Timhaka 17 - Testamente Leyimpsha Xichangana

Ta dzolonga le Thesalonika

¹ Pawulo na Silasi vafamba hi ndlela leyihundzaka hi le Amfipolisi ni le Apoloniya, vafika Thesalonika, laha akuli ni sinagoga ra Vayuda.

² Hi kutolovela ka yena, Pawulo anghena nhlengeletanu na vona; kutani hi masiku manharhu ya Savata ahlamulana na vona hi kulandza Matsalwa,

³ na amahlamusela, ni kuringanisa ha wona lesvaku Mesiya aafanele kutwisiwa kuvaviseka, ni kupfuka kufeni; kutani aku: “Yesu lweyi ni mitivisaka yena, hi yena Mesiya.”

⁴ Kutani van'wana xikarhi ka vona vapfumela, vanamarhela Pawulo na Silasi, na vali ni nhlayo leyikulu ya Vagirika lavachavaka Xikwembu, ni lavanyingi xikarhi ka vavasati lavochaviseka.

⁵ Kambe Vayuda vatala hi mavondzo, vateka vavanuna van'wana lavobiha ntsendzeleni wa doropa, kutani vahlengeleta ntshungu, vadzolonganisa doropa; vayarhendzela munti wa Yaso, valava Pawulo na Silasi akuva vavayisa mahlweni ka tiko.

⁶ Kambe loko vangavakumi, vakokela Yaso ni vamakwavu van'wana mahlweni ka tindhuna ta doropa, vahuwelela, vaku: “Vanhu lavapfilunganyaka misava hinkwayu, vafikile ni halenu, kutani Yaso avarhurhelile;

⁷ vanhu lava hinkwavu vatlula milawu ya Khezari, hi kuvula lesvaku ku ni hosi yin'wana, leyi vange i Yesu.”

⁸ Hi marito lawa vapfuxa mpfilumpfilu xikarhi ka tiko ni le xikarhi ka tindhuna ta doropa letingasvitwa.

⁹ Hambi svilitano, tindhuna tiyamukela xirihanandzu ka Yaso ni van'wana, kutani tivatshika vafamba.

Ta vapostola loko vali Bereya

¹⁰ Hi vusiku bzakona, vamakwavu vahantlisa varhuma Pawulo na Silasi Bereya. Loko vapostola vafikile kona, vanghena sinagogeni ra Vayuda.

¹¹ Va le Bereya, avatlula va le Thesalonika hi malwandla, vayamukela Rito hi kukhensa lokukulu, vakambisisa Matsalwa masiku hinkwawu, valava kutiva lesvaku xana timhaka titano ke.

¹² Kutani lavotala xikarhi ka vona vapfumela, na svona, xikarhi ka Vagirika, kupfumela vavasati lavanyingi lava vachavisekaka, ni vavanuna lavanyingi.

¹³ Kambe loko Vayuda va le Thesalonika vatwa lesvaku rito ra Xikwembu rivuliwile hi Pawulo ni le Bereya, vaya kona, vakanakanisa ni kupfilunganyisa xitshungu.

¹⁴ Hikolaho, vamakwavu vahantlisa vahumesa Pawulo, ayafika ribuweni ra lwandle; kambe Silasi na Timotewu vasala Bereya.

¹⁵ Kutani lava avaheleketa Pawulo, vamufikisa Atena; kutani vatlhela loko valeletiwile kubzela Silasi na Timotewu lesvaku vangahlweli kulandza Pawulo.

Ta Pawulo loko ali Atena

¹⁶ Loko Pawulo ahavalangutela Atena, moya wa yena wutlhaveka svinene, loko avona lesvaku doropa leri ritele hi svifaniso sva svikwembu.

¹⁷ Hikolaho, loko ali sinagogeni, ahlamulana ni Vayuda ni lavachavaka Xikwembu; kutani ayendlisa svosvo ni le hubzeni ya doropa masiku hinkwawu, ahlamulana ni lava avali kona.

