Timhaka 23 - Testamente Leyimpsha Xichangana

Ta Pawulo loko ali hubzeni

¹ Pawulo ahonokela huvu, aku: “N'wina valekwerhu, nihanyile na nili lweyi atshunxekeke svinene ripfalweni ra mina ni le mahlweni ka Xikwembu, kufikela siku ra namuntlha.”

² Hi loko Ananiya Muprista lwenkulu, alerisa lava avali kusuhi na Pawulo lesvaku vamuba nomo.

³ Kambe Pawulo aku ka yena: “Xikwembu xitakuba, wena khumbi leribasisiweke, hikuva utshamile kola akuva unithethisa hi nawu, kasi utlula nawu hi kulerisa lesvaku nibiwa.”

⁴ Kutani lava avali kusuhi na Pawulo vaku: “Xana usola Muprista lwenkulu wa Xikwembu ke?”

⁵ Pawulo aku: “Vamakwerhu, aningasvitivi lesvaku i Muprista lwenkulu, hikuva kutsaliwile lesvaku: ‘Ungatshuki usandza hosi ya tiko ra lekwenu.’”

⁶ Kutani Pawulo, hi kutiva lesvaku van'wana xikarhi ka vona i Vasaduki, kasi van'wana i Vafarisi, atlakusa rito hubzeni aku: “N'wina valekwerhu, ni Mufarisi, n'wana wa Vafarisi, kutani nithethisiwa kola hikuva nilangutelile kupfuka ka vafi.”

⁷ Loko avulile svosvo, Vafarisi vasungula kuphikizana ni Vasaduki, kutani nhlengeletanu yiyavana hi le xikarhi.

⁸ (Hikuva Vasaduki vatiyisa vaku: “Vafi avapfuki, nasvona tintsumi ni mimoya asvikona.” Vafarisi vona, vapfumela svosvo hinkwasvu.)

⁹ Kutani kupfuka guwa lerikulu; Vatsali van'wana va ntlawa wa Vafarisi, vasuka vayima, vatiyisa svinene, vaku: “Ahikumi nandzu niwun'we ka munhu lweyi; xana kungava yini loko kukumeka lesvaku i moya wun'wana kumbe i ntsumi yin'wana leyivulavuleke na yena?”

¹⁰ Kuphikizana kuyakukula ngopfu, kutani ndhuna ya nyimpi yichava lesvaku Pawulo angatshuka ahandzuliwile hi vanhu lava, kutani yilerisa lesvaku ntlawa wa masochwa wungirimela, wuya muwutla mavokweni ya vona, wumutlhelisela khokholweni.

¹¹ Avusikwini lebzitlhantamaka, Hosi yitikomba ka Pawulo, yiku: “Tiyisa mbilu Pawulo, hikuva kukotisa lesvi uhumeseke vumboni lebzotiya henhla ka mina kola Yerusalema, svifanele lesvaku uhumesa vumboni lebzotano ni le Roma.”

Ta Vayuda loko vaboha makungu ya kudlaya Pawulo

¹² Loko rixa, Vayuda vayendla makungu, vatiboha hi kufunga, vaku: “Hingakala hingaji ni kunwa, loko hingasi dlaya Pawulo.”

¹³ Lava vaboheke makungu lawa avatlula mune wa makume.

¹⁴ Vaya ka Vaprista lavakulu ni ka vakulukumba, vaku: “Hitibohile hi kufunga lokutiyeke lesvaku hingakala hingaji nchumu, na hingasi dlaya Pawulo.

¹⁵ Svosvi-ke, n'wina ni vahuvo, yisani rito ka ndhuna ya nyimpi lesvaku yimirhumela Pawulo, miyendla ingi hi loko milava kuya mahlweni ni kukambisisa svin'wana timhakeni ta yena; loko ali hina, hitava hi tilungisele kumudlaya na angasifika.”

¹⁶ Kambe ntukulu wa Pawulo atwa lesvaku vamutumbelelile; hi loko afamba, aya khokholweni, ayativisa Pawulo.

¹⁷ Pawulo avitana yin'we ya tindhuna ta dzana ra masochwa, aku ka yona: “Famba ni jaha leri ka ndhuna ya nyimpi, hikuva ri ni mhaka leyi ringatayitivisa ka ndhuna.”

¹⁸ Kutani ndhuna ya masochwa yifamba ni jaha, yiriyisa ka ndhuna ya nyimpi, yiku: “Mubohiwa Pawulo anivitanile, anikombela lesvaku nita ni jaha leri ka wena; ri ni mhaka leyi ringatakubzela yona.”

¹⁹ Ndhuna ya nyimpi yikhoma jaha hi voko, yiya na rona tlhelweni, yirivutisa, yiku: “Xana hi yihi mhaka leyi ulavaka kunitivisa yona ke?”

²⁰ Jaha riku: “Vayuda vatwananile, vaku vatakukombela kutisa Pawulo hubzeni mundzuku, vatayendla ingi hi loko valava kuya mahlweni ni kuvutisisa timhaka ta yena.

²¹ Ungatshuki uvapfumelela, hikuva vavanuna lavatlulaka mune wa makume vamutumbelelile, vatibohile hi kufunga, vaku: ‘Hingakala hingaji ni kunwa, loko hingasi mudlaya.’ Ni svosvi vatilungisile, vakarhi valangutela lesvaku upfumela.”

²² Hi loko ndhuna ya nyimpi yitlhelisa jaha lero, yirilerisa, yiku: “Ungatshuki ubzela munhu lesvaku unitivisile timhaka leti.”

Ta Pawulo loko ayisiwa ka hosi Felikisi

²³ Ndhuna ya nyimpi yivitana tindhuna timbirhi ta dzana ra masochwa, yiku ka tona: “Lungisani masochwa ya madzana mambirhi (200) ni vagadi va mahanchi va ntlhanu wa makume ni makume mambirhi (70) ni vavanuna va madzana mambirhi (200) lavatamelaka matlhari, vaya Khezariya; vatasuka hi nkarhi wa ntlhanu ni mune wa vusiku.

²⁴ Nasvona lungiselani Pawulo svifuyu lesvi angatasvigada, mimufikisa ka hosi Felikisi na ahlayisekile.”

²⁵ Kutani atsala papela leringe:

²⁶ “Klawudiyo Lisiya, ka Felikisi, hosi leyichavisekaka: Xeweni!

²⁷ “Vayuda vakhomile munhu lweyi; avalava kumudlaya, kambe loko nitwile lesvaku i Muroma, nifikile ni masochwa, nimuwutla mavokweni ya vona.

²⁸ Kutani hi kulava kutiva lexi vamumangalelaka ha xona, ni muyisile hubzeni ya ka vona;

²⁹ nikumile lesvaku vamumangalela hi timhaka ta nawu wa vona, na kungali na nandzu lowu afanekeliwaka kutsemeliwa rifu ha wona, kumbe kubohiwa ha wona.

³⁰ Kutani loko nitivisiwile lesvaku Vayuda vatatumbelela munhu lweyi, ni murhumelile ka wena; ni lerisile vamangaleli va yena lesvaku vahlamusela timhaka ta yena mahlweni ka wena.”

³¹ Masochwa mayendla hilaha ma lerisiweke hakona: Mateka Pawulo, ma muyisa le Antipateri nivusiku.

³² Loko rixa, masiya vagadi va mahanchi kolaho, vahundzela mahlweni na Pawulo; kutani masochwa matlhelela khokholweni.

³³ Loko vagadi vafikile Khezariya, vanyika hosi apapela, kutani vatisa Pawulo mahlweni ka yona.

³⁴ Hosi yihlaya papela, kutani yivutisa Pawulo lesvaku i wa tiko rihi. Loko yitwile lesvaku i wa Kilikiya,

³⁵ yiku: “Nitakuyingisa loko vamangaleli va wena vatava vafikile na vona.” Kutani yilerisa lesvaku Pawulo ahlayisiwa ndlwini ya vuhosi ya Heroda.