Timhaka 24 - Testamente Leyimpsha Xichangana

Ta nandzu lowu Pawulo amangaleliwaka ha wona

¹ Loko kuhundzile ntlhanu wa masiku, Ananiya Muprista lwenkulu angirimela, ni vakulukumba van'wana ni muyimeli mun'we leyi avaku i Tertulo; kutani vaya ka hosi kuyamangalela Pawulo.

² Vavitana Pawulo, kutani Tertulo asungula kumumangalela, aku: “Wena Felikisi lweyi achavisekaka! Lesvi hikumeke kurhula loku kuhetisekeke hikolaho ka wena, ni lesvi timhaka ta tiko leri tilulamisiwaka namuntlha hi kutikarhata ka wena,

³ hina hiyamukela svilo lesvi hi kukhensa lokukulu hinkwaku ni minkama hinkwayu.

⁴ Kambe anilavi kukuhetela nkama; hi kolaho na kukhongela lesvaku, hi vunene bza wena, wanga hi lombanyana tindleve nkamanyana.

⁵ Hi kumile lesvaku munhu lweyi avanga mpfilumpfilu. Apfuxa madzolonga xikarhi ka Vayuda hinkwavu lavayakeke kwihi na kwihi misaveni; hi yena lweyi anga nhloko ya jondzo leyohambuka ya Vanazareta.

⁶ Nasvona, aringetile kunyamisa Tempele. Himukhomile, [kutani ahilava kumuthethisa hi nawu wa hina;

⁷ kambe Lisiya, mufambisi wa masochwa, atile ahiwutlela yena hi matimba lamakulu,

⁸ kutani alerisile vamangaleli va yena lesvaku vata mahlweni ka wena.] Loko umuvutisisa, utatitwa hi yena, timhaka hinkwatu leti himumangalelaka ha tona.”

⁹ Na vona Vayuda vayima na Tertulo, vatiyisa, vaku: “Kunene hi svosvo.”

Ta Pawulo loko atihlamulela mahlweni ka Felikisi

¹⁰ Hosi yikoweta Pawulo lesvaku avulavula; kutani yena ahlamula, aku: “Lesvi nitivaka lesvaku ku ni malembe na uli muthethisi wa tiko leri, nitatihlamulela na nitsakile.

¹¹ Ungasvikuma hi wexe: Akusihundza masiku ya khume na mambirhi loko nifikile Yerusalema kutagandzela kona.

¹² Vayuda avanikumanga na nili lweyi aphikizanaka ni munhu Tempeleni, kumbe lweyi ahlohlotelaka vanhu masinagogeni ni le madoropeni.

¹³ Nasvona avakoti kuhumesa vumboni bza timhaka leti vanimangalelaka ha tona svosvi.

¹⁴ Anikufihleli lesvaku nitirhela Xikwembu xa vatatana hi ndlela leyi vayivulaka lesvaku yihambukile; kambe nipfumela hinkwasvu lesvitsaliweke Nawini ni ka Vaprofeta.

¹⁵ Lesvi nisvilanguteleke ka Xikwembu, hi svona lesvi na vona vasvilanguteleke: Hi lesvaku lavolulama ni lavangalulamangiki vatapfuka kufeni.

¹⁶ Hikolaho niringeta hi matimba, masiku hinkwawu, kukumeka na nili lweyi atshunxekeke moyeni wa mina, mahlweni ka Xikwembu ni le mahlweni ka vanhu.

¹⁷ “Nivuyile Yerusalema ndzhaku ka malembe lamanyinginyana, kutisa tinyiko ka tiko ra ka hina ni kuhumesa timhamba.

¹⁸ Vanikumile Tempeleni na nitirha svilo lesvi, na nili lweyi atibasiseke hi nawu; akungali na ntshungu kona, akungapfukanga dzolonga.

¹⁹ Kambe Vayuda van'wana va tiko ra Aziya avali kona. Ingi vatile svosvi mahlweni ka wena kutani mangalela, loko kuli ni mhaka xikarhi ka vona na mina.

²⁰ Na vona lavanga kola avavule xiyendlo lexobiha lexi vaxikumeke ka mina, siku leri niyimeke hubzeni;

²¹ vangavula xilo xin'we ntsena lexininga huwelela ha xona xikarhi ka vona, loko nite: ‘Nibihisiwa hi n'wina namuntlha hikolaho ka kupfuka ka vafi.’”

Ta Pawulo loko asiyiwa jele

²² Lesvi Felikisi aativa lesvotalanyana hi tlhelo ra Ndlela ya Hosi, apfala huvu, aku: “Loko Lisiya, mufambisi wa masochwa, atava angirimelile afika halenu, hi kona ningatakambisisa mhaka ya n'wina.”

²³ Kutani alerisa ndhuna ya dzana ra masochwa kuhlayisa Pawulo jele, aku: “Mi munyika kutshunxekanyana, mingasiveli ni mun'we wa vanakulobze kutamupfuna hi svin'wana.”

²⁴ Loko kuhundzile masiku mangali mangani, Felikisi ata na Drusila, nsati wa yena lweyi aali Muyuda; kuteloko avitanile Pawulo, amuyingisela loko avulavula hi ta kupfumela ka Yesu Kriste.

²⁵ Kambe loko Pawulo avulavula hi ta kululama, ni ta kutikhoma, ni ta kuthethisiwa lokungatata, Felikisi akhomiwa hi kuchava, ahlamula, aku: “Namuntlha, famba uyatshama; siku leri ningatakuma nkama, nitatlhela nikuvitana.”

²⁶ Kambe hi tlhelo rin'wana aali ni xitshembo xa lesvaku Pawulo atamunyika male; hi kolaho aatala kurhuma vanhu vayamuvitana, lesvaku atavulavula na yena.

²⁷ Kambe loko kuhundzile malembe mambirhi, Porsiyo Festo avekiwa hosi matshan'wini ya Felikisi; kasi Felikisi aasiyile Pawulo jele, hikuva aanavela kukhensiwa hi Vayuda.