Timhaka 20 - Testamente Leyimpsha Xichangana

Ta Pawulo loko aya Makedoniya ni le Gresiya

¹ Kuteloko mpfilumpfilu yihelile, Pawulo avitana vajondzisiwa, avakhongotela, kutani asalisana na vona asuka, aya Makedoniya.

² Kuteloko atsemakanyile matiko lawa, ni loko akhongotelile vamakwavu hi marito lamanyingi, ayafika tikweni ra Gresiya;

³ atshama kona tihweti tinharhu; loko ali kusuhi ni kusuka hi ngalawa akuva aya Siriya, Vayuda vamutshama xikungu; hi kokolaho aboha makungu ya kuvuya hi le Makedoniya.

⁴ Lava avamuheleketa, avali Sopatro n'wana Piro wa le Bereya; ni va le Thesalonika Aristarka na Sekundo; na Gayo wa le Derbe; na Timotewu; na Tikiko na Trofimo lava avahuma tikweni ra Aziya.

⁵ Vavanuna volavo vahirhangela mahlweni, vaya hirindzela le Trowasi.

⁶ Loko hili hina, hisuka Filipi hi ngalawa, ndzhaku ka masiku ya nkhuvu wa Xinkwa xokala comela; hifamba ntlhanu wa masiku, hiyavakuma Trowasi; kutani hitshama kona masiku ya ntlhanu ni mambirhi.

Ta Pawulo loko asalisana ni va le Trowasi

⁷ Hi siku rorhanga ra vhiki, loko hihlengeletene kukhema xinkwa, Pawulo avulavula ni va le Trowasi, alehisa kuvulavula ka yena kuyafika xikarhi ka vusiku, hikuva aalava kufamba ni mixo wakona.

⁸ Tivoni atitele ndlwini ya le henhla leyi ahihlengeletanile ka yona.

⁹ Jaha rin'wana leri avaku i Yatiko, aritshamile jineleni; risungula kukhudzehela loko Pawulo aya mahlweni hi kuvulavula; kutani vurhongo bzihlula jaha leri; riwela hansi hi le xitezini xa vunharhu xa le henhla, kutani varitlakula na rifile.

¹⁰ Kambe Pawulo axika, akorhama henhla ka rona, ali khumbarheta, aku: “Mingakarhatekeni, hikuva rahahanya.”

¹¹ Kutani atlhela akhandziya, akhema xinkwa, aja, avulavula na vona nkarhi lowo leha, riko rixa, kutani asuka.

¹² Vayisa jaha kaya, na rihanyile, kutani vachaveleliwa ngopfu ha svona.

Ta loko vasuka Trowasi vaya Mileto

¹³ Loko ali hina hirhangela Pawulo, hipela lwandle hi ngalawa kuyafika le Aso, laha ahifanele kuhundza hiteka Pawulo kona: Aahileletile svosvo, hikuva aate atafamba hi milenge.

¹⁴ Loko hikumanile na yena le Aso, hi mukhandziyisa ngalaweni, hihundzela mahlweni akuva hiya Mitileni.

¹⁵ Hisuka kona hi ngalawa, kutani loko rixa, hifika laha kulangutaneke na Kiyo. Ritlhela rixa, hifika Samosi; hi siku leritlhantamaka, hifika Mileto.

¹⁶ Pawulo aabohile makungu ya kuhundza ntsena angangheni le Efesa, lesvaku angahundzeliwi hi nkarhi na ahali tikweni ra Aziya; hikuva aaringeta kuhantlisa afika Yerusalema hi siku ra Pentekoxta, loko svikoteka.

Ta Pawulo loko asalisana ni vakulukumba va le Efesa

¹⁷ Loko Pawulo ali Mileto, arhumela rito le Efesa kuyavitana vakulukumba va kereke.

¹⁸ Kuteloko vafikile ka yena, aku ka vona: “Masvitiva n'wina hilaha nihanyisaneke na n'wina hakona minkarhi hinkwayu, kusukela siku leri ningasungula kunghena tikweni ra Aziya.

