Timhaka 25 - Testamente Leyimpsha Xichangana

Ta Pawulo loko akombela kuthethisiwa hi Khezari

¹ Loko Fexto afikile tikweni lero, atshama masiku manharhu Khezariya, kutani asuka, atlhantukela Yerusalema.

² Kuteloko Vaprista lavakulu ni vakulukumba va Vayuda vata mahlweni ka yena vatamangalela Pawulo;

³ vakhongela Fexto lesvaku avapfuna hi kurhumela Pawulo Yerusalema, kasi avabohile makungu ya kumudlaya ndleleni.

⁴ Kambe Festo avahlamula aku: “Pawulo a le jele Khezariya; na mina nitahantla ni tlhelela kona.”

⁵ Atlhela aku: “Hambi svilitano, lavanga vakulukumba xikarhi ka n'wina avangirimele na mina; loko wanuna lweyi akumeka na ali ni nandzu wun'wana, vatamumangalela.”

⁶ Fexto axwa na vona masiku lawa mangatluliki khume, kumbe ntlhanu ni manharhu, kutani angirimela aya Khezariya. Hi siku leritlhantamaka, atshama hubzeni, kutani alerisa lesvaku Pawulo atisiwa.

⁷ Loko afikile, Vayuda lavahumaka Yerusalema vamurhendzela, kutani vamulumbeta hi milandzu leyinyingi, leyochavisa, leyi vatsandzekaka ni kuhumesa vumboni bza yona.

⁸ Kutani Pawulo atihlamulela, aku: “Anijohelanga Nawu wa Vayuda, kumbe Tempele, kumbe Khezari.”

⁹ Kambe Fexto aanavela kutsakisa Vayuda; hi kolaho ahlamula Pawulo, aku: “Xana ulava kutlhantukela Yerusalema, uyathethisiwa kona mahlweni ka mina hikolaho ka timhaka leti ke?”

¹⁰ Pawulo aku: “Niyimile hubzeni ya Khezari; hi kona laha nifanelaka kuthethisiwa kona; loko vali Vayuda, anivajohelanga, hilaha usvitivaka hakona na wena.

¹¹ Hambi svilitano, loko nijohile, kumbe loko niyendlile svin'wana lesvifanekeliwaka hi rifu, aniyali kufa, kambe loko kungali ni ntiyiso milandzwini leyi vanimangalelaka ha yona, aku na munhu lweyi anga ni nyiketaka ka vona; nikombela kuthethisiwa hi Khezari.”

¹² Kutani loko Fexto avulavulile mhaka ni huvu, ahlamula aku: “Akombelile kuthethisiwa hi Khezari, ataya le ka Khezari.”

Ta Pawulo loko atisiwa mahlweni ka Agripa na Bernike

¹³ Loko kuhundzile masiku mangali mangani, hosi Agripa na Bernike vata Khezariya kutaxeweta Fexto.

¹⁴ Loko vaxwile kona masiku lamanyinginyana, Fexto ayandlalela hosi timhaka ta Pawulo, aku: Ku ni munhu kola, lweyi Felikisi angamutshika jele.

¹⁵ Loko nili Yerusalema, Vaprista lavakulu ni vakulukumba va Vayuda vamumangalele ka mina, vakombela lesvaku athethisiwa.

¹⁶ Nivahlamulile, niku: Ahi ntolovelo wa Varoma kunyiketa munhu lweyi angamangaleliwa, hambi ali mani na mani, loko angasungulanga hi kuhumelela mahlweni ka vamangaleli va yena, anyikiwa nkama wa kutihlamulela ka lesvi vamumangalelaka ha svona.

¹⁷ Hikolaho loko vafikile hinkwavu halenu, anihlwelanga, niyile niyatshama hubzeni hi siku leritlhantamaka, kutani nilerisa lesvaku wanuna yelweyo atisiwa.

¹⁸ Kutani loko vamangaleli va yena vasuka vayima vavulavula, avahumesanga ni mhaka ni yin'we leyobiha leyi aniyanakanya lesvaku kumbexana vatayihumesa;

¹⁹ avakanetana na yena hi ta vukhongeli bza ka vona ni ta kufa ka munhu mun'we lweyi avaku i Yesu, lweyi Pawulo aavula lesvaku wahanya.

²⁰ Lesvi ningavonangiki svinene ndlela yonghena timhakeni leti, nivutisile Pawulo niku: “Xana ulava kuya Yerusalema, uyathethisiwa kona timhakeni leti ke?”

²¹ Kambe Pawulo akombelile kusala jele arindziwa kona, kufika loko mhaka ya yena yitsemiwa hi hosi leyikulu; hi kolaho nilerisile lesvaku arindziwa jele kufikela siku leri ningatamurhumela ka Khezari ha rona.

²² Kutani Agripa aku ka Fexto: “Na mina anitarhandza kutwa munhu lweyi.” Fexto aku: “Mundzuku kunene utamutwa.”

²³ Hi siku leritlhantamaka Agripa na Bernike vata hi vuhosi lebzikulu; vanghena hubzeni ni vafambisi vakulu va masochwa ni vakulukumba va doropa; Fexto alerisa lesvaku Pawulo atisiwa.

²⁴ Hi loko Fexto aku: “Hosi Agripa, na n'wina hinkwenu vavanuna minga na hina kola! Mamuvona, munhu lweyi ntshungu hinkwawu wa Vayuda wungamumangalela ka mina, hambi le Yerusalema, hambi halenu; avahuwelela vaku: ‘Afanela kudlayiwa!’

²⁵ Loko ali mina, nikumile lesvaku anga na nandzu lowu afanelaka kutsemeliwa rifu ha wona; nasvona yena akombelile kuthethisiwa hi hosi leyikulu; hi kolaho nitsemile mhaka hi kuvula lesvaku afanele kurhumeliwa ka yona.

²⁶ Hambi svilitano, a ni na mhaka ya kutiya leyi ningatsalelaka hosi ha yona; kutani nimutisile ka n'wina ngopfungopfu ka wena hosi Agripa, lesvaku timhaka ta yena tikambisisiwa, niva ni lesvi ningatatsala svona.

²⁷ Hikuva nivona lesvaku asvitwali kurhumela munhu lweyi abohiweke, loko kungahlayiwi timhaka leti amangaleliwaka ha tona.”