Timhaka 15 - Testamente Leyimpsha Xichangana

Ta nhlengeletanu ya vapostola Yerusalema

¹ Van'wana lavahumeke Yudeya, avajondzisa vamakwavu Hosini, vaku: “Loko mingayimbisiwanga hi kuya hi Nawu wa Moxe, mingakala mingaponisiwi.”

² Kambe Pawulo na Barnaba vahambana ngopfu na vona mhakeni leyi, vaphikizana na vona hi matimba; kutani valulamisa lesvaku Pawulo na Barnaba vataya Yerusalema ni van'wana va Antiyoka, kuyavutisa mhaka leyi ka vapostola ni ka vakulukumba.

³ Kereke yivalongelela yiku: “Tindlela atibase!” Kutani vatsemakanya matiko ya Fenisiya ni ya Samariya, na vali karhi vahlamusela hilaha vamatiko vahundzukeke hakona; kutani vamakwavu Hosini hinkwavu vatsakisiwa ngopfu hi mhaka leyi.

⁴ Kuteloko vafikile Yerusalema, vayamukeliwa hi kereke ni vapostola ni vakulukumba; kutani vavarungulela hinkwasvu lesvi Xikwembu xisviyendleke ha vona.

⁵ Kambe van'wana va ntlawa wa Vafarisi, lava avapfumelile, vayima, vaku: “Svafanela lesvaku vamatiko vayimba, vabzeliwa kuhlayisa Nawu wa Moxe.”

⁶ Kutani vapostola ni vakulukumba vahlengeletana kukamba mhaka leyi.

⁷ Kuteloko vayivulavulile nkama wa kuleha, Petrosi ayima, aku ka vona: “Vavanuna valekwerhu, masvitiva lesvaku Xikwembu xinihlawulile xikarhi ka n'wina loko kereke yahakusungula, lesvaku vamatiko vatatwa rito ra Evhangeli hi nomo wa mina, vakondza vapfumela.

⁸ Kutani Xikwembu lexitivaka timbilu ta vanhu, xikombile lesvaku vayamukeleka ka xona hi kuvanyika Moya Wokwetsima kukotisa hina;

⁹ xikarhi ka hina na vona, axihlawulanga: Xibasisile timbilu ta vona, hikuva vapfumelile.

¹⁰ Svosvi-ke, xana miringela yini Xikwembu hi kutlhanteka ndzhwalu makatleni ya vajondzisiwa, lowu vatatana va hina, hambi hina, hihlulekeke kuwurhwala ke?

¹¹ Kambe loko hi pfumela lesvaku timpsalu ta Hosi Yesu, hi tona tihiponisaka, ni le ka vona svitano.”

¹² Nhlengeletanu hinkwayu ayimiyelile, yiyingisa Barnaba na Pawulo loko varungula hilaha Xikwembu xivatirhiseke hakona kuyendla mahlori ni svihlamaliso lesvinyingi xikarhi ka vamatiko.

¹³ Kuteloko vahetile kuhlamusela, Yakobe avulavula, aku: “N'wina valekwerhu, ni yingiseni;

¹⁴ Simoni wa ha kuhlamusela hilaha Xikwembu xingasungula kutikarhata hakona, xitilavela, xikarhi ka vamatiko, vanhu lavangatahlayiwa va xona hakunene.”

¹⁵ Kutani marito ya vaprofeta matwanana na svona svosvo, hikuva kutsaliwile lesvi:

¹⁶ Hosi yili, ndzhaku ka svosvo nitavuya, ni pfuxa yindlo ya Davhida leyingawa. Nitapfuxa ni marhumbi ya yona, nitlhela niyiyimisa,

¹⁷ lesvaku vanhu lavan'wana hinkwavu vatakota kulava Hosi, vona vamatiko hinkwavu lava ningava vitana lesvaku vava vanhu va mina hakunene.

¹⁸ Hosi yivula svosvo, yona yitirhaka svilo lesvi, svinga svilo lesvitivisiweke khale.

¹⁹ “Hikokolaho, nitsema mhaka hi kuvula lesvaku vamatiko lavahundzukelaka ka Xikwembu, hingatshuki hivakarhata;”

²⁰ “kambe ahivatsaleleni papela, hivabzela kutshika svakuja lesvinyamisiweke hi kuhumeseliwa svikwembu sva hava, vatshika ni vugelegele vangaji lesvi vanhu vasvidlayeke hi kusvitlimba minkolo, ni ngati vangaji”;

²¹ “hikuva i khale ngopfu milawu ya Moxe yisungulile kujondzisiwa minjangwini hinkwayu, yili karhi yihlayiwa masinagogeni masiku hinkwawu ya Savata.”

