Timhaka 14 - Testamente Leyimpsha Xichangana

Ta Pawulo na Barnaba loko vali Ikoniya

¹ Loko Pawulo na Barnaba vali le Ikoniya, vanghena sinagogeni ra Vayuda kufana ni le Antiyoka, vajondzisa kona, kukondza kupfumela vunyingi lebzikulu bza Vayuda ni bza Vagirika.

² Kambe Vayuda vokala vangapfumelanga vahlohlotela vamatiko, vawonha timbilu ta vona kuvalwisa ni vamakwavu Hosini.

³ Hambi svilitano, vapostola vaxwa kona masiku lamanyingi, vavulavula na vangachavi nchumu, vatitshembele Hosi; yona ayitiyisa mahungu ya timpsalu ta yona hi kuyendla mahlori ni svihlamaliso hi mavoko ya vona.

⁴ Kambe xitshungu xa doropa xiyavana, xin'wana xiyimela Vayuda, xin'wana xiyimela vapostola.

⁵ Hi loko vamatiko ni Vayuda, svin'we ni tindhuna ta vona, varingeta kuyendlela vapostola lesvobiha, ni kuvakhandla hi maribze;

⁶ loko vona vasvitwa vatsutsumela Listra ni le Derbe, ringa doropa rin'wana ra tiko ra Likawoniya, vafika ni le svidoropanini svakona.

⁷ Kutani vapaluxa Evhangeli kona.

Ta Pawulo na Barnaba loko vali Listra

⁸ Akuli ni munhu le Listra lweyi aatolovelile kutshama ndhawini yin'we, hikuva aalimalile milenge; hi mpfhuka avelekiwa, anga zanga afamba ni siku ni rin'we.

⁹ Aayingisa lesvihlayiwaka hi Pawulo. Yena amulangutisisa, kutani avona lesvaku anikupfumela ka lesvaku angahanyisiwa;

¹⁰ hi loko Pawulo atlakusa rito, aku ka yena: “Suka, uyima hi milenge ya wena!”

¹¹ Munhu lweyi okakatsuku, asungula kufambafamba. Loko xitshungu xivona lesvi sviyendliweke hi Pawulo, xitlakusa rito hi ririmi ra Likawoniya, xiku: “Svikwembu svitiyendle svifananiso sva vanhu, kutani svixikele ka hina!”

¹² Kutani Barnaba avamuhlaya Zewu; Pawulo yena, avaku i Herme, hikuva aali yena xivulavuli lexikulu.

¹³ Na yena Muprista wa Zewu, lweyi tempele ya yena ayili handle nyana ka doropa, atisa tihomu ni vuhlalu bza sviluva nyangweni ya doropa, alava kuhumesela vapostola timhamba, na ali ni xitshungu.

¹⁴ Kambe loko vapostola Barnaba na Pawulo vatwa svosvo, vahandzula sviyambalu sva vona, vatsutsumela xikarhi ka ntshungu na vali karhi vahuwelela,

¹⁵ vaku: “Vavanuna, hikolaho ka yini miyendla lesvo xana? Kuve na hina hi vanhu lava vafanaka na n'wina hi ntumbuluku; mahungu lamanene lawa hi mitiselaka wona hi lesvaku mitshika mintirho leyi ya sva hava, mihundzukela ka Xikwembu lexihanyaka, lexingayendla tilo ni misava, ni lwandle, ni svilo hinkwasvu lesvinga ka svona;

¹⁶ minkameni leyihundzeke, xipfumelelile matiko hinkwawu kufamba hi tindlela ta wona.

¹⁷ Hambi svilitano, axitshikanga kutikomba lesvi xinga svona, hi kuyendla lesvinene; ximinyikile timpfula tihuma tilweni, ni tinguva ta ntshovelo, ximiyandzisela ni svakuja, xitata timbilu ta n'wina hi kutsaka.”

¹⁸ Kambe, hambi loko vapostola vavulise svosvo, asvivavevukelanga kuyendla lesvaku xitshungu xingavahumeseli timhamba.

¹⁹ Hi loko kufika Vayuda lavahumaka Antiyoka ni le Ikoniya, vakucetela xitshungu, xikhandla Pawulo hi maribze, kutani vamukokela handle ka doropa, vapimisa lesvaku afile.

²⁰ Kambe loko vajondzisiwa vata vamurhendzela, apfuka, anghena doropeni; kutani hi siku leritlhantamaka asuka aya Derbe, na ali na Barnaba.

Ta Pawulo na Barnaba loko vatlhelela Antiyoka wa Siriya

²¹ Kuteloko na vapaluxile Evhangeli doropeni rolero ra Derbe ni kuhundzukisa vanhu lavanyingi lesvaku vava vajondzisiwa, vatlhelela Listra, ni le Ikoniya, ni le Antiyoka,

²² na vali karhi vatiyisa timbilu ta vajondzisiwa, vavakhongotela kutiyisela kupfumeleni, vaku: “Amfun'wini wa Xikwembu, hifanele kunghena hi maxangu lamanyingi.”

²³ Vavahlawulela vakulukumba akerekeni yin'wana ni yin'wana; kutani, hi kukhongela ni kutitsona svakuja, vavaveka mavokweni ya Hosi leyi avapfumelile ka yona.

²⁴ Kuteloko vatsemakanya tiko ra Pizidiya, vanghena tikweni ra Pamfiliya.

²⁵ Vajondzisa Rito Perxje, kutani vangirimela vaya Ataliya.

²⁶ Vasuka kona, vatlhelela Antiyoka hi ngalawa, kunga kona laha vakriste avavakombelelile minkateko ya Xikwembu, lesvaku vayatirha ntirho wa xona. Kutani vavuya na vahetile ntirho wakona.

²⁷ Akufikeni ka vona, vahlengeleta kereke, vavarungulela hinkwasvu lesvi Xikwembu xisviyendleke ha vona, ni hilaha xingapfulela vamatiko anyangwa yonghena kupfumeleni.

²⁸ Kutani vatshama kona nkama lowoleha na vali ni vajondzisiwa.