Nhlavutelo 5 - Testamente Leyimpsha Xichangana

Ta buku leyi yipfaliweke

¹ Kutani nivona buku vokweni ra xinene ra yena lweyi atshameke xiluvelweni; ayitsaliwile ndzeni ni le handle, yilemiwile hi mimfungu ya ntlhanu ni yimbirhi.

² Nivona ni ntsumi leyi ya matimba, leyihuwelelaka i rito leritlakukeke yiku: “Xana i mani lweyi afanekeliwaka hi kunamula mimfungu, apfula buku ke?”

³ Kambe akuvanga na mun'we tilweni, hambi misaveni, kumbe hansi ka misava, lweyi akoteke kupfula buku alanguta ndzeni ka yona.

⁴ Kutani nirila hi xiviti hi mhaka ya lesvi kungapfumaleka ni mun'we lweyi afanekeliwaka hi kupfula buku kumbe kulanguta ndzeni ka yona.

⁵ Hi loko mun'we wa vakulukumba aku ka mina: “Ungarili. Vona, Nghonyama ya rixaka ra ka Yuda, Rimintsu ra Davhida, yihlulile, akuva yikota kupfula buku ni mimfungu ya rona ya ntlhanu ni yimbirhi.”

⁶ Kutani nivona Xinyempfana na xiyimile xiluvelweni, xirhendzeliwile hi svivumbiwa lesvihanyaka sva mune ni vakulukumba, na xona xili xikarhi. Xinyempfana axivoneka onge hi loko xitshama xidlayiwa; axili ni timhondzo ta ntlhanu ni timbirhi, ni mahlo ya ntlhanu ni mambirhi, lawa manga mimoya ya ntlhanu ni yimbirhi ya Xikwembu leyirhumeliweke misaveni hinkwayu.

⁷ Xinyempfana lexi, xiya xiyateka buku leyi ayili vokweni ra xinene ra lweyi atshameke xiluvelweni.

⁸ Loko xitekile buku, svivumbiwa lesvihanyaka sva mune ni vakulukumba va makume mambirhi ni mune vakhinsama mahlweni ka Xinyempfana. Mun'wana ni mun'wana wa vona aali ni harpa, ni mindzheko ya golidi leyitaleke hi b'aso ronun'hwela, yinga mikhongelo ya vakwetsimi.

⁹ Vayimbelela risimu lerimpsha vaku: “Afanekeliwa hi kuteka buku ni kupfula mimfungu ya yona, hikuva aadlayiwile, kutani hi ngati ya yena, axavile vanhu avaxavela Xikwembu, vahuma tinxakeni hinkwatu, na vali va tindzimi hinkwatu ni svib'ongo hinkwasvu ni va matiko hinkwawu.”

¹⁰ “Avayendlile tiko, ni kuva vaprista lavatirhelaka Xikwembu xa hina, kutani vatafuma misaveni.”

¹¹ Hi loko nilanguta, kutani nitwa rito ra tintsumi letotala, ta magidigidi, tirhendzele xiluvelo ni svivumbiwa lesvihanyaka sva mune ni vakulukumba.

¹² Atihuwelela hi rito leritlakukeke tiku: “Xinyempfana lexitshamaka xidlayiwa, xafaneliwa hi kunyikiwa matimba ni vuhosi ni vutlhari ni ntamu ni kudzuneka ni kutwala, ni kukhensiwa.”

¹³ Kutani nitwa svivumbiwa lesvinga tilweni ni la misaveni ni le hansi ka misava ni le lwandle, svinga svivumbiwa hinkwasvu sva ntumbuluku hinkwawu, svili karhi svikhensa sviku: “Ka lweyi atshameke xiluvelweni ni le ka Xinyempfana, akuve kukhensiwa ni kudzuneka ni kutwala ni matimba, hilaha kungaheliki.”

¹⁴ Svivumbiwa lesvihanyaka sva mune svihlamula sviku: “Amen!” Kutani vakulukumba vakhinsama