Timhaka 18 - Testamente Leyimpsha Xichangana

Ta Pawulo loko ali Korinto

¹ Ndzhaku ka svosvo Pawulo asuka Atena, aya Korinto.

² Doropeni leri, akuma Muyuda mun'we lweyi avaku i Akila, lweyi avelekiweke Ponto, lweyi aatile hi le Italiya kungali khale, ali na Prisika nsati wa yena; hikuva hosi Klawudiyo ayileletile lesvaku Vayuda hinkwavu vasuka Roma. Pawulo aya ka vona.

³ Kutani lesvi aali wa ntirho lowufanaka ni wa vona, atshama na vona, na ali karhi atirha; hikuva ntirho wa vona awuli wa kurhunga matende.

⁴ Kutani, masiku hinkwawu ya Savata, Pawulo aahlamulana ni lava avali sinagogeni, aringeta kukholwisa Vayuda ni Vagirika.

⁵ Loko Silasi na Timotewu vatile hi le Makedoniya, Pawulo atinyiketa kujondzisa Rito ntsena, angahatirhi svin'wana; atiyisa ka Vayuda lesvaku Mesiya, hi yena Yesu.

⁶ Hi loko vona vamukaneta ni kumuyala, aphumunha ntshuri asviyambalweni sva yena, aku ka vona: “Ngati ya n'wina, ayive henhla ka tinhloko ta n'wina; loko ali mina, nihumile ka wona; kusukela svosvi, nitaya ka vamatiko.”

⁷ Hi loko ahambana na vona, ayatshama kaya ka wanuna lweyi avaku i Tisiyo Yusto, munhu wo chava Xikwembu, lweyi munti wa yena awuvandzakene ni sinagoga.

⁸ Kambe Krispo, mufambisi wa sinagoga, apfumela ka Hosi, ni va njangu wa yena hinkwavu; na vona Vakorinto lavanyingi, loko vatwa Rito, vapfumela, vava vakhuvuliwa.

⁹ Vusiku bzin'wana Hosi yihumelela ka Pawulo hi norho, yiku ka yena: “Ungachavi; kambe vulavula, ungamiyeli,

¹⁰ hikuva ni na wena; aku na munhu lweyi angatakupfukela, akuyendla lesvobiha; hikuva ni ni vanhu lavanyingi doropeni leri.”

¹¹ Kutani Pawulo atshama kona lembe rin'we, ni ntlhanu wa tihweti ni yin'we, na ali karhi ajondzisa rito ra Xikwembu xikarhi ka vona.

¹² Nkarhini lowu Galiyo aali muyimeli wa vuhosi le Akaya, Vayuda vapfumelelana kupfukela Pawulo, kutani vamuyisa hubzeni,

¹³ vaku: “Munhu lweyi akholwisa vanhu kugandzela Xikwembu hi ndlela leyihambaneke ni Nawu.”

¹⁴ Loko Pawulo ahalava kuhlamula, Galiyo aku ka Vayuda: “N'wina Vayuda, loko ingi hi kamba mhaka ya kukala yingalulamanga leyingayendliwa, kumbe kukanganyisa kun'wana lokobiha ngopfu, asvitaniboha kuyamukela kumangala ka n'wina;

¹⁵ kambe lesvi kuvulavuliwaka mhaka ya marito, ni ya mavito, ni ya Nawu wa ka n'wina svivoneni hi n'wexe, hikuva mina anilavi kuva mutsemi wa timhaka letakutano.”

¹⁶ Kutani avahlongola hubzeni.

¹⁷ Hi loko hinkwavu vakhoma Sostene, mufambisi wa sinagoga, kutani vamuba mahlweni ka huvu; kambe Galiyo aangali na mhaka na svona.

Ta Pawulo loko atlhelela Antiyoka

¹⁸ Kuteloko Pawulo axwile Korinto masiku lamanyingi, asalisana ni vamakwavu, aya Siriya hi ngalawa, na ali na Prisika na Akila. Asuka Kenikreya na abzevule misisi, hikuva aatibohile hi kufunga.

¹⁹ Vayafika le Efesa, laha Pawulo angasiya va Akila kona; kutani anghena sinagogeni, ahlamulana ni Vayuda.

²⁰ Vona vamukombela lesvaku atshama na vona ahlwelanyana, kambe angapfumelanga.

²¹ Kutani asalisana na vona, aku: “Nitatlhela nivuya kola ka n'wina loko Xikwembu xisvirhandza.” Kutani asuka le Efesa hi ngalawa.

²² Kuteloko afikile Khezariya, atlhantukela Yerusalema, axeweta kereke, kutani angirimela aya Antiyoka.

²³ Atshama nkarhinyana kona, kutani asuka, arhendzeleka hinkwaku matikweni ya Galatiya ni ya Frixjiya, na atiyisa vajondzisiwa hinkwavu.

Ta Apolosi loko apaluxa Rito le Efesa

²⁴ Muyuda mun'we lweyi avaku i Apolosi, afika Efesa. Aavelekiwile le Alexandriya, ali wanuna wa matimba kuvulavuleni, lweyi aativa ngopfu Matsalwa.

²⁵ Aajondzisiwile Ndlela ya Hosi; kutani, hi kuhiseka ka yena moyeni, aavula ni kujondzisa timhaka ta Yesu hi ndlela yakona, hambilesvi aativa nkhuvulo wa Yohani ntsena.

²⁶ Asungula kuvulavula sinagogeni, na angachavi nchumu. Kuteloko Priskila na Akila vamutwile, vamurhurhela, vamuhlamusela svinenenene hi ta Ndlela ya Xikwembu.

²⁷ Kambe lesvi aalava kuyafika Akaya, vamakwavu vaseketela makungu ya yena, kutani vatsalela vajondzisiwa, vakombela lesvaku vamuyamukela. Loko afikile ka vona, avapfuna ngopfu lava avapfumelile hi kutsakeliwa hi Xikwembu;

²⁸ hikuva, hi marito ya matimba, aakanetana ni Vayuda rivaleni, na avakomba hi Matsalwa lesvaku Mesiya, hi yena Yesu.