Nhlavutelo 7 - Testamente Leyimpsha Xichangana

Ta Vaisrayele va dzana ni mune wa makume ni mune wa makhulu (144 000) lavafungiweke

¹ Ndzhaku ka svosvo nivona mune wa tintsumi na tiyimile makhoneni ya mune ya misava, na tisivela mimoya ya mune ya misava, lesvaku ni wun'we wa yona wungahungi misaveni, kumbe lwandle, kumbe nsinyeni ni wun'we.

² Kutani nivona ntsumi yin'wana yitlhantuka hi tlhelo ra vuxa na yitamele mfungu wa Xikwembu lexi xihanyaka. Yivitana, hi rito leritlakukeke, tintsumi leti ta mune leti Xikwembu xitinyikeke matimba yowonha misava ni lwandle.

³ Ntsumi yiku: “Mingawonheni misava, kumbe lwandle, kumbe minsinya, kukondza hiheta kufunga mimombo ya malandza ya Xikwembu xa hina.”

⁴ Kutani nitwa ntsengo wa lavafungiweke: Avaringana dzana ni mune wa makume ni mune wa makhulu (144 000), wa vafungiwa lavahumaka tinyimbeni hinkwatu ta Vaisrayele.

⁵ Rixaka ra ka Yuda, lavafungiweke avaringana khume wa makhulu ni makhulu mambirhi (12 000); rixaka ra ka Rubeni avaringana khume wa makhulu ni makhulu mambirhi (12 000); rixaka ra ka Gadi, khume wa makhulu ni makhulu mambirhi (12 000);

⁶ rixaka ra ka Asere, khume wa makhulu ni makhulu mambirhi (12 000); rixaka ra ka Neftali, khume wa makhulu ni makhulu mambirhi (12 000); va ka Manase, khume wa makhulu ni makhulu mambirhi (12 000);

⁷ va ka Simiyoni, khume wa makhulu ni makhulu mambirhi (12 000); va ka Levhi, khume wa makhulu ni makhulu mambirhi (12 000); va ka Isakara, khume wa makhulu ni makhulu mambirhi (12 000);

⁸ va ka Zabuloni, khume wa makhulu ni makhulu mambirhi (12 000); va ka Yosefa, khume wa makhulu ni makhulu mambirhi (12 000); na vona va nyimba yaka Benjamini lavafungiweke, avaringana khume wa makhulu ni makhulu mambirhi (12 000).

Ta xitshungu lexikulu xohuma matikweni hinkwawu

⁹ Ndzhaku ka svosvo, nilanguta, kutani nivona xitshungu lexikulu xa vanhu. Akungali na munhu lweyi akotaka kuvakonta. Avahuma matikweni hinkwawu, ni le tinxakeni hinkwatu, na vali va svib'ongo hinkwasvu ni va tindzimi hinkwatu. Avayimile mahlweni ka xiluvelo ni le mahlweni ka Xinyempfana na vayambale sviyambalu svoleha lesvobasa, na vatamele mincindzu mavokweni ya vona.

¹⁰ Avahuwelela hi rito leritlakukeke vaku: “Kuponisiwa kuhuma ka Xikwembu xa hina lexitshameke xiluvelweni, ni le ka Xinyempfana!”

¹¹ Kutani tintsumi hinkwatu tiyima na tirhendzele xiluvelo ni vakulukumba ni svivumbiwa lesvihanyaka sva mune, tikhinsama tikorhama mahlweni ka xiluvelo, tigandzela Xikwembu,

¹² tiku: “Amen! Kuvongiwa, ni kutwala, ni vutlhari, ni kukhensiwa, ni kudzuneka, ni matimba, ni ntamu, asvive ka Xikwembu xa hina, hilaha kungaheliki! Amen.”

¹³ Kutani mun'we wa vakulukumba anivutisa aku: “I vamani lava vayambaleke sviyambalu svoleha svakubasa xana? Nakona vahuma kwihi ke?”

¹⁴ Niku ka yena: “Svotiviwa hi wena, Hosi yanga.” Hi loko aku ka mina: “Lava, hi lava vataka hi le kuxanisekeni lokukulu; vahlampseke sviyambalu sva vona, vasvibasisa sviva ni muhlovo wa ku svibasa hi ngati ya Xinyempfana.”

¹⁵ “Hikolaho, va le mahlweni ka xiluvelo xa Xikwembu, vaxitirhela vusiku ni nhlekanhi atempeleni ya xona. Kutani lweyi atshameke xitshan'wini xa vuhosi, atayanamisa tabernakele ya yena ava kusuhi na vona avasirhelela.

¹⁶ Avangahatwi ndlala kumbe torha, avangahahisiwi hi jambu hambi hi mumu,

¹⁷ hikuva Xinyempfana lexinga Xitshan'wini xa Vuhosi xitava murisi wa vona; xitavayisa svihlobzeni sva mati ya vutomi, kutani Xikwembu xitasula minhloti hinkwayu ka mahlo ya vona.”