Timhaka 13 - Testamente Leyimpsha Xichangana

Ta kurhumiwa ka Barnaba na Sawulo

¹ Akerekeni ya le Antiyoka, akuli ni vaprofeta ni vajondzisi van'wana, vanga Barnaba, na Simiyoni lweyi avaku i Nigere na Lukiyo wa Kirena, na Manaheme lweyi angakula svin'we na hosi Heroda, na Sawulo.

² Loko vali karhi na vatitsona svakuja vagandzela Hosi, Moya Wokwetsima wuku: “Nihlawuleleni Barnaba na Sawulo, vaya ntirhweni lowu ni vavitaneleke wona.”

³ Kutani loko vatitsonile svakuja ni loko vakhongelile, vavatlhanteka mavoko, kutani vavapfulela tindlela.

Ta Vapostola loko vapaluxa Rito Kipra

⁴ Vona ke, hi kurhumiwa hi Moya Wokwetsima, vangirimela Selukiya, vanghena ngalaweni vapelela Kipra.

⁵ Loko vafikile Salamina, vapaluxa Rito ra Xikwembu masinagogeni ya Vayuda. Avali na Yohani, mupfuni wa vona.

⁶ Kuteloko vatsemakanyile xihlale hinkwaxu vayafika Pafo, vayakuma mungoma mun'we wa muprofeta wa mavunhwa; vito ra yena avaku i Bariyesu;

⁷ aatshama na Serxjiyu Pawulo, muyimeli wa vuhosi, wanuna wa kutlhariha, lweyi aavitanile Barnaba na Sawulo hikuva aalava kutwa Rito ra Xikwembu.

⁸ Kambe vasiveliwa hi munhu lweyi wa mungoma, lweyi vito rin'wana ra yena avaku i Elima; aaringeta kuyendla lesvaku muyimeli wa vuhosi angapfumeli.

⁹ Kambe Sawulo, anga yena Pawulo, atala hi Moya Wokwetsima, kutani ahonokela mungoma lweyi, aku:

¹⁰ “Wena n'wana Sathana, lweyi ateleke hi kukanganyisa hinkwaku ni kubiha hinkwaku, wena nala wa hinkwasvu lesvilulameke, xana utatshika rini kuhingakanya tindlela letolulama ta Hosi ke?

¹¹ Vona, svosvi voko ra Hosi ri le henhla ka wena, utafa mahlo, uheta masiku na ungahavoni nchumu.” Hi nomo-lo, mungoma ateliwa hi riphume ni munyama, kutani ayingayinga, alava lweyi angamufambisaka hi voko.

¹² Loko muyimeli wa vuhosi avona lesvihumeleleke, apfumela, ahlamalisiwa hi ta Hosi leti ajondzisiweke tona.

Ta Pawulo na Barnaba loko vali Antiyoka wa Pizidiya

¹³ Pawulo ni lava avali na yena, vasuka Pafo hi ngalawa, vapelela le Perxje, doropa ra Pamfiliya. Kambe Yohani ahambana na vona, atlhelela Yerusalema.

¹⁴ Loko valivona, vasuka le Perxje, vayafika doropeni ra Antiyoka wa Pizidiya; kutani vanghena sinagogeni hi siku ra Savata, vatshamisa.

¹⁵ Ndzhaku ka loko kuhlayiwile tindzimana ta Nawu ni ta Vaprofeta, vafambisi va sinagoga vavarhumela rito, vaku: “N'wina valekwerhu, loko mili ni rito rokhongotela vanhu, mingavulavula.”

¹⁶ Kolaho Pawulo asuka ayima; kutani loko avakwehletile hi voko, aku: Vavanuna va Israyele, na n'wina lavachavaka Xikwembu, yingisani:

¹⁷ Xikwembu xa tiko leri ra Vaisrayele xihlawulile vatatana va hina, kutani loko Vaisrayele lava vaha luvelile tikweni ra Gibita, Xikwembu xivakulisa, xivuya xivahumesa kona hi matimba lamakulu.

¹⁸ Kutani, lemananga, xivalehisela mbilu hi malembe ya mune wa makume.

¹⁹ Kuteloko xihelisile matiko ya ntlhanu ni mambirhi Kanana, xiyavela vatatana tiko rakona, riva rifuwo ra vona.

²⁰ Hinkwasvu lesvi svitekile malembe ya mune wa madzana ni ntlhanu wa makume (450). Ndzhaku ka svona xivanyika vayavanyisi kuyafika nkameni wa muprofeta Samuwele.

²¹ Kuteloko vakombela hosi; Xikwembu xivanyika Sawulo n'wana Kixi, wanuna wa rixaka ra Benjamini, afuma malembe ya mune wa makume.

²² Loko Xikwembu ximususile, xiveka Davhida kuva hosi ya vona; hi yena lweyi xingahlaya lesvaku wakhenseka, loko xite: Nikumile lesvaku Davhida n'wana Yese, i munhu lweyi anga wa mbilu ya mina, hikuva atayendla hinkwasvu lesvi nisvirhandzaka.

²³ Arixakeni ra yena, Xikwembu xinyikile Vaisrayele Muponisi anga Yesu, hilaha axisvitshembisile hakona.

²⁴ Loko Yesu angasihumelela, Yohani arhange apaluxa, tikweni ra Israyele hinkwaru, mahungu ya lesvaku lavahundzukaka vatakhuvuliwa.

²⁵ Kutani loko Yohani alava kuheta ntirho wa yena, ate: Xana mipimisa lesvaku ni mani ke? Aniyena lweyi mimulangutelaka; kambe vonani, wata ndzhaku ka mina lweyi svinganifanelangiki kumuhlivila masandhazi.

