Timhaka 10 - Testamente Leyimpsha Xichangana

Ta Petrosi na Korneliyo

¹ Doropeni ra Khezariya akuli ni munhu lweyi avaku i Korneliyo; aali ndhuna ya dzana ra masochwa ntlaweni lowuvuliwaka “wa Italiya”;

² aali munhu wa vukhongeli, achava Xikwembu kun'we ni vamunti wa yena hinkwavu; aapfuna vanhu va tiko hi tinyiko letinyingi, angakarhali kukhongela Xikwembu.

³ Siku rin'wana, loko kulava kuva nkarhi wa vuntlhanu ni mune, otshuka avona ntsumi ya Xikwembu hi xivoniso, na yili karhi yinghena ka yena, yiku: “Korneliyo!”

⁴ Loko ayilangutisile svinene, akhomiwa hi kuchava, kutani aku: “I mpsini, Hosi?” Yiku ka yena: “Mikhongelo ya wena ni tinyiko ta wena sviyamukeliwile ka Xikwembu, kutani xikutsundzukile.

⁵ Svosvi-ke rhuma vavanuna le Yopa, vayavitana munhu lweyi vange i Simoni kumbe Petrosi.

⁶ Arhurheliwile ka Simoni mun'we wa muchuki wa svikhumba, lweyi yindlo ya yena yinga kusuhi ni tiva.”

⁷ Kuteloko ntsumi leyivulavuleke na yena yisukile, Korneliyo avitana vambirhi xikarhi ka vatirhi va yena, avitana ni sochwa rin'we lerichavaka Xikwembu xikarhi ka masochwa lawa mamutirhelaka.

⁸ Loko avahlamuselile timhaka hinkwatu, avarhuma Yopa.

⁹ Siku leritlhantamaka, loko vahali ndleleni, na vali karhi vatshinelela doropa ra Yopa, Petrosi akhwela henhla ka lwangu hi nkarhi wa vuntlhanu na wun'we, ayakhongela.

¹⁰ Kutani atwa ndlala, anavela kuja. Loko vaha mulungisela svakuja, angheniwa hi moya.

¹¹ Avona tilo ripfulekile, ni xilo lexifanaka ni lansoro lerikulu na xili karhi xixika, xinembeletiwa misaveni hi tinyihla ta mune;

¹² ndzeni ka lansoro akuli ni svivumbiwa hinkwasvu sva misava lesvifambaka hi milenge ni mavoko, ni lesvi kokovaka, ni lesvihahaka mpfhukeni.

¹³ Kutani rito rifika ka yena, riku: “Petrosi! Suka uyima, udlaya uja!”

¹⁴ Kambe Petrosi aku: “Ahihim, Hosi, ningakala ningasviyendli, hikuva anisija xilo lexiyilaka, hambi xili lexikalaka xingabasanga.”

¹⁵ Rito ritlhela riku ka yena ka vumbirhi: “Svilo lesvi Xikwembu xingavula lesvaku svibasile, ungahlayi lesvaku svayila.”

¹⁶ Svilo lesvi, svihumelela kanharhu, kutani hi nomo-lo, lansoro ritlhela ritlakuleliwa tilweni.

¹⁷ Loko Petrosi ahahlamala ngopfu xivoniso lexi axivoneke, lesvaku xingava xivula yini, kuhumelela vavanuna lavarhumiweke hi Korneliyo, vavutisa laha munti wa Simoni wunga kona, kutani vayafika nyangweni.

¹⁸ Vavitana vanhu ni kuvutisa lomu Simoni wa kuvuliwa Petrosi angavaka arhurheliwile kona.

¹⁹ Loko Petrosi ahayanakanya xivoniso lexi, Moya wuku ka yena: “Vona, ku ni vavanuna vambirhi, lava vakulavaka.

²⁰ Suka uyima, uxika, ufamba na vona ungakanakani, hikuva hi mina nivarhumeke.”

²¹ Kutani Petrosi axika, aku ka vavanuna lava: “Munhu lweyi mimulavaka hi mina lweyi; mitisiwa hi mhaka yihi ke?”

²² Vaku: “Hirhumiwile hi Korneliyo, ndhuna ya dzana ra masochwa, wanuna wa kululama lweyi achavaka Xikwembu, lweyi akhensiwaka hi tiko hinkwaru ra Vayuda; aleletiwile hi ntsumi leyokwetsima kukuvitana uta muntini wa yena, lesvaku atayingisa lesvi ungatamubzela svona.”

²³ Hi loko Petrosi avayamukela, avarhurhela ndlwini. Loko rixa, Petrosi asuka afamba na vona; van'wana vamakwavu Hosini va le Yopa vafamba na yena.

²⁴ Siku leritlhantamaka, anghena Khezariya. Korneliyo aavalangutelile, avitanile ni maxaka ya yena ni vanghanu.

²⁵ Loko Petrosi anghena, Korneliyo aya mutlhangaveta, atiwisela milengeni ya yena, amukhinsamela.