Ta papela ka lava vangaliki Vayuda

²² Hikokolaho vapostola ni vakulukumba, svin'we ni kereke hinkwayu, vatwanana kuhlawula vavanuna van'wana xikarhi ka vona, vavarhumela Antiyoka na Pawulo na Barnaba; kurhumiwa Yuda lweyi avaku i Barsaba, na Silasi, vavanuna lavochaviseka xikarhi ka vamakwavu Hosini.

²³ Vafamba ni papela leringe: “Hina vapostola ni vakulukumba, hinga vamakwavu Hosini, ka n'wina vamakwerhu mingavelekiwa na mili vamatiko, n'wina mingale Antiyoka, ni le Siriya, ni le Kilikiya: Xeweni!

²⁴ “Hitwile lesvaku van'wana lavahumaka ka hina vamitshukisile hi kuvulavula ka vona, vamikanakanisa mimoyeni ya n'wina; kasi ahingava leletanga nchumu;

²⁵ hi kokolaho hi twananile hi mbilu yin'we kuhlawula vavanuna, hivarhumela ka n'wina; vata kufana ni varhandziwa va hina Pawulo na Barnaba,

²⁶ vanga vavanuna lava vangachavangiki kunyiketa vutomi bza vona kutirhela Hosi ya hina Yesu Kriste.

²⁷ Nasvona himirhumela Yuda na Silasi lava vangatamitivisa hi nomo timhaka ta papela leri.

²⁸ Hikuva Moya Wokwetsima svin'we na hina, hivonile lesvaku ahingamirhwexi ndzhwalu wun'wana, loko wungali wa timfanelo leti:

²⁹ Hi lesvaku mitshika tinyama letitlhaveliweke svikwembu sva hava, mingajeneni ngati ni lesvi vanhu vasvidlayeke hi kusvitlimba minkolo, mitshika ni vugelegele; Loko mifularhela svilo svesvo, mitava miyendlile lesvinene. “Salani hi kurhula!”

³⁰ Varhumiwa vatshunxiwa vafamba, kutani vangirimela vaya Antiyoka; varhamba nhlengeletanu hinkwayu, kutani va vanyika papela leri.

³¹ Loko vona varihlayile, vatsakisiwa ngopfu hi marito lawa ya kuvakhongotela.

³² Lesvi Yuda na Silasi avali vaprofeta, vakhongotelile vamakwavu hi marito layotala, vavatiyisa.

³³ Loko vaxwile kona masiku, vatshunxiwa hi kurhula hi vamakwavu, lesvaku vatlhelela ka lava vavarhumeke. [

³⁴ Kambe Silasi ahlawula kusala Antiyoka.]

³⁵ Pawulo na Barnaba, vona, vaxwa Antiyoka nkamanyana, na vali karhi vajondzisa, vapaluxa mahungu lamanene ya rito ra Hosi, na vali ni van'wana lavotala.

Ta kuhambana ka Pawulo na Barnaba

³⁶ Loko kuhundzile masiku mangali mangani, Pawulo aku ka Barnaba: “Ahitlhele hi ya yendzela vamakwerhu madoropeni hinkwawu lawa hingapaluxa rito ra Hosi ka wona, hivona hilaha vahanyaka hakona.”

³⁷ Barnaba aanavela lesvaku vateka Yohani, lweyi avaku i Marka, vafamba na yena.

³⁸ Kambe Pawulo avona lesvaku svitava svihoxekile loko vafamba ni munhu lweyi, hikuva aahambene na vona Pamfiliya, angayanga na vona ntirhweni.

³⁹ Kutani kuhumelela kuholovisana xikarhi ka vona, vakondza vayavana; Barnaba ateka Marka, aya Kipra hi ngalawa.

⁴⁰ Loko ali Pawulo, atihlawulela Silasi, kutani asuka, na akombeleliwe minkateko ya Xikwembu hi vamakwavu.

⁴¹ Kutani atsemakanya matiko ya Siriya na Kilikiya, na ali karhi atiyisa tikereke.