¹⁸ Kambe tintlhari tin'wana ta ntlawa wa Vaepikuro ni wa Svitoyika tikanetana na yena; van'wana vaku: “Xana munhu lweyi wa miharihari alava kuhibzela yini ke?” Van'wana vaku: “Ingi i mujondzisi wa ta svikwembu svin'wana.” Avavula svosvo, hikuva Pawulo aavabzela ta Yesu nitakupfuka kufeni.

¹⁹ Kutani vamuteka, vaya na yena hubzeni ya “Areyopago”, vaku: “Xana ungahibzela jondzo leyimpsha leyi uyivulaka, lesvaku hi yihi ke?

²⁰ Ufikisile timhaka letohlamalisa tindleveni ta hina; hi kolaho hilava kutitiva lesvaku hi letoyini.”

²¹ (Vaatena hinkwavu, ni vanhu vamatiko man'wana lavayendzeke ka vona, avangatirhi nchumu, loko kungali kurungulelana timhaka, kumbe kuyingisa tin'wana letahakuhumelelaka.)

²² Kava loko Pawulo ayima hubzeni ya “Areyopago”, aku: “Vavanuna va Atena, nasvivona lesvaku, ka svilo hinkwasvu, mi vanhu vavukhongeli lebzikulu ngopfu.

²³ Hikuva loko nifamba na nili karhi nilanguta tindhawu leti migandzelaka ka tona, nikumile alitari leyi kutsaliweke marito ka yona lawa mange: ‘KA XIKWEMBU LEXINGATIVIWIKI!’ Svosvi-ke, lesvi misvigandzelaka na mingasvitivi, hi svona lesvi nimitivisaka svona.

²⁴ Xikwembu lexingayendla misava ni hinkwasvu lesvinga ka yona, axitshami titempeleni letiyakiweke hi mavoko ya vanhu, lesvi xinga Hosi ya matilo ni misava;

²⁵ nasvona axitirheliwi hi mavoko ya vanhu, ingi hi loko xingapfumala nchumu; hikuva hi xona lexinyikaka mun'wana ni mun'wana vutomi, ni kuhefemula, ni svilo hinkwasvu.

²⁶ Hi munhu mun'we xiyendlile vanhu van'wana hinkwavu lesvaku vayeneta misava hinkwayu; xivavekele tinguva leti xitihlawuleke khale, xiveka ni mindzilekana ya lomu vafanelaka kutshama kona.

²⁷ Asvili lesvaku valava Xikwembu, ni lesvaku kumbe xana vangaxi yambayamba, vaxikuma; hambi svilitano, axile kule ni mun'wana ni mun'wana wa hina;

²⁸ hikuva ka xona, ha hanya, ha tshukatshuka, na svona, hi kona, kukotisa lesvi vatlhokovetseli van'wana va n'wina vangavula vaku: ‘Na hina hi va rixaka ra xona.’

²⁹ Kutani lesvi hinga va rixaka ra Xikwembu, ahifanelanga kuyehleketa lesvaku vukwembu bzingafana ni svifaniso sva nsuku, kumbe sva silivhere, kumbe sva ribze, svinga svilo lesvivatliwaka hi vutlhari bza vanhu ni miyanakanyu ya vona.

³⁰ Hambi svilitano, Xikwembu xitshikile minkama ya kupfumala kutiva yihundza, kutani svosvi, matikweni hinkwawu xileleta vanhu lesvaku vahundzuka hinkwavu.

³¹ Hikuva xivekile siku leri xingatayavanyisa misava akululameni, hi wanuna lweyi ximuhlawuleke; kutani xikombisile vanhu hinkwavu kutiya ka mhaka leyi hi kupfuxa munhu lweyi xikarhi ka vafi.”

³² Loko vatwa ta kupfuka ka vafi, van'wana vahleka, kambe van'wana vaku: “Hahatakutwa nakambe mhakeni leyi.”

³³ Kutani Pawulo asuka xikarhi ka vona.

³⁴ Kambe vanhu van'wana vamunamarhela, vapfumela; xikarhi ka vona akuli na Diyoniziyo lweyi wa Ariyopago, ni wansati lweyi avaku i Damarisi, ni van'wana.