Timhaka 12 - Testamente Leyimpsha Xichangana

Ta kudlayiwa ka Yakobe ni kupfaleliwa ka Petrosi

¹ Nkameni wolowo, hosi Heroda asungula kuxanisa van'wana va kereke.

² Adlaya Yakobe makwavu wa Yohani hi tlhari.

³ Kutani loko avona lesvaku svitsakisile Vayuda, atlhela akhoma na Petrosi (amali masiku ya Xinkwa xokala comela).

⁴ Loko amukhomile, amupfalela jele, kutani aleleta lesvaku vamurindza hi mune wa mintlawa, ntlawa wun'wana ni wun'wana wuli ni mune wa masochwa. Aatilulamisele kuhumesa Petrosi mahlweni ka tiko ndzhaku ka nkhuvu wa Paska.

⁵ Hikolaho, Petrosi arindziwa na ali jele; kambe kereke ayingatshiki kumukhongelela ka Xikwembu.

Ta Petrosi loko ahumesiwa jele

⁶ Loko Heroda ali kusuhi ni kumuhumesa mahlweni ka tiko, hi vusiku bzakona, Petrosi aayetlele xikarhi ka masochwa mambirhi; aabohiwile hi machini mambirhi, nasvona valanguteli va nyangwa avarindza jele.

⁷ Kutani, hi nomo-lo, ntsumi ya Hosi yihumelela; yindlo yitala hi kuvonakala; ntsumi yihlakahla Petrosi rheveni, yimupfuxa, yiku: “Hantlisa, upfuka.” Kutani machini mawa mavokweni ya yena.

⁸ Ntsumi yiku ka yena: “Tikhame, uyambala ni masandhazi ya wena.” Ayendlisa xilesvo. Ntsumi yitlhela yiku ka yena: “Yambala ni banci ra wena, unilandza.”

⁹ Kuteloko Petrosi ahumile, na ayilandza, angativi lesvaku lesviyendliwaka hi ntsumi hi svona hakunene. Aapimisa lesvaku ingava norho.

¹⁰ Loko vahundzile ntlawa wa kusungula ni lowa vumbirhi, vafika xipfalwini xa nsimbi lexipfulekelaka doropeni; xitipfula hixoxe mahlweni ka vona, kutani vahuma, vafamba mpfhukanyana hi ndlela yakona; kutani hi nomo-lo, ntsumi yisuka yisiya Petrosi.

¹¹ Loko Petrosi axalamuka, aku: “Svosvi nasvitiva hakunene lesvaku Hosi yirhumile ntsumi ya yona, kutani yiniponisile mavokweni ya Heroda, ni ka hinkwasvu lesvi tiko ra Vayuda aritiyimisele kuniyendla svona.”

¹² Loko Petrosi avonile lesvaku timhaka tiyimile hi ndlela leyi, aya kaya ka Mariya, mamana wa Yohani lweyi avaku i Marka, laha vapfumeli lavotala avahlengeletene kona, na vali karhi vakhongela.

¹³ Petrosi agongondza nyangweni ya le handle, kutani kuta mutirhi waxisati lweyi avaku i Roda, atayingisela.

¹⁴ Loko atwile hi rito lesvaku i Petrosi, kutsakeni ka yena angapfulanga xipfalu, kambe atlhelela ndlwini hi kutsutsuma aya vativisa lesvaku Petrosi ayimile le handle nyangweni.

¹⁵ Vaku ka yena: “U ni rihuhe wena.” Kambe atiyisa lesvaku angahembi; vona vaku: “I ntsumi ya yena.”

¹⁶ Kambe Petrosi atlhela agongondza; kakuloko vapfulile, vamuvona, kutani vahlamala ngopfu.

¹⁷ Yena avakwehleta hi voko lesvaku vamiyela; avabzela hilaha Hosi yimuhumeseke jele hakona, kutani aku: “Tivisani Yakobe ni vamakwerhu Hosini timhaka toleto.” Kutani ahuma, afamba aya kun'wana.

¹⁸ Loko bzixile, masochwa mapfilungana tinhloko svinene, maku: “Kuhumelele yini ka Petrosi xana?”

¹⁹ Loko Heroda amulavile angamukumi, athethisa masochwa hubzeni, kutani aleleta lesvaku madlayiwa. Ndzhaku ka svona, Heroda asuka Yudeya, angirimelela Khezariya, ayatshama kona.

Ta kufa ka Heroda

²⁰ Heroda aalava kulwa ni va le Tiro ni va le Sidoni; kambe vona vata ka yena na vali mbilu yin'we; varhanga hi kutwanana na Blasto, mulanguteli wa yindlo ya hosi; hi loko vayakombela kurhula ka tiko, hikuva tiko ra vona arikuma svakuja hikolaho ka tiko ra hosi Heroda.

²¹ Kutani hi siku lerivekiweke, Heroda ayambala tinguvu ta vuhosi, atshama xitshan'wini xa yena, avulavula na vona.

²² Kutani vanhu vahuwelela, vaku: “Rito leri ahi ra munhu, i ra Tilo!”

²³ Hi nomo-lo, ntsumi ya Hosi yiba Heroda, hikuva aangadzunisanga Xikwembu; kutani ajiwa hi svivungu, afa.

²⁴ Rito ra Hosi ariya mahlweni, rikula ngopfu.

²⁵ Kutani loko Barnaba na Sawulo vahetile ntirho wa vona, vasuka Yerusalema, vavuya na vali na Yohani, lweyi avaku i Marka.