Timhaka 16 - Testamente Leyimpsha Xichangana

Ta Pawulo na Silasi loko vafamba na Timotewu

¹ Pawulo afika Derbe ni le Listra. Kona, akuli ni mujondzisiwa lweyi avaku i Timotewu; mamana wa yena aali muyuda, nasvona aali mupfumeli; kambe tatana wa yena aali mugriki;

² Timotewu aakhenseka ka vamakwavu va le Listra ni va le Ikoniya.

³ Pawulo aalava kufamba na yena, kutani amuteka, amuyimbisa, hikolaho ka Vayuda lavayakeke matikweni wolawo, hikuva hinkwavu avativa lesvaku tatana wa Timotewu i Mugriki.

⁴ Kutani loko vapostola vali karhi vahundza madoropeni lawa, vanyiketa vamakwavu milawu leyingavekiwa hi vapostola ni vakulukumba va le Yerusalema, nikukombela lesvaku yihlayisiwa.

⁵ Hi mukhuva lowu, tikereke titiyisiwa kupfumeleni, tiyandza siku rin'wana ni rin'wana.

Ta Pawulo loko avona xivoniso xa munhu wa le Makedoniya

⁶ Vapostola vatsemakanya matiko ya Frixjiya ni ya Galatiya, kutani Moya Wokwetsima wuvasivela kuyavula Rito tikweni ra Aziya.

⁷ Kuteloko vafikile ndzilekaneni wa tiko ra Misiya, varingeta kunghena tikweni ra Bitiniya, kambe Moya wa Yesu awuvapfumelelanga.

⁸ Hikolaho vatsemakanya Misiya, kutani vangirimela vaya Trowasi.

⁹ Xivono xihumelela ka Pawulo nivusiku: Wanuna wa Makedoniya ayima mahlweni ka yena, amukombela, aku: “Pelela Makedoniya, utahipfuna!”

¹⁰ Loko Pawulo avonile xivoniso lexi, hihantla hitilungisela kuya Makedoniya hi kutwisisa lesvaku i Xikwembu lexi xihivitaneke kuyapaluxa Evhangeli ka vanhu vakona.

Ta kutinyiketa ka Lidiya

¹¹ Kuteloko hi sukile Trowasi hi ngalawa, hi tsemakanya lwandle kuyafika xihlaleni xa Samotraka, kutani hi siku leritlhantamaka, hiya Neyapolisi;

¹² loko hisuka kona, hikongoma Filipi, anga doropa ra xitikwana xosungula xa Makedoniya, leri arili mavokweni ya vanhu vohuma kule. Kutani hi tshama masiku mangali mangani doropeni rolero.

¹³ Hi siku ra Savata hihuma doropeni, hiya nambzeni, laha hi pimiseke lesvaku kungava ni ndhawu yokhongela ka yona; kuteloko hitshamile, hivulavula ni vavasati lavahlengeletaneke kona.

¹⁴ Mun'we wa vona lweyi avaku i Lidiya, muxavisi wa tinguvu tovangama ta xivunguvungu, wa doropa ra Tiyatira, wansati wochava Xikwembu, aali kuyingiseni; kutani Hosi yipfula mbilu ya yena lesvaku atwisisa lesvivuliwaka hi Pawulo.

¹⁵ Kuteloko atsakamisiwile svin'we ni va njangu wa yena, ahikombela, aku: “Loko mivona lesvaku ni munhu lweyi apfumeleke ka Hosi hakunene, minga nghena kaya ka mina, mitshama kona.” Kutani ahisindzisa kuya kona.

Ta kukhomiwa ka vapostola le Filipi

¹⁶ Siku rin'wana loko hiya ndhawini yokhongela ka yona, hihlangana ni wanhwana lweyi aali xikarawa, lweyi aali ni moya wa vungoma, afuwisa vinyi va yena hi kuvhumbha.

¹⁷ Kutani ahilandza, hina na Pawulo, na ali karhi ahuwelela, aku: “Vavanuna lava i malandza ya Xikwembu xa le henhlahenhla, lava vamitivisaka tandlela ya kuponisiwa.”

¹⁸ Ahamba ayendlisa svosvo hi masiku lawa manyingi kufika laha Pawulo akarhatekeke svinene, kutani ahundzukula, aku ka moya: “Hi vito ra Yesu Kriste nakubzela nili: Huma ka nhwanyana lweyi!” Kutani hi nomo-lo moya wuhuma.

