Nhlavutelo 8 - Testamente Leyimpsha Xichangana

Ta mfungu wa vuntlhanu ni yimbirhi

¹ Loko Xinyempfana xipfulile mfungu wa vuntlhanu ni yimbirhi, kumiyeliwa kuku zwee, letilweni, hi nkarhi lowulavaka kuringana hamfu ya wora.

² Hi loko nivona tintsumi ta ntlhanu ni timbirhi letiyimeke mahlweni ka Xikwembu, tinyikiwa timhalamhala ta ntlhanu ni timbirhi.

³ Kutani ntsumi yin'wana yita yitayima kusuhi ni alitari, na yili ni ximbitana xa golidi; yinyikiwa b'aso rinyingi ronun'hwela, lesvaku yirihumesa svin'we ni svikhongelo hinkwasvu sva vakwetsimi, henhla ka alitari ya golidi leringa mahlweni ka Xitshamu xa Vuhosi.

⁴ Musi wa b'aso ronun'hwela wutuvika wuya henhla svin'we ni svikhongelo sva vakwetsimi, kusukela vokweni ra ntsumi kuyafika mahlweni ka Xikwembu.

⁵ Kutani ntsumi yiteka ximbitana xakona yixitata hi ndzilo lowuhumaka alitarini, kutani yixihoxa misaveni. Hi loko kuva ni kudzindza ka tilo, ni marito, ni kuhatimahatima, ni kutsekatseka ka misava.

Ta timhalamhala

⁶ Kutani tintsumi leta ntlhanu ni timbirhi leti atili ni timhalamhala ta ntlhanu ni timbirhi, titilungisela kutichaya.

⁷ Ntsumi yosungula yiba mhalamhala ya yona, kutani kuva ni marhalana ni ndzilo, na svipatsiwe ni ngati, sviwela misaveni; xikhemu xin'we ka svinharhu xa misava xipsha, ni xa vunharhu xa minsinya xipsha, ni bzanyi hinkwabzu bza rihlaza bzipsha.

⁸ Ntsumi ya vumbirhi yiba mhalamhala ya yona, kutani xilo xokarhi lexifanaka ni ntshava leyikulu leyipfurhaka ndzilo, xihoxiwa lwandle. Kutani xikhemu xin'we xa vunharhu xa lwandle xihundzuka ngati.

⁹ Kufa xikhemu xin'we xa vunharhu xa svivumbiwa lesvihanyaka sva le lwandle, kuwonheka ni xa vunharhu xa tingalawa.

¹⁰ Ntsumi ya vunharhu yiba mhalamhala ya yona, kutani nyeleti leyikulu yiwa hi le tilweni yivuvumela kufana ni xisa xa ndzilo, yiwela henhla ka xikhemu xin'we xa vunharhu xa milambu, ni le svihlobzeni sva mati.

¹¹ Vito ra nyeleti yakona avaku i “Manono”, kutani xikhemu xin'we xa vunharhu xa mati xihundzuka manono, kutani vanhu lavotala vafa hi mati wolawo, hikuva amahundzukile lawa mabavaka svinene.

¹² Ntsumi ya vumune yiba mhalamhala ya yona, kutani xikhemu xin'we xa vunharhu xa jambu xitimeka, ni xa vunharhu xa n'weti, ni xa vunharhu xa tinyeleti, lesvaku xikhemu xin'we xa vunharhu xa kuvonakala ka svona xihundzuka xa ntima. Xikhemu xin'we xa vunharhu xa nhlekanhi xingahavoningi, sviva tano ni xa vunharhu xa vusiku.

¹³ Loko nilanguta, nivona ni kutwa gama rihaha na riyimba hi rito leritlakukeke tilweni, riku: “Yowee! Yowee! Yowee ka vayaki va misava, loko timhalamhala letin'wana titachayiwa hi tintsumi letinharhu leti tahasaleke.”