²⁶ “N'wina valekwerhu minga rixaka ra Abrahamu, ni van'wana lava vachavaka Xikwembu xikarhi ka n'wina: Mahungu lawa ya kuponisiwa marhumeliwile ka hina.”

²⁷ Lava vayakeke Yerusalema, ni vakulukumba va vona, avativanga lesvaku Yesu i mani, nasvona avatwisisanga marito ya vaprofeta lawa mahlayiwaka siku rin'wana ni rin'wana ra Savata. Kambe vayendlile lesvaku marito lawa mahetiseka, siku leri vathethiseke Yesu.

²⁸ Hambi loko vangakumanga nchumu xobiha ka yena lexi avafanekela kumutsemela rifu ha xona, vakombele ka Pilato lesvaku adlayiwa.

²⁹ Kuteloko vahetisisile timhaka hinkwatu letitsaliweke mayelanu na yena, vamuhawulile mhandzeni, vamulata sirheni.

³⁰ Kambe Xikwembu ximupfuxile xikarhi ka vafi;

³¹ kutani avoniwile hi masiku lamanyingi hi vajondzisiwa lavangasuka Galileya, vatlhantukela Yerusalema na vali na yena. Namuntlha hi vona vanga timboni ta yena vanhwini.

³² “Na hina ke, ha mitivisa mahungu lamanene ya xitshembiso lexi vatatana va hina vatshembisiweke xona,”

³³ hi lesvaku Xikwembu xihetisisile xitshembiso xakona ka hina vana va vona, hi kupfuxa Yesu kufeni; hi svona lesvitsaliweke ka Pisalma ya vumbirhi, leyinge: “‘U n'wananga, namuntlha ni kupsalile.’”

³⁴ Loko yili mhaka ya kumupfuxa xikarhi ka vafi lesvaku angaheli hi kubola, Xikwembu xivulise xilesvi xiku: “‘Nitaminyika minkateko leyokwetsima, yinga leyotiya leyitshembisiweke Davhida.’”

³⁵ Hikolaho xahavula ni kun'wana xiku: Ungetshiki Muhlawuliwa wa wena ahela hi kubola.

³⁶ Loko ali Davhida, ayisile makungu ya Xikwembu mahlweni, nkameni wa kuhanya ka yena, kutani atiyetlelela, alahliwa ni vatatana va yena, ava abola.

³⁷ Kambe lweyi Xikwembu ximupfuxeke kufeni, angahelanga hi kubola.

³⁸ “Svitiveni ke n'wina valekwerhu lesvaku, hikolaho ka munhu lweyi, mitivisiwa ta kurivaleliwa ka svijoho; nasvona tivani lesvaku, ka hinkwasvu lesvi amihluleka kurivaleliwa ka svona hi Nawu wa Moxe,”

³⁹ svosvi mun'wana ni mun'wana lweyi apfumelaka warivaleliwa ka svona ha Yesu.

⁴⁰ Loko svilitano, tivoneleni lesvaku kungahumeleli lesvingavuliwa hi vaprofeta loko vaku:

⁴¹ “‘Langutani n'wina vasandzi, hlamalani, miva milova, hikuva ni le kutirheni minkameni leyi ya n'wina; ntirho wakona amingawukholwi, loko vamitivisa wona.’”

⁴² Loko Pawulo na Barnaba vahuma sinagogeni, vanhu vavakombela kuta nakambe hi siku ra Savata leritlhantamaka, vatavajondzisa timhaka toleto.

⁴³ Kuteloko nhlengeletanu yihangalakile, Pawulo na Barnaba valandziwa hi Vayuda ni vamatiko lavanyingi vavukhongeli, lavayamukeliweke Xiyudeni; vapostola vavulavula na vona, vavakhongotela kutiyisela timpsalwini ta Xikwembu.

⁴⁴ Ndzhaku ka vhiki, hi siku ra Savata, vanhu lavanyingi va doropa vahlengeletana akuva vayingisa rito ra Hosi.

⁴⁵ Kambe loko Vayuda vavona mintshungu, vatala hi vukwele, kutani vakaneta ni kuyala lesvivuliwaka hi Pawulo.

⁴⁶ Kambe Pawulo na Barnaba vahlamula na vangachavi nchumu, vaku: “Asvifanela lesvaku Rito ra Xikwembu ribzeliwa n'wina kusunguleni; kambe lesvi miricukumetaka, ni lesvi mititsemelaka hi n'wexe, miku amifaneliwi hi vutomi lebzingaheliki, masvivo hina hihundzukela ka vamatiko.”

⁴⁷ Hikuva Hosi yihi leletile lesvi: “‘Nikuvekile kuva kuvonakala ka vamatiko, ni kuva ndlela ya kuponisiwa matlhelweni hinkwawu ya misava.’”

⁴⁸ Loko vamatiko vatwa lesvo, vatsaka, vadzunisa Rito ra Hosi; kutani hinkwavu lavahlawuleliweke vutomi lebzingaheliki, vapfumela.

⁴⁹ Rito ra Hosi rihangalaka tikweni hinkwaru.

⁵⁰ Kambe Vayuda vahlohlotela vavasati lavakuchaviseka va vukhongeli, ni vakulukumba va doropa; vasungula kuxanisa Pawulo na Barnaba, kutani vavahlongola tikweni ra vona.

⁵¹ Kambe vona vaphumunha ntshuri milengeni ya vona, kukomba lesvaku vahambana na vona, kutani vaya doropeni ra Ikoniya.

⁵² Loko vali vajondzisiwa, vatala hi kutsaka ni Moya Wokwetsima.