Nhlavutelo 9 - Testamente Leyimpsha Xichangana

Ta mhalamhala ya vuntlhanu

¹ Ntsumi ya vuntlhanu yiba mhalamhala ya yona, kutani nivona nyeleti leyiweke hi le tilweni yiwela misaveni. Yinyikiwa khiya ra nomo wa khele royenta svinene rokala makumu,

² kutani yipfula nomo wa khele rakona, kuhuma musi lowufanaka ni wa xihogo lexikulu xa ndzilo. Jambu ni mpfhuka svisiviwa hi musi lowutuvikaka hi le non'weni wa khele.

³ Kutani kuhuma tinjiya hi le ximusini tita misaveni, na tinyikiwile matimba yofana ni ya svipame sva laha misaveni.

⁴ Tibzeliwile lesvaku tingawonhi bzanyi bza laha misaveni, hambi xihi na xihi lexi xinga xa rihlaza, kumbe nsinya wihi na wihi, kambe tifanela kuyela vanhu lavangaliki ni mfungu wa Xikwembu mimombzeni ya vona.

⁵ Tipfumeleliwe kuvaxanisa hi kuvaluma ntlhanu wa tihweti, kambe tingavadlayi, kufehla ka vuhlungu bzakona bzifana ni kufehla ka xipame loko xiluma munhu.

⁶ Masikwini walawo vanhu vatalava rifu, kambe avangarikumi; vatanavela kufa, kambe rifu ritavabaleka ritsutsuma rivasiya.

⁷ Tinjiya takona ativonaka na tifana ni mahanchi lawa malungiseliweke kuya nyimpini. Tinhlokweni ta tona akuli ni svofana ni tihari, tivoneka tonge i ta golidi; xivumbeko xa nghohe ya tona axifana ni nghohe ya munhu.

⁸ Misisi ya tona ayifana ni misisi ya vavasati, kasi matinyo ya tona amafana ni matinyo ya nghonyama.

⁹ Atili ni lesvifanaka ni svisirhelelo sva nsimbi svifuveni sva tona, kutani mpfumawulu wa timpapa ta tona awufana ni mpfumawulu wa tin'qolo letotala ta mahanchi letitsutsumelaka nyimpini.

¹⁰ Mincila ya tinjiya ayifana ni ya svipame na yili ni mindzhombo, kutani matimba ya tona, lawa amali mincileni ya tinjiya, amali ya kuvavisa vanhu hi ntlhanu wa tihweti.

¹¹ Atili ni hosi leyi yitifumaka, yinga ntsumi ya khele leri royenta svinene rokala makumu; vito ra yona hi Xiheberu i Abadoni, hi Xigirika vaku i Apoliyoni.

¹² Kuhundzile khombo rosungula, kambe vonani, kahata ra vumbirhi.

¹³ Kutani ntsumi ya vuntlhanu ni yin'we yiba mhalamhala ya yona. Nitwa rito lerihumaka hi le timhondzweni ta mune ta alitari ya golidi leringa mahlweni ka Xikwembu.

¹⁴ Yibzela ntsumi ya vuntlhanu ni yin'we leyinga ni mhalamhala, yiku: “Tshunxa tintsumi leti ta mune letibohiweke nambzeni lowukulu wa Ewufrata!”

¹⁵ Kutani tintsumi leti ta mune leti atitilulamiselile na tirindzela nkarhi ni siku ni hweti ni lembe, titshunxiwa lesvaku tidlaya xikhemu xin'we xa vunharhu xa vanhu va misava.

¹⁶ Ntsengo wa mab'uthu lawa amagadile mahanchi awuringana madzana mambirhi ya magidi (200 000 000); ntsengo wakona niwutwile hi tindleve.

¹⁷ Hi svona lesvi ningasvivonisa xisvona sva mahanchi, ka xivono xa mina: Vagadi va wona avayambale svisirhelelo svifuveni lesvi asvifana ni ndzilo hi kupshuka, svili sva rihlaza kukota “xjasinto” ni xivavula. Tinhloko ta mahanchi atifana ni ta tinghonyama; milon'weni ya tona akuhuma ndzilo ni musi ni xivavula.

¹⁸ Xiyenge xin'we xa vunharhu xa vanhu xidlayiwa hi mintungu leyi yinharhu; xidlayiwa hi ndzilo ni musi ni xivavula, svinga lesvi asvihuma milon'weni ya mahanchi.

¹⁹ Matimba ya mahanchi amali milon'weni ya wona ni le mincileni ya wona, hikuva mincila yoleyo ayifana ni tinyoka, yili ni tinhloko, kutani mahanchi amakota kuluma hi yona.

²⁰ Vanhu hinkwavu lavangapona kudlayiwa hi mintungu leyi, avafularhelanga lesviyendliweke hi mavoko ya vona: Avatshikanga kugandzela madimoni ni svikwembu sva hava sva golidi ni sva silivhere ni sva koporo ni sva maribze ni sva mintsandza, lesvingavoniki, svingatwiki, hambi kuli kufamba svingafambiki.

²¹ Avahundzukanga ka vudlayi, hambi ka vuloyi bza vona, hambi ka vuwosvi hambi ka vuyivi bza vona.