¹⁹ Anili karhi nitirhela Hosi hi kutitsongahata lokukulu, ni minhloti, ni miringo leyi yinihumeleleke hi kutshamiwa xikungu hi Vayuda.

²⁰ Masvitiva lesvaku animifihlelanga nchumu xa lesvi svifanelaka kumipfuna, na nili karhi nimipaluxela Rito ni kumijondzisa rivaleni ni le minjangwini ya n'wina.

²¹ Nitsundzuxile svinene Vayuda ni Vagirika kuhundzukela ka Xikwembu ni kupfumela ka Hosi ya hina Yesu.

²² “Svosvi-ke, minivona na nili lweyi abohiweke hi Moya akuva niya Yerusalema, na ningativi lesvi svingatanihumelela kona;

²³ nitiva ntsena lesvaku Moya Wokwetsima wukarhi wunitsundzuxa svinene doropeni rin'wana ni rin'wana, lesvaku kukhomiwa ni maxangu svinirindzelile.

²⁴ Hambi svilitano, nivona lesvaku kulahlekeliwa hi vutomi, asvi na mhaka nikutsongo ka mina, loko ningakota ntsena kuheta lesvi ningarhumiwa kuyendla svona, ni ntirho lowu niwuyamukeleke ka Hosi Yesu, wa kuvula Evhangeli ya timpsalu ta Xikwembu.

²⁵ “Kutani svosvi, nasvitiva lesvaku amingahanivoni, n'wina hinkwenu lava ningafambafamba xikarhi ka n'wina na nipaluxa ta Mfumu wa Xikwembu.

²⁶ Hikolaho, namuntlha, nitiyisa mahlweni ka n'wina lesvaku aningavi na nandzu loko mun'we wa n'wina aya kuloveni,

²⁷ hikuva animifihlelanga makungu ya Xikwembu kambe ni mitivisile wona hinkwawu.

²⁸ Tilanguteleni ke, milangutela ni kereke hinkwayu leyi Moya Wokwetsima wungamiveka kuva vabixopo va yona; risani Kereke ya Xikwembu, leyi xingatikumela yona hi rifu ra N'wana wa xona wa xiviri.

²⁹ Hikuva mina nasvitiva lesvaku, loko nisukile, mitangheneliwa hi mahlolwa lawa yoleva, lawa magatakala mangatsetseleli ntlhambi;

³⁰ na svona, nitiva lesvaku kutahuma van'wana xikarhi ka n'wina lavangatahlaya mavunhwa kutilavela vajondzisiwa.

³¹ Loko svilitano, lavelelani, mitsundzuka lesvaku, vusiku ni nhlekanhi, anirhutelanga kujondzisa hi minhloti mun'wana ni mun'wana wa n'wina, hi nkarhi woringana malembe manharhu.

³² “Kutani na minyiketa svosvi ka Xikwembu, ni ka rito ra timpsalu ta xona, lerikotaka kumiyakisa ni kuminyika rifuwo xikarhi ka hinkwavu lava xitihlawuleleke vona.

³³ Anilavanga male ya silivhere kumbe ya golidi, hambi xili xiyambalu, ka munhu ni mun'we.

³⁴ Masvitiva na n'wina lesvaku mavoko lawa ya mina matirhile kukuma lesvi mina ni lava avali na mina ahisvipfumala.

³⁵ Svilo hinkwasvu ni mikombisile, lesvaku hi kutikarhata hi ndlela leyi, hifanele kupfuna lavatsaneke, nasvona hitsundzuka marito ya Hosi Yesu, lawa angamahlaya hi xiviri xa yena loko aku: ‘Kunyika i nkateko lowutlulaka kunyikiwa.’”

³⁶ Loko Pawulo ahetile kuvula timhaka toleto, akhinsama, akhongela na vona hinkwavu.

³⁷ Kutani hinkwavu vasungula kurila svinene, vavukarha Pawulo, vamun'qunta;

³⁸ avavaviseka ngopfungopfu hi rito ra yena ra lesvaku avangahatlheli vamuvona kambe. Kutani vamuheleketa aya ngalaweni.