Timhaka 27 - Testamente Leyimpsha Xichangana

Ta Pawulo loko aya Roma hi ngalawa

¹ Kuteloko kutsemiwile lesvaku hitaya le Italiya hi ngalawa, vanyiketa Pawulo ni vabohiwa van'wana ka ndhuna ya dzana ra masochwa lweyi avaku i Xjuliyo, wa ntlawa lowuvuliwaka “wa hosi leyikulu”.

² Kuteloko hi nghenile ngalaweni ya kuhuma Adramita, leyi ayifanela kukongoma matlhelo ya tiko ra Aziya, hisuka na Aristarka wa le Thesalonika, tikweni ra Makedoniya.

³ Hi siku leritlhantamaka, hifika Sidoni; kutani Xjuliyo ayendlela Pawulo timpsalu, amupfumelela kuyavona vanakulobze ni kulongeleliwa hi vona.

⁴ Xilesvo hisuka kona, hifamba na hisirheleliwa hi xihlale xa Kipra, hikuva ngalawa ayisiveliwa hi moya lowukulu.

⁵ Kuteloko hipelile lwandle ra Kilikiya ni ra Pamfiliya, hifika Mira, tikweni ra Likiya.

⁶ Kutani ndhuna yikuma kona ngalawa ya kuhuma le Alexandriya leyi yiyaka le Italiya, kutani ahinghenisa ka yona.

⁷ Hi masiku lamanyingi hifamba hi kunonoka, kutani svihikarhatela svinene kufika kusuhi na Kinida; lesvi moya wukulu awuhisivela kuya mahlweni tlhelweni lero, higega xihlale xa Kreta hi le hansi, hi tlhelo ra Salmona.

⁸ Kuteloko hi lulamile ni ribuwa hi kukarhateka svinene, hifika ndhawini leyi vange i “Hlaluko rosaseka”, kusuhi ni doropa ra Laziya.

⁹ Hi heta masiku layotala kona, kukondza kufika nkama lowu svichavisaka kufamba lwandle, hikuva siku lerikulu ra kutitsona svakuja alihundzile. Hi loko Pawulo avatsundzuxa,

¹⁰ aku: “Vavanuna, nasvivona lesvaku riyendzo leri ritava ni mhangu ni kulahleka lokukulu, kungali ka mindzhwalu ni ka ngalawa ntsena, kambe ni ka vutomi bza hina.”

¹¹ Hambi svilitano, ndhuna ya dzana ra masochwa yiyingisa mufambisi wa ngalawa ni n'winyi wa yona kutlula lesvivuliwaka hi Pawulo.

¹² Lesvi hlaluko leri aringalulamelanga kuheta vuxika ka rona, lavanyingi va hina vapimisa kusuka kona ni kuringeta kuyaxwa vuxika le Fenikisi, anga hlaluko ra Kreta, lerilangutanake ni vupelajambu wa dzonga ni vupelajambu wa n'walungu.

Ta xidzedze lwandle

¹³ Kuteloko mheho ya le dzongeni yisungulile kuhunga khwatsi, vapimisa lesvaku makungu ya vona matayendleka, kutani vasuka, valulama ni ribuwa ra Kreta.

¹⁴ Kambe kungali kungani, kupfuka, xihlaleni, mheho leyi vange i Ewuroakilawu.

¹⁵ Ngalawa yikhomiwa hi mheho, yitsandzeka kuyihlula, kutani hiyitshika yikokiwa hi mati.

¹⁶ Kuteloko hihundzile dzongeni wa xihlalenyana xin'wana lexi vange i Kawuda, hikoka bzatsu hiringhenisa ngalaweni hi kukarhateka svinene;

¹⁷ loko vatluti vayikokile, valungisa bzatsu hi kuriboha hansi hi magoda; kutani hi kuchava kukhinsa saveni ra Siriti, vaphutsa matsanga, kutani hi mukhuva wolowo vatlhela vakokiwa hi magandlati.

¹⁸ Loko rixa, ahibiwa ngopfu hi xidzedze; hi kolaho vacukumeta mindzhwalu ya ngalawa lwandle.

¹⁹ Kutani hi siku ra vunharhu, hicukumeta svigotso sva ngalawa lwandle, hi mavoko ya hina.

²⁰ Hi masiku lamanyingi jambu aringahavoneki, hambi tinyeleti; xidzedze axiya mahlweni xihiba hi matimba, hingahalanguteli nikutsongo lesvaku hitapona.

²¹ Lesvi akuli khale na vangajanga nchumu, Pawulo ayima xikarhi ka vona, aku: “Loko aminiyingisile, vavanuna, mingasukanga Kreta, ingi mhangu leyi ni kulahleka loku svingahumelelanga.

