Timhaka 2 - Testamente Leyimpsha Xichangana

Ta kuta ka Moya Wokwetsima

¹ Loko siku ra Pentekoxta rifikile, vajondzisiwa hinkwavu avahlengeletanile ndhawini yin'we.

² Kutani hi nomo-lo, kutwakala mpfumawulu lowuhumaka tilweni, wufana ni kuhunga ka xidzedze, wutata yindlo hinkwayu leyi avatshamile ka yona.

³ Kutani vavona lesvifanaka ni malangavi ya ndzilo, sviyavana, svitshama henhla ka mun'wana ni mun'wana wa vona.

⁴ Hinkwavu vatala hi Moya Wokwetsima, kutani vasungula kuvulavula hi tindzimi tin'wana, hilaha Moya wungavanyika kuvulavula hakona.

⁵ Akulini Vayuda lavayakeke Yerusalema, vanhu vochava Xikwembu lavahumaka matikweni hinkwawu ya laha misaveni.

⁶ Loko mpfumawulu lowu wutwakala, ntshungu wuhlengeletana, kutani wuhlamala ngopfu, hikuva mun'wana ni mun'wana aatwa vajondzisiwa vavulavula hi ririmi leringa ra yena.

⁷ Kutani hinkwavu vatshuka ni kuhlamala vaku: “Xana vanhu lavavulavulaka, ahi Vagalileya hinkwavu ke?

⁸ Sviyendlisa kuyini loko mun'wana ni mun'wana wa hina avatwa vavulavula hi ririmi leringa ra yena ke?

⁹ Van'wana va hina, i Vaparta ni Vameda ni Vayelamu; van'wana va hina, vahuma Mesopotamiya, ni le Yudeya ni le Kapadokiya, ni le Ponto ni le Aziya,

¹⁰ le Frixjiya ni le Pamfiliya, le Gibita ni le matlhelweni ya Libiya lawa manga kusuhi na Kirene; ku ni vayendzi lavahumaka Roma:

¹¹ Van'wana i Vayuda, van'wana i vamatiko lavayamukeliweke Xiyudeni; van'wana va hina i Vakreta ni Vaarabiya; kambe hinkwerhu hivatwa vavula mintirho leyikulu ya Xikwembu hi tindzimi ta hina!”

¹² Kutani hinkwavu vatshuka ni kuhlamala ngopfu, vavutisana vaku: “Mhaka leyi yihiyisa kwihi xana?”

¹³ Kambe van'wana vahleka vajondzisiwa vaku: “Vanhu lava vadakwile!”

Ta kujondzisa ka Petrosi hi siku ra Pentekoxta

¹⁴ Hi loko Petrosi ayima kun'we ni vapostola lavan'wana va khume ni mun'we, atlakusa rito aku ka vona: Vavanuna va Yudeya, na n'wina hinkwenu vayaki va Yerusalema, nilombeni tindleve mitativa lesvi:

¹⁵ Vanhu lava avadakwanga, hilaha mipimisaka hakona, hikuva wahali mixo.

¹⁶ Kambe i mhaka leyihlayiweke hi muprofeta Yowele, loko aku:

¹⁷ “‘Xikwembu xili: Hi masiku ya makumu, nitachela Moya wa mina henhla ka vanhu hinkwavu.’” Vana va n'wina vaxinuna ni vaxisati vatavhumba, vana va n'wina va majaha vatavona svivono, svikoxa sva n'wina svitalorha milorho.

¹⁸ Ina, hambi svili svitirhi sva n'wina sva xinuna ni sva xisati, minkameni yoleyo, nitasvichela Moya wa mina, kutani svitaprofeta.

¹⁹ Nitayendla svihlamaliso henhla tilweni, ni mahlori hansi misaveni: Ngati, ni ndzilo, ni refu ra musi.

²⁰ Jambu ritahundzuka ra ntima, ni n'weti wutapshuka kufana ni ngati, na siku lerikulu ra kuphatima ra Hosi ringasifika.

²¹ “Kutani mun'wana ni mun'wana lweyi angatahuwelela ka Hosi, ataponisiwa.”

²² Vavanuna va Israyele, yingisani marito lawa: Yesu wa Nazareta, aali wanuna lweyi Xikwembu xingamikomba yena, hi mintirho ya matimba, ni svihlamaliso, ni mahlori lawa ximayendleke ha yena xikarhi ka n'wina hilaha misvitivaka hakona na n'wina;

²³ hi yena lweyi anganyiketiwa, hi makungu lawa matiyeke ya Xikwembu ni kutiva ka xona ka khale; kutani mimudlayile hi mavoko ya vanhu lavokala vangalulamanga lavangamuvamba xihambanwini.

²⁴ Kambe Xikwembu ximupfuxile kufeni, ximutshunxa kuvavisekeni ka rifu, hikuva asvingayendleki lesvaku abohiwa ha rona.

²⁵ Loko Davhida avulavula hi yena, ate: “‘Minkama hinkwayu, nirhangisa Hosi mahlweni ka mina; ningakala ningatsekatseki, hikuva yi le vokweni ra mina ra xinene.’”

²⁶ Hikolaho mbilu ya mina yitsakile, niba nkulungwana, na wona miri wa mina wuhlayisekile, kutani ni ni kulangutela:

²⁷ We Hosi, ungenirivali ndhawini ya vafi, ungetshiki Muhlawuliwa wa wena ahela hi kubola.

²⁸ Unitivisile tindlela ta vutomi, utanitata hi kutsaka, uva na mina.

²⁹ “N'wina vamakwerhu, ningatiyisa nimibzela lesvaku Kokwana Davhida afile, ava alahliwa, kutani sirha ra yena rahali xikarhi ka hina ni namuntlha.”

³⁰ Hambi svilitano, aali muprofeta; nasvona aativa lesvaku Xikwembu ximutshembisile hi kuhlambanya lesvaku xitaveka mun'wana wa rixaka ra yena xiluvelweni xa yena.

³¹ Hikolaho Davhida, hi kuvona svilo svingasina humelela, ahlayile takupfuka ka Mesiya kufeni, loko aku: “‘Angatshikiwanga ndhawini ya vafi, na wona miri wa yena awuhelanga hi kubola.’”

³² “Hi yena Yesu lweyi Xikwembu xingamupfuxa kufeni, kutani hinkwerhu hi timboni ta mhaka leyi.”

³³ Svosvi-ke atlhantukisiwile aya vokweni ra xinene ra Xikwembu; ayamukele Moya Wokwetsima lowutshembisiweke, wunga lowuhumaka ka Tatana, kutani achelile henhla ka hina lesvi misvivonaka ni lesvi misvitwaka.

³⁴ Hikuva Davhida angatlhantukelanga tilweni, kambe hambi svilitano yena ate: Yehovha Xikwembu xite ka N'winyi wa mina: Tshama vokweni ra mina ra xinene,

³⁵ kukondza niveka valala va wena hansi ka minkondzo ya wena.

³⁶ “Hikolaho rixaka hinkwaru ra Vaisrayele rifanele kutiva mhaka leyi svinene lesvaku Yesu lweyi mingamuvamba, hi yena lweyi Xikwembu ximuyendleke Hosi ni Mesiya.”

³⁷ Kuteloko vanhu vayingisile marito lawa, vatlhaveka timbilu; kutani vaku ka Petrosi ni ka vapostola lavan'wana: “N'wina valekwerhu, xana hitayendla yini?”

³⁸ Petrosi aku ka vona: “Hundzukani, kutani mun'wana ni mun'wana wa n'wina akhuvuliwa hi vito ra Yesu Kriste, lesvaku mirivaleliwa svijoho sva n'wina; kutani mitayamukela nyiko, wunga Moya Wokwetsima,

³⁹ hikuva xitshembiso lexi xiyendleliwe n'wina ni vana va n'wina, ni va le kule hinkwavu lavangatavitaniwa hi Yehovha, Xikwembu xa hina.”

⁴⁰ Petrosi atiyisa vumboni bza yena hi marito man'wana lawa yotala, avakhongotela aku: “Hambanani ni rixaka leri rohomboloka lesvaku mitapona.”

⁴¹ Hi loko lavayamukeleke marito ya yena, vakhuvuliwa; kutani sikwini lero, kuyamukeliwa vanhu lavalavaka kuva makhulu manharhu (3 000).

⁴² Avachivirika tijondzweni ta vapostola, kuhlengeletaneni, akukhemeni ka xinkwa, ni le kukhongeleni.

Lesvi Vakriste avahanyisa xisvona

⁴³ Vapostola avayendla svihlamaliso ni mahlori layo tala, kutani vanhu hinkwavu avavaxixima.

⁴⁴ Vapfumeli hinkwavu avahamba vahlengeletana, vayavelana svilo sva vona hinkwasvu;

⁴⁵ avaxavisa lesvi vasvifuweke ni lesvi asvili sva vona, kutani vapambulela mun'wana ni mun'wana hi kuya hi kupfumala ka yena.

⁴⁶ Masiku hinkwawu avachivirika kukumana Tempeleni, vali mbilu yin'we, nasvona avakumana vakhema xinkwa minjangwini ya vona, vaja svakuja sva vona hi kutsaka lokukulu ni timbilu tobasa,

⁴⁷ na vali karhi vadzunisa Xikwembu, vatsakeliwa hi tiko hinkwaru. Kutani siku rin'wana ni rin'wana Hosi ayiyengetela nhlengeletanu ya vona hi lava avali karhi vaponisiwa.