²⁶ Kambe Petrosi amusekelekisa, aku: “Sekeleka uyima, na mina ni munhu ntsena.”

²⁷ Kuteloko Petrosi anghena, na ali karhi avulavula na Korneliyo; kutani akuma vanhu lavanyingi na vahlengeletanile kona.

²⁸ Aku ka vona: “Masvitiva svinene lesvaku svayila ka Muyuda kuyendzela munhu wa rixaka rin'wana kumbe kutshama na yena; kambe Xikwembu xinikombisile lesvaku ningatshuki nibzela munhu lesvaku wayila, kumbe angabasanga.

²⁹ Hikolaho, loko nivitaniwile, nitile na ningakanakani; kutani svosvi nilava kutiva lesvaku xana minivitanele yini ke?”

³⁰ Hi loko Korneliyo ahlamula, aku: “Svosvi kuhundzile masiku manharhu, na nili karhi nikhongela ndlwini ya mina hi nkarhi wa vuntlhanu ni mune; kutani nivona munhu ayimile mahlweni ka mina, na ayambalile sva kuvangama,

³¹ aku: Korneliyo, kukhongela ka wena kuyingisiwile, ni tinyiko ta wena tiyanakanyiwile mahlweni ka Xikwembu.

³² Svosvi-ke rhuma vanhu vaya Yopa, vayavitana Simoni, lweyi vange i Petrosi; arhurheliwile ndlwini ya Simoni, muchuki wa svikhumba, kusuhi ni tiva.

³³ Hikolaho nihantlisile nirhumela vanhu ka wena; kutani uyendlile svona loko utile; svosvi-ke hinkwerhu hitshamile svin'we, laha mahlweni ka Xikwembu, kuyingisa hinkwasvu lesvi Hosi yikuleleteke svona.”

Ta Petrosi loko avulavula njangwini wa Korneliyo

³⁴ Kutani Petrosi asungula kuvulavula aku: “Svosvi natwisisa svinene lesvaku Xikwembu axiyi hi nghohe;

³⁵ kambe, matikweni hinkwawu, lweyi axichavaka avuya ayendla lesvilulameke, xamutsakela.

³⁶ Rito leri xilirhumeleke Vaisrayele, maritiva, ringa rito leripaluxaka mahungu lamanene ya kurhula ha Yesu Kriste, yena Hosi ya vanhu hinkwavu.

³⁷ Mitiva ni timhaka letihumeleleke tikweni hinkwaru ra Yudeya, tinga letisunguleke hi le Galileya, ndzhaku ka nkhuvulo lowutwalisiweke hi Yohani;

³⁸ mitiva ni ta Yesu wa Nazareta, ni hilaha Xikwembu xicheleke hakona Moya Wokwetsima ni matimba henhla ka yena. Aafambafamba hinkwaku, na ali karhi ayendla lesvinene, ahanyisa hinkwavu lava vaxanisiwaka hi Diyavulosi, hikuva Xikwembu axili na yena.

³⁹ Loko hili hina, hi timboni ta hinkwasvu lesvi asviyendleke tikweni ra Vayuda, ni le Yerusalema; hi yena lweyi vamudlayeke hi kumuhayeka mhandzeni.

⁴⁰ Kambe Xikwembu ximupfuxile kufeni hi siku ra vunharhu, kutani ximukombisile,

⁴¹ kungali ka tiko hinkwaru, kambe ka timboni leti xiti hlawuleke ka hali kusunguleni, anga hina lava hingaja na yena, hi nwa na yena, ndzhaku ka loko apfukile kufeni.

⁴² Kutani ahileletile kupaluxa Evhangeli tikweni, ni kutiyisa vumboni bza lesvaku hi yena lweyi avekiweke hi Xikwembu kuva muyavanyisi wa lavahanyaka ni lavafeke.

⁴³ Hi yena lweyi vaprofeta hinkwavu vahlayeke vumboni henhla ka yena loko vaku: ‘Mun'wana ni mun'wana lweyi apfumelaka ka yena, atakuma kurivaleliwa ka svijoho hi vito ra yena.’”

Ta vamatiko loko vanyikiwa Moya Wokwetsima

⁴⁴ Loko Petrosi ahavulavula hi timhaka toleto, Moya Wokwetsima wuxikela henhla ka hinkwavu lava avayingisaka Rito.

⁴⁵ Kutani vapfumeli va Vayuda lavateke na Petrosi, vahlamala ngopfu, loko vavona lesvaku nyiko ya Moya Wokwetsima yiyaveliwa na vona vamatiko.

⁴⁶ Hikuva avavatwa vavulavula hi tindzimi tin'wana, na vali karhi vadzunisa Xikwembu. Kutani Petrosi aku:

⁴⁷ “I mani lweyi angayalaka svosvi lesvaku vanhu lava vakhuvuliwa hi mati, lesvi vayamukeleke Moya Wokwetsima kufana na hina ke?”

⁴⁸ Kutani aleleta lesvaku vakhuvuliwa hi vito ra Yesu Kriste. Vona vamukombela lesvaku axwa na vona masiku mangali mangani.