²² Kambe svosvi na mikhongotela lesvaku mitiyisa timbilu, hikuva aku na munhu ka n'wina lweyi angatalahlekeliwa hi vutomi bza yena; i ngalawa ntsena leyingatalova.

²³ Ntsumi ya Xikwembu lexi ninga nandza wa xona, lexi nixigandzelaka, yitikombisile ka mina vusikwini lebzi,

²⁴ yiku: ‘Pawulo, ungatshuki uchava, hikuva ufanele kuyayima mahlweni ka Khezari; kutani tiva lesvaku Xikwembu xikunyikile vanhu hinkwavu lavafambaka na wena ngalaweni, lesvaku uvaponisa.’

²⁵ Hikolaho vavanuna, tiyisani timbilu, hikuva ni ni kutshemba ka Xikwembu lesvaku svitava hilaha nibzeliweke hakona.

²⁶ Ntsena hitaya hiyacukumetiwa xihlaleni xin'wana.”

Ta ngalawa loko yitshoviwa hi magandlati

²⁷ Abzili vusiku bza vukhume ni mune, na hidlitadliteka lwandle ra Adriya; xikarhi ka vusiku vatluti vapimisa lesvaku hitshinelelile kusuhi ni ribuwa rin'wana.

²⁸ Loko vapima kuyeta ka mati, vakuma mpimo wa makume mambirhi ya mametru; mahlweninyana vatlhela vapima, vakuma mpimo wa khume ya mametru ni ntlhanu.

²⁹ Kutani hi kuchava kuyaba maribze ya le ribuweni, vahoxa mune wa tinsoma nyalweni; kutani valangutela kuxa.

³⁰ Kambe vatluti vona, varingeta kubaleka vahuma ngalaweni; vayehlisa bzatsu lwandle, vayendla wonge hi loko valava kuyahoxa tinsoma ankondzweni wa ngalawa.

³¹ Kutani Pawulo aku ka ndhuna ni ka masochwa: “Loko vanhu lava vangatshami ngalaweni, amingaponi.”

³² Hi loko masochwa matsema magoda ya bzatsu, maritshika riwela matini.

³³ Kuteloko riya kuxeni, Pawulo avakhongotela hinkwavu kuja svakuja, aku: “Namuntlha i siku ra vukhume ni mune, na mili karhi milangutela ntsena, mititsona mingaji nchumu.

³⁴ Na mikhongotela kuja xanchumu; svalaveka, loko mirhandza kupona; hikuva aku na ni mun'we wa n'wina lweyi angatalahlekeliwa hi nsisi wa nhloko ya yena hambi wuli wun'we.”

³⁵ Loko avulile svosvo, ateka xinkwa, akhensa Xikwembu mahlweni ka vona hinkwavu, akhema, asungula kuja.

³⁶ Kutani hinkwavu vatiyisa timbilu, vaja svakuja na vona.

³⁷ Loko kuhlayiwa hinkwavu lava avali ngalaweni, kukumeka lesvaku ahili vanhu va madzana mambirhi ni ntlhanu wa makume na makume mambirhi ni ntlhanu na mun'we (276).

³⁸ Loko vahetile kuja vaxurhile, vavevukisa ngalawa hi kucukumeta ndzhwalu wa trigu lwandle.

³⁹ Loko bzixile, vatluti avativanga tiko rakona lesvaku hi rihi; kambe loko vavona nsonga lowunga ni ribuwa, valava kuyisa ngalawa kona, loko vasvikota.

⁴⁰ Kuteloko vatsemile tinsoma, vatitshika tiwela lwandle, na vali karhi vatshunxa machini ya svihendzulu; kutani vagwimba maseyila ya le nkondzweni, varhiya moya, vakongoma ribuweni.

⁴¹ Kambe vayaba xidulu xa sava matini, kutani ngalawa yikhisa kona; nkondzo wa yona wukhomiwa hansi, wungahatsekatseki; kambe nyalo yisungula kutshoviwa hi matimba ya magandlati.

⁴² Hi loko masochwa matilungisela kudlaya vabohiwa, hi kuchava lesvaku mun'we wa vona angatshuka abaleka hi kuhlambela matini.

⁴³ Kambe ndhuna yilava kuponisa Pawulo, kutani yisivela masochwa kuyendla svosvo; yilerisa lesvaku hinkwavu lavativaka kuhlambela, varhanga vatihoxa matini, vayahumelela saveni;

⁴⁴ van'wana yivabzela kutipfuna hi timhandze, van'wana hi mapulangu ya ngalawa; kutani hi mukhuva wolowo vafika ribuweni na vaponile hinkwavu.