Timhaka 21 - Testamente Leyimpsha Xichangana

Ta riyendzo ra Pawulo roya Yerusalema

¹ Kuteloko hihambanile na vona, hinghena ngalaweni, hifamba hingarhendzeleki, hiyafika Kosi; loko rixa, hifika Roda, kutani hihundzela mahlweni hiyafika Patara.

² Kona hikuma ngalawa leyi ayiya Fenisiya, kutani hinghena ka yona, hisuka.

³ Loko hifika laha kulangutaneke ni xihlale vokweni ra ximatsi, hikongoma Siriya, kutani hifika Tiro, hikuva hi kona laha ngalawa ayifanele kuhumesa mindzhwalu ya yona kona.

⁴ Kuteloko hikumanile ni vajondzisiwa, hixwa na vona masiku ya ntlhanu ni mambirhi. Vona vatsundzuxa Pawulo hi matimba ya Moya wa Xikwembu lesvaku angatshuki atlhantukela Yerusalema.

⁵ Loko hihetile masiku wolawo, hisuka hifamba; vajondzisiwa hinkwavu vahiheleketa kuyafika handle ka doropa, na vali ni vavasati ni vana; kutani hikhinsama ribuweni ra lwandle, hikhongela.

⁶ Kuteloko hisalisanile na vona, hinghena ngalaweni, kutani vona vatlhelela kaya.

⁷ Loko ali hina hiya mahlweni ni riyendzo ra hina; hisuka Tiro, hiyafika Pitolomayida, laha hi pfuxelaneke ni vamakwerhu kona, hixwa siku rin'we na vona.

⁸ Hi siku leritlhantamaka, hisuka hiyafika Khezariya; kutani hinghena kaya ka Filipi, muvhangeli, mun'we wa lava va ntlhanu ni vambirhi, hitshama ka yena.

⁹ Aali ni vana vavanhwanyana va mune lava avaprofeta.

¹⁰ Hitshamile kona masiku mangali mangani, loko kutafika muprofeta mun'we lweyi avaku i Agabo, na ahuma Yudeya.

¹¹ Ata ka hina, ateka bandi ra Pawulo, atiboha mavoko ni milenge ha rona, aku: “Moya Wokwetsima wuvula lesvi: Wanuna lweyi bandi leri ringa ra yena, Vayuda vatamubohisa xisvolesvi le Yerusalema, vamunyiketa mavokweni ya vamatiko.”

¹² Loko hitwa mhaka leyi, hina ni va njangu wolowo hikhongotela Pawulo lesvaku angatshuki atlhantukela Yerusalema.

¹³ Kambe Pawulo ahlamula, aku: “Xana miyendla yini loko mirila hi mukhuva lowu niku nitlhava mbilu ke? Kasi mina anitilungiselanga kubohiwa ntsena, kambe ni tilungisele ni kuyafela vito ra Hosi Yesu Yerusalema.”

¹⁴ Loko hivona lesvaku angapfumeli kukholwisiwa, hisvitshika, kutani hiku: “Akuyendliwe kurhandza ka Hosi!”

¹⁵ Ndzhaku ka masiku wolawo, hilonga, kutani hitlhantukela Yerusalema.

¹⁶ Vajondzisiwa van'wana va Khezariya vafamba na hina, vahifikisa njangwini wa Mnasoni, munhu wo huma Kipra, mun'we wa vajondzisiwa lavakurhanga, laha ahiya rhurheliwa kona.

Ta Pawulo loko ayendzela Yakobe

¹⁷ Kuteloko hifike Yerusalema, vamakwerhu vahiyamukela hi kutsaka.

¹⁸ Hi siku leritlhantamaka, Pawulo aya na hina ka Yakobe, kutani vakulukumba hinkwavu vahlengeletana kona.

¹⁹ Pawulo avaxeweta, avarungulela hinkwasvu lesvi Xikwembu xisviyendleke xikarhi ka vamatiko hi kutirha ka yena.

²⁰ Loko vatwa timhaka toleto, vadzunisa Xikwembu; kutani vaku ka Pawulo: “Wasvivona, makwerhu, lesvaku ku ni madzanadzana ya vanhu lavapfumeleke xikarhi ka Vayuda; hinkwavu i vanhu lavahisekelaka Nawu;

²¹ vabzeliwile ta wena, ni lesvaku ujondzisa Vayuda hinkwavu lavayakeke xikarhi ka vamatiko kutshika Nawu wa Moxe, vangahayimbisi vana va vona, nasvona vangahafambi hi mikhuva yaka hina.

²² Kutani, hitayendla yini xana? Hikuva loko kuli kusvitwa, vatasvitwa lesvaku ufikile.

²³ Loko svilitano, yendla lesvi hikubzelaka svona. Hi ni vavanuna vamune kola, lavatiboheke hi kufunga;

²⁴ famba na vona, utibasisa na vona, uvahakelela lesvilavekaka, lesvaku vatakota kubzevuliwa tinhloko; kutani hinkwavu vatativa lesvaku akutiyanga ni mhaka ni yin'we ya leti vangabzeliwa tona hi tlhelo ra wena, kambe vatativa lesvaku na wena ulandza Nawu, ni lesvaku wawu hlayisa.

²⁵ “Loko vali vamatiko lavapfumeleke, hivatsalelile papela kuvabzela lesvi hisviboheke: Hi lesvaku vativonela, vangaji tinyama letitlhaveliweke svikwembu sva hava, vangaji ngati kumbe lesvi vanhu vasvidlayeke hi kusvitlimba minkolo, vatshika ni vugelegele.”

²⁶ Hi loko Pawulo ateka vavanuna volavo; hi siku leritlhantamaka atibasisa na vona, kutani anghena Tempeleni kuyativisa lesvaku masiku ya kutibasisa ka vona matahela rini, ni lesvaku kutahumesiwa rini timhamba ta mun'wana ni mun'wana wa vona.

Ta kukhomiwa ka Pawulo Tempeleni

²⁷ Loko masiku ya ntlhanu ni mambirhi mali kusuhi nikuhela, Vayuda vakuhuma tikweni ra Aziya vavona Pawulo Tempeleni, kutani vapfuxa mpfilumpfilu vanhwini hinkwavu, vamukhoma,

²⁸ vahuwelela, vaku: “Vavanuna Vaisrayele, hipfuneni! Munhu lweyi ajondzisaka vanhu hinkwavu, matikweni hinkwawu, kuyala tiko ni Nawu ni ndhawu leyi, hi yena lweyi! Nasvona anghenisile Vagirika Tempeleni, anyamisa ndhawu leyi ya kuhlawuleka.”

²⁹ Avavula svosvo hikuva avavonile Trofimo wa Efesa doropeni, na ali na Pawulo, kutani avapimisa lesvaku Pawulo amunghenisile Tempeleni.

³⁰ Doropa hinkwaru riyendla mpfilumpfilu, vanhu vata hi kutsutsuma ndhawini yin'we; loko vakhomile Pawulo, vamukokela handle ka Tempele; kutani svipfalu svipfaliwa hi kuhantlisa.

³¹ Loko vali karhi varingeta kudlaya Pawulo, ndhuna ya nyimpi yitwa lesvaku kupfukile mpfilumpfilu doropeni hinkwaru ra Yerusalema.

³² Hi nomo-lo yiteka ntlawa wa masochwa ni tindhuna ta wona, yita ntshungwini hi kutsutsuma; loko vanhu vavona ndhuna ya nyimpi ni masochwa, vatshika kuba Pawulo.

³³ Hi loko ndhuna ya nyimpi yikongoma Pawulo, yimukhoma, yilerisa lesvaku abohiwa hi machini mambirhi; kutani yivutisa yiku: “Munhu lweyi i mani xana? Ayendlile yini ke?”

³⁴ Van'we xikarhi ka ntshungu vaba huwa vavula svin'we, van'wana vavula svin'wana; kutani lesvi ndhuna ayitsandzeka kukuma ntiyiso wakona hikolaho ka pongo, yilerisa lesvaku Pawulo ayisiwa khokholweni.

³⁵ Loko vafikile “svikadeni” sva rona, masochwa marhwala Pawulo, hikuva ntshungu awukwatile ngopfu;

³⁶ vanhu lavanyingi avavalandza hi le ndzhaku, na vahuwelela, vaku: “Mudlaye!”

³⁷ Loko Pawulo ali kusuhi ni kunghenisiwa khokholweni, aku ka ndhuna: “Xana ningava ni rito na wena ke?” Ndhuna yiku: “Kasi utiva ririmi ra Xigirika xana?

³⁸ Xana ahi wena Mugibita lweyi apfuxeke mpfilumpfilu masiku lamahundzeke, ni kuyisa mananga ntlawa wa vadlayi lava avaringana mune wa makhulu (4 000) ke?”

³⁹ Pawulo aku: “Mina ni Muyuda wa le Tarso tikweni ra Kilikiya; ni wa doropa leritivekaka svinene; nikombela lesvaku unipfumelela kuvulavula ni tiko.”

⁴⁰ Ndhuna yimupfumelela, kutani Pawulo ayima svikadeni, akwehleta vanhu hi voko. Kuteloko vamiyelile vaku ntse, avulavula na vona hi ririmi ra Xiheberu, aku: