Timhaka 19 - Testamente Leyimpsha Xichangana

Ta Pawulo loko ali Efesa

¹ Loko Apolosi ali Korinto, Pawulo atsemakanya hi le xikarhi ka tiko ra Aziya, angirimela aya Efesa, laha angakuma vajondzisiwa vangali vangani kona;

² kutani avavutisa aku: “Xana miyamukelile Moya Wokwetsima siku leri mipfumeleke ke?” Vaku ka yena: “Ahihim, ahisisvitwa lesvaku ku ni Moya Wokwetsima.”

³ “Xana mikhuvuliwile hi nkhuvulo wihi ke?” Kuvutisa Pawulo. Vaku “hi nkhuvulo wa Yohani.”

⁴ Kutani Pawulo aku: “Hi nkhuvulo wa yena, Yohani akhuvulile lava avahundzukile; aabzela vanhu kupfumela ka lweyi aatata ndzhaku ka yena, hi lesvaku yena Yesu.”

⁵ Loko vatwa svosvo, vakhuvuliwa hi vito ra Hosi Yesu.

⁶ Pawulo avatlhanteka mavoko, kutani Moya Wokwetsima wuta henhla ka vona; vavulavula hi tindzimi, na vali karhi vaprofeta.

⁷ Vavanuna volavo avalava kuva khume ni vambirhi.

⁸ Pawulo anghena sinagogeni, avulavula na angachavi nchumu; kutani, hi tihweti tinharhu, ahlamulana ni vanhu vakona, avakholwisa timhakeni ta Mfumu wa Xikwembu.

⁹ Kambe van'wana vasungula kutinonon'hwisa timbilu ni kutiyalisa, vasola Ndlela ya Hosi mahlweni ka nhlengeletanu hinkwayu; hi loko Pawulo ahambana na vona, atitekela vajondzisiwa hi tlhelo; kutani siku rin'wana ni rin'wana ahlamulana ni vanhu axikolweni xa Tirano.

¹⁰ Svifambile hi ndlela leyo hi malembe mambirhi, kuyafika loko hinkwavu lavayakeke tikweni ra Aziya, Vayuda ni vamatiko, vatwa rito ra Hosi.

Ta vana vamajaha va ka Sevha

¹¹ Xikwembu axiyendla mintirho ya matimba yohlamalisa ngopfu hi kutirhisa Pawulo;

¹² svifika laha vanhu vangayisa ka timbabzi mafaduku ni sviyambalu lesvikhumbeke miri wa yena, kutani timbabzi leti tihanya, ni mimoya leyobiha yihuma ka tona.

¹³ Kambe Vayuda van'wana lava avafambafamba, na vali karhi vahlongola madimoni, varingeta kutirhisa vito ra Hosi Yesu lesvaku vatahanyisa lavangheniweke hi mimoya leyobiha, kutani vaku: “Hamibzela hi Yesu, yena lweyi Pawulo amuhlayaka.”

¹⁴ Lava vayendlaka svosvo, amali majaha ya ntlhanu ni mambirhi ya Muprista lwenkulu wa Muyuda, Muyuda lweyi avaku i Sevha.

¹⁵ Kambe moya wa chaka wuvahlamula, wuku: “Yesu, namutiva, nitiva na Pawulo, kambe n'wina mivamani ke?”

¹⁶ Kutani munhu lweyi aali ni moya wa chaka, avatlulela, avahlula hinkwavu, avapfinya, vakondza vahuma ndlwini yakona hi kutsutsuma, na vangayambalanga nchumu, nasvona na vavavisiwile.

¹⁷ Mhaka leyi yitiviwa hi Vayuda ni Vagirika hinkwavu lavayakeke le Efesa; kuchava lokukulu kuvakhoma hinkwavu, kutani vito ra Hosi Yesu rikulisiwa svinene.

¹⁸ Lavanyingi lavangahundzuka vapfumeli, vata, vativula ni kupaluxa lesvi avasviyendla khale.

¹⁹ Kutani lavanyingi xikarhi ka lava avatirhile sva masalamusi, vahlengeleta tibuku ta vona, vatihisa mahlweni ka vanhu hinkwavu; kutani loko kuhlayiwa nxavu wa tona, kukumeka lesvaku wuyendla timale ta silivhere toringana ntlhanu wa makume ya makhulu (50 000).

²⁰ Hi ndlela yoleyo rito ra Hosi rihangalaka hi matimba, riya ritiya.

Ta mpfilumpfilu ya le Efesa

²¹ Ndzhaku ka loko timhaka leti tihumelelile, Pawulo aboha makungu ya kuya Yerusalema, hi kutsundzuxiwa hi Moya, kuya Yerusalema atarhanga hi kuhundza hi le Makedoniya ni le Akaya; kutani aku: “Loko nitava nivile kona, nifanele kuyavona ni le Roma.”

²² Hi loko arhuma Timotewu na Erasto, vavanuna vambirhi xikarhi ka vapfuni va yena, lesvaku vaya le Makedoniya; kutani yena, axwa masiku mangali mangani tikweni ra Aziya.

²³ Kambe nkameni wolowo kuhumelela mpfilumpfilu leyikulu hikolaho ka Ndlela ya Hosi:

²⁴ Mufuli mun'we wa svilo sva silivhere, lweyi avaku i Demetriyo, aayendla svifanisunyana sva silivhere sva tempele ya Artemiza, avuyisela vatirhikulobze bindzu lerikulu svinene.

²⁵ Kutani avahlengeleta svin'we ni lavatirhaka ntirho wofana ni wa vona, aku ka vona: “Vavanuna, masvitiva lesvaku hifuwisiwa svinene hi bindzu leri;

²⁶ kutani masvivona, ni kusvitwa, lesvaku Pawulo lweyi akucetele vanhu lavanyingi, kungali lana Efesa ntsena, kambe alavile kuyeneta ni tiko hinkwaru ra Aziya; wa vahambukisa hi kuvula lesvaku svikwembu lesviyendliweke hi vanhu ahi svikwembu.

²⁷ Kutani kungahumelela khombo ra lesvaku ntirho lowu wa hina lowu, wusungula kusoliwa; kungali svosvo ntsena, kambe na yona tempele ya Artemiza, xikwembukazi lexikulu, yingahundzuka xihlekiso, kutani vukulukumba bza lweyi agandzeliwaka hi tiko ra Aziya hinkwaru ni matiko hinkwawu, bzihantla bzihundzuka sva hava.”

²⁸ Loko vatwa svosvo, vakwata svinene, vahuwelela, vaku: “I nkulu, Artemiza wa Vaefesa!”

²⁹ Kutani doropa hinkwaru riyendla mpfilumpfilu. Vakhoma Gayo na Aristarko, Vamakedoniya vambirhi lava avafambafamba na Pawulo, kutani hinkwavu vatsutsumela na vona ndhawini ya mintlangu.

³⁰ Pawulo aalava kunghena ntshungwini, kambe vajondzisiwa vamusivela;

³¹ nasvona van'wana xikarhi ka tindhuna ta tiko ra Aziya, lava avali vanghanu va Pawulo, varhumela rito ka yena, vamukombela lesvaku angatshuki ayatikomba ndhawini ya mintlangu.

³² Nkarhini wolowo, van'wana vahuwelela svin'wana, van'wana svin'wanyana, hikuva nhlengeletanu ayipfilunganyisiwe svinene, kutani lavanyingi va vona avangativi lexi vateleke xona.

³³ Kambe van'wana xikarhi ka ntshungu vahlamusela mhaka ka Alexandre, munhu lweyi aasusumeteliwile mahlweni hi Vayuda; kutani Alexandre akwehleta hi voko, alava kutihlamulela mahlweni ka tiko.

³⁴ Kambe loko vavonile lesvaku i Muyuda, vaheta kusuhi ni mawora mambirhi, na vali karhi vahuwelela hinkwavu hi rito rin'we, vaku: “I nkulu, Artemiza wa Vaefesa!”

³⁵ Hi loko matsalana wa doropa amiyeta ntshungu, aku: “Vaefesa va ka hina! Xana i mani lweyi angativiki lesvaku doropa ra Vaefesa i muhlayisi wa tempele ya Artemiza lwenkulu ni wa xifaniso xa yena lexiweke hi le tilweni ke?

³⁶ Lesvi timhaka leti tingakanetiwiki, mifanele kutikhoma, mingayendli nchumu hi kuhantlisa;

³⁷ mitisile vavanuna lava, kambe avaphanganga nchumu titempeleni, nasvona avayalanga xikwembu xa hina.

³⁸ Loko Demetriyo ni vatirhikulobze valava kumangalelana ni munhu wokarhi, ku ni masiku lawa huvu yitirhaka ha wona; na svona, vayimeli va vuhosi vakona; avamangalelane kona!

³⁹ Kambe loko milava kuya mahlweni hi mhaka leyi, yitatsemiwa nhlengeletanweni leyingatava yivitaniwile hi nawu.

⁴⁰ Hikuva hingakumeka nahili nandzwini wa kupfuxa mpfilumpfilu, hikolaho ka nhlengeletanu leyi ya namuntlha; kasi mpfilumpfilu leyi yipfukile ntsena, kutani akungavi na lexi hingatatiyimela ha xona, loko hivutisiwa mayelano na yona.”

⁴¹ Kuteloko ahlayile svosvo, ahangalasa nhlengeletanu.