Timhaka 22 - Testamente Leyimpsha Xichangana

Ta kutihlamulela ka Pawulo

¹ “N'wina valekwerhu na vatatana, yingisani svosvi kutihlamulela ka mina mahlweni ka n'wina.”

² Loko vatwa lesvaku avulavula na vona hi ririmi ra Xiheberu, vamiyela kutlula kusunguleni, kutani Pawulo aku:

³ “Mina ni Muyuda; nivelekiwile Tarso wa Kilikiya, kambe ni kulele doropeni leri, na nili mujondzisiwa wa Gamaliyele. Nijondzisiwile Nawu wa vatatana hi mukhuva lowunene, na nili munhu lweyi ahisekelaka Xikwembu, kufana na n'wina hinkwenu namuntlha;

⁴ nixanisile lavalandzaka Ndlela leyi ya Hosi kufikela laha vadlawaka. Anikhoma vavanuna ni vavasati, nivaghenisa jele.

⁵ Timboni ta mina hi yena Muprista lwenkulu, ni nhlengeletanu hinkwayu ya vakulukumba. Niyamukelile ka vona mapapela lamatsaleliweke Vayuda va ka hina le Damaska; niyile kona kuyakhoma lavayakeke kona, nivatisa Yerusalema lesvaku vatabiwa svinene.

Ta Pawulo loko ahlamusela kuhundzuka ka yena

⁶ “Kutani loko nahafamba, na nili kusuhi ni le Damaska, hi nkarhi wa nhlekanhi, hi nomo-lo nirhendzeliwa hi kuvonakala lokukulu na kuhuma tilweni.

⁷ Niwela hansi, kutani nitwa rito leringe ka mina: ‘Sawulo, Sawulo, unixanisela yini?’

⁸ Mina nihlamula niku: ‘U mani, Hosi?’ Aku ka mina: ‘Hi mina Yesu wa Nazareta, lweyi umuxanisaka.’

⁹ Lava avali na mina avavona kuvonakala, kambe avangatwi rito ra lweyi avulavulaka na mina.

¹⁰ Kutani niku: ‘Hosi, nitayendla yini xana?’ Hosi yiku ka mina: ‘Pfuka uyima, uya Damaska; hi kona laha ungatabzeliwa hinkwasvu lesvi ufanelaka kusviyendla.’

¹¹ Lesvi anihluleka kuvona hikolaho ka kuhatima ka kuvonakala koloko, lava avali na mina vanikhoma hi voko vanikhungisa, vaniyisa Damaska.

¹² “Kona kolano, akuli ni munhu lweyi avaku i Ananiya; aali munhu wa vukhongeli, afamba hi Nawu, akhensiwa svinene hi Vayuda hinkwavu lavayakeke Damaska.

¹³ Ata ka mina, avulavula na ayimile kusuhi na mina, aku: ‘Sawulo makwerhu, tlhela uvona!’ Hi nkarhi wolowo ni tlhela nivona, ni mulanguta.

¹⁴ Kutani aku: ‘Xikwembu xa vatatana va hina xikuhlawulile lesvaku utiva kurhandza ka xona, uvona Lweyi alulameke, utwa rito lerihumaka non'weni wa yena;

¹⁵ hikuva mahlweni ka vanhu hinkwavu utava mboni ya yena kutiyisa lesvi ungasvivona ni lesvi ungasvitwa.

¹⁶ Svosvi-ke, uhlwelela yini? Suka uyima, ukhuvuliwa lesvaku ubasisiwa asvijohweni sva wena, hi kukhongela vito ra yena.’

Ta kurhumiwa ka Pawulo ka vamatiko

¹⁷ “Kuteloko nitlhelele Yerusalema, niyakhongela Tempeleni, kutani ningheniwa hi Moya;

¹⁸ nivona Hosi na yinibzela, yiku: ‘Hantlisa usuka Yerusalema, ungahlweli, hikuva vanhu vakona avangayamukeli vumboni lebzi ubzivulaka henhla ka mina.’

¹⁹ Kutani niku: ‘Hosi, vasvitiva svinene lesvaku vanhu lavapfumeleke ka wena, vanghenisiwile hi mina jele, nivaba hi tinhonga masinagogeni;

²⁰ ni siku leri kudlayiweke Stefano mboni ya wena, na mina anili kona, na nili karhi nikhensa, nihlayisa sviyambalu sva lava vamudlayaka.’

²¹ Hi loko Hosi yiku ka mina: ‘Famba, hikuva nitakurhuma kule, ka vamatiko.’”

Ta Pawulo ni ndhuna ya nyimpi ya Varoma

²² Vamuyingisela kuyafika loko ahlaya svosvo, kutani vatlakusa rito, vaku: “Munhu lweyo wo tano aasusiwe misaveni, aadlayiwe! Angafaneliwanga hi kuhanya!”

²³ Kutani vahuwelela, vadzudza sviyambalu sva vona, vatsutsuxela ntshuri henhla.

²⁴ Hi loko ndhuna ya nyimpi yilerisa lesvaku Pawulo ayisiwa khokholweni, yiku: “Aavutisiwe, abiwa hi tinhonga lesvaku nitativa mhaka leyiyendlaka lesvaku vahuwelela hi ndlela leyi, valwa na yena.”

²⁵ Kuteloko vamubohile lesvaku vatamuba, Pawulo aku ka ndhuna ya dzana ra masochwa leyi ayili kona: “Xana mapfumeleliwa kuba Muroma hi tinhonga, na angasi thethisiwa ke?”

²⁶ Loko ndhuna ya dzana yitwa svosvo, yiyabzela ndhuna ya nyimpi, yiku: “Xana awulava kuyendla yini? Munhu lweyi i Muroma.”

²⁷ Hi loko ndhuna ya nyimpi yita ka Pawulo, yiku ka yena: “Wanganibzela, xana u Muroma ke?” “Ina!” Kuhlamula Pawulo.

²⁸ Ndhuna ya nyimpi yiku: “Vuroma lebzi nibzixavile hi male leyinyingi.” Pawulo aku: “Kasi mina niyopsaliwa ka bzona.”

²⁹ Hi nomo-lo lava avatilungisela kuvutisa Pawulo ni kumuba, vamutshika; loko yili ndhuna ya nyimpi, yichava loko yitwa lesvaku Pawulo i Muroma, hikuva ayimubohile.

³⁰ Hi siku leritlhantamaka, ndhuna yilava kukuma ntiyiso mhakeni ya nandzu lowu Vayuda vamangalelaka Pawulo ha wona; hi kolaho, yimutshunxa, kutani yilerisa lesvaku Vaprista lavakulu vahlengeletana ni huvu hinkwayu ya Sanedri; kutani yitisa Pawulo, yimuyimisa mahlweni ka vona.