa Moxe, ni ka vaprofeta, avulavula kusukela ni mixo kuyafika nimajambu.

²⁴ Van'wana vakholwisiwa hi marito ya Pawulo; kambe van'wana vayala kupfumela.

²⁵ Vasuka na vangatwanananga, ndzhaku ka loko Pawulo avabzelile rito rin'we leringe: Moya Wokwetsima wuvulile hakunene, loko wuvulavulile ni vatatana va hina hi nomo wa muprofeta Ezaya, wuku:

²⁶ Famba uyabzela vanhu lava uku: Kutwa mitatwa, kambe amingatwisisi, kuvona mitavona, kambe amingavonisisi!

²⁷ Timbilu ta vanhu lava titlanyalile, vatipfale tindleve ni mahlo, lesvaku vangahavoni, nikutwa vangahatwi, hambi kuli kutwisisa vangahatwisisi, ni lesvaku vangahundzuki, na mina ningavahanyisi.

²⁸ “Loko svilitano, svitiveni lesvaku mahungu ya kuponisiwa hi Xikwembu marhumeliwile ka vamatiko; vona vatamayingisa.”

²⁹ [Kuteloko Pawulo avabzelile svosvo, Vayuda vafamba na vaphikizana hi matimba.]

³⁰ Pawulo ahetile malembe mambirhi Roma, na ali ka yindlo leyi, aahumesa male kutshama ka yona, ayamukela hinkwavu lavataka ka yena;

³¹ aapaluxa Mfumu wa Xikwembu, ajondzisa ta Hosi Yesu Kriste na angachavi nchumu, nasvona angasiveliwi hi nchumu.