Timhaka 26 - Testamente Leyimpsha Xichangana

Ta Pawulo loko atihlamulela mahlweni ka Agripa

¹ Kutani Agripa aku ka Pawulo: “Hakupfumelela kuvulavula, uhibzela ta wena hi wexe.” Hi loko Pawulo atlakusa voko, atihlamulela, aku:

² “Wena hosi Agripa, timhakeni hinkwatu leti nimangaleliwaka hi tona hi Vayuda, nititwa na nikatekile loko nipfumeleliwa kutihlamulela mahlweni ka wena namuntlha;

³ nkateko wakona ngopfungopfu hi lesvaku wena utiva svinene mikhuva hinkwayu ya Vayuda, ni svimhakamhakana sva vona. Hikolaho nikombela hi matimba lesvaku uniyingisa ungaheli mbilu.

⁴ “Vayuda hinkwavu vativa ta kuhanya ka mina kusukela avutsongwaneni bza mina, vativa ni lesvi ningasviyendla tikweni ra lekwerhu ni le Yerusalema, kusukela kusunguleni.

⁵ I khale na vanitiva, kutani vangahumesa vumboni, loko vasvilava, lesvaku nihanyile na nili wa ntlawa lowu wungani milawu ya kutiya kutlula mintlawa yin'wana hinkwayu, avukhongelini bza ka hina, hi lesvaku ntlawa wa Vafarisi.

⁶ Kutani svosvi ni le kuthethisiweni hikuva nilangutela xitshembiso lexi vatatana vanyikiweke xona hi Xikwembu;

⁷ hi xona xitshembiso lexi rixaka ra ka hina ra khume na timbirhi rilanguteleke kuhetiseka ka xona rili karhi ritiyisela kugandzela Xikwembu vusiku ni nhlekanhi; wena hosi, nimangaleliwa hi Vayuda hikolaho ka kulangutela koloko.

⁸ N'wina Vayuda, xana mitsandzeka ha yini kupfumela lesvaku Xikwembu xingapfuxa vafi ke?

⁹ “Na mina khale, anipimisa lesvaku nifanele kulwa svinene ni vito ra Yesu wa Nazareta.

¹⁰ Hi svona lesvi ningasviyendla Yerusalema. Hi matimba lawa Vaprista lavakulu avaninyikile wona, ni khomile lavanyingi xikarhi ka vahlawuliwa va Xikwembu, ni vapfalela jele; loko vatsemeliwa rifu, aniyala kuyima na vona.

¹¹ Nivabile kanyingi masinagogeni hinkwawu, niringeta kusindzisa lesvaku vayala ndlela ya vona. Anivanyenya ngopfu, nikondza niyavaxanisa ni le madoropeni ya le handle.

Pawulo ahlamusela ta kuhundzuka ka yena

¹² “Aniyela svona le Damaska, na nili ni matimba ya Vaprista lavakulu ni svileriso sva vona.

¹³ Anili ndleleni hi nkarhi wa nhlekanhi, wena hosi, kutani nivona kuvonakala loku kutlulaka ka jambu, kuhuma tilweni, kunirhendzela svin'we ni lava avafamba na mina.

¹⁴ Hi wela hansi hinkwerhu; kutani nitwa rito leringe ka mina hi ririmi ra Xiheberu: ‘Sawulo, Sawulo, unixanisela yini? Svanonon'hwa ka wena kukhadlanya xisungunhu.’

¹⁵ Mina niku: ‘U mani, Hosi?’ Hosi yihlamula yiku: ‘Hi mina Yesu, lweyi umuxanisaka.

¹⁶ Svosvi pfuka, uyima, utiya hi milenge; nitikombisile ka wena hikuva nitakuveka kuva mutirhi wa mina; utava mboni ya svilo lesvi ukoteke kunivona ha svona, ni ya lesvi nahalavaka kutikomba ka wena hi svona;

¹⁷ nitakuponisa mavokweni ya vanhu va tiko leri ni ya vamatiko lava nikurhumelaka ka vona;

¹⁸ utapfula mahlo ya vona lesvaku vahuma munyameni, vanghena kuvonakaleni, ni lesvaku vahuma kufumeni ka Sathana vanghena ka Xikwembu; loko vapfumela ka mina, vatakuma kurivaleliwa ka svijoho, kutani vatayaveliwa ndzhaka xikarhi ka vahlawuliwa va Xikwembu.’

Pawulo ahlamusela ta ntirho wa yena

¹⁹ “Hikolaho, wena hosi Agripa, aniyalanga kuyingisa mahlori lawa mahumaka tilweni.

²⁰ Nisungulile hi va le Damaska ni va le Yerusalema, ni ya mahlweni tikweni hinkwaru ra Yudeya, ni le ka vamatiko, na nivakhongotela kuhundzuka, vatlhelela ka Xikwembu, kutani vatirha mintirho leyifambelanaka ni kuhundzuka ka vona.

²¹ Hi tona timhaka leti Vayuda va ni khomeleke tona Tempeleni, varingeta kunidlaya.

²² Kambe nipfuniwile hi Xikwembu kufikela siku ra namuntlha, kutani svosvi niyimile kola na nili karhi nihumesa vumboni ka lavatsongo ni ka lavakulu; anivuli timhaka tin'wana, loko tingali leti Moxe ni Vaprofeta vangavula lesvaku titahumelela:

²³ Hi lesvaku Mesiya atatwisiwa kuvaviseka, ni lesvaku, hikuva munhu worhanga lweyi angatapfuka kufeni, atativisa kuvonakala ka tiko leri ni ka vamatiko.”

Pawulo akhongotela Agripa kupfumela

²⁴ Pawulo aku ahatihlamulela hi timhaka teto, Fexto atlakusa rito, aku: “Wahlanya Pawulo; vutivi lebzikulu bza wena bza kuhlanyisa.”

²⁵ Pawulo aku: “Anihlanyi, wena Fexto lweyi uchavisekaka, kambe marito lawa nimavulaka i marito ya ntiyiso, marito lamatwalaka;

²⁶ hosi yitiva svinene timhaka leti, kutani nitivula mahlweni ka yona na ningachavi nchumu; anikholwi lesvaku ni yin'we ya tona yingava yifihleliwe hosi, hikuva atihumelelanga xihundleni.

²⁷ We hosi Agripa, xana upfumela vaprofeta ke? Nasvitiva lesvaku wa vapfumela.”

²⁸ Agripa aku ka Pawulo: “Uringeta kunikhongotela, hi nkamanyana wungali wungani, lesvaku nihanya xikriste!”

²⁹ Pawulo aku: “Hambi loko nkama wukomile, hambi loko wulehile, nikhongela Xikwembu lesvaku kungavi wena ntsena kambe ni hinkwavu lava vaniyingisaka namuntlha, miva tani hi mina, handle ka machini lawa.”

³⁰ Hi loko hosi yisuka yiyima; na yena Fexto, svin'we na Bernike ni lavatshameke na vona, vasuka vayima.

³¹ Kutani loko vahumile, vabzelana vaku: “Munhu lweyi angayendlanga nchumu lowufanekeliweke hi rifu kumbe jele.”

³² Kutani Agripa aku ka Fexto: “Munhu lweyi, loko ingi anga kombelanga kuthethisiwa hi Khezari, aatatshunxiwa.”