¹⁹ Loko vinyi va nhwanyana vavona lesvaku vaheleliwe hi bindzu leri avarilangutelile, vakhoma Pawulo na Silasi, vavakokela vanhwini, mahlweni ka tindhuna ta vuthethisi;

²⁰ vavayisa ka letikulu takona vaku: “Vanhu lava i Vayuda, kutani vapfilunganyisa doropa ra ka hina;

²¹ vajondzisa mikhuva leyi hingafaneliki kuyiyamukela ni kuyiyendla, hina hinga Varoma.”

²² Na wona ntshungu wuvapfukela hi matimba; tindhuna tihandzula sviyambalu sva Pawulo na Silasi, tileleta lesvaku vabiwa hi tinhonga.

²³ Kuteloko vavahumesile mimpfembeti hi kuvaba, vavapfalela jele, valeleta mulanguteli wa jele kuvarindza svinene.

²⁴ Loko yena akumile xileriso xoxo, avanghenisa jele ra le xikarhi, kutani amanya milenge ya vona ni mintsandza.

²⁵ Xikarhi ka vusiku, Pawulo na Silasi avakhongela, vadzunisa Xikwembu hi kuyimbelela tinsimu, kutani vabohiwa lavan'wana va vayingisa.

²⁶ Kambe hi nomo-lo, kuva ni kutsekatseka lokukulu ka misava; kutani masungulu ya jele ma tsekatsekisiwa; hi nomo-lo tinyangwa hinkwatu tipfuleka, kutani machini ya vabohiwa hinkwavu matshunxeka.

²⁷ Mulanguteli wa jele apfuka avurhongweni; hi loko avona svipfalu sva jele na svipfulekile, ahlomula ripanga ra yena, alava kutidlaya, hikuva aapimisa lesvaku vabohiwa vabalekile.

²⁸ Kambe Pawulo ahuwelela hi rito leritlakukeke, aku: “Ungatshuki utivavisa, hikuva hahali kona hinkwerhu.”

²⁹ Mulanguteli akombela tivoni, anghena hi kutsutsuma, atiwisela milengeni ya Pawulo na Silasi, na ali karhi arhurhumela hi kuchava.

³⁰ Kutani loko avahumeselile handle, aku: “Tihosi, xana nifanele kuyendla yini lesvaku niponisiwa?”

³¹ Vona vaku: “Pfumela ka Hosi Yesu, kutani utaponisiwa, wena ni va njangu wa wena.”

³² Kutani vamubzela rito ra Hosi, na ali ni njangu wa yena hinkwawu.

³³ Kutani, nkarhini wolowo wa vusiku, mulanguteli avateka avahlampsa mimpfembeti ya vona; kutani hi nomo-lo akhuvuliwa, yena ni njangu wa yena hinkwawu.

³⁴ Ndzhaku ka svosvo, ayisa Pawulo na Silasi kaya ka yena, avaphamela svakuja, kutani atsaka svin'we ni va njangu wa yena hinkwavu, hi lesvi aapfumelile ka Xikwembu.

³⁵ Loko rixa, tindhuna tirhuma mapholisa kuyaleleta lesvaku vanhu lava vatshunxiwa.

³⁶ Mulanguteli wa jele ativisa Pawulo mhaka leyi, aku: “Tindhuna tirhumele rito lesvaku mitshunxiwa; kutani svosvi, humani, mifamba hi kurhula.”

³⁷ Kambe Pawulo aku ka mapholisa: “Vahibile rivaleni na hingasi yavanyisiwa, hina hinga Varoma, kutani vahinghenisa jele! Xana svosvi vangahitshunxa xihundleni xana? Nikutsongo! Avate vona vinyi, vatahihumesela handle.”

³⁸ Mapholisa mafikisa marito wolawo ka tindhuna; loko tona titwa lesvaku Pawulo na Silasi i Varoma, tichava.

³⁹ Hi loko tita, tikombela kurivaleliwa, tivahumesela handle, tikombela lesvaku vahuma doropeni, vafamba.

⁴⁰ Kuteloko vahumile jele, vaya kaya ka Lidiya; kona, vavonana ni vamakwavu, vavakhongotela, kutani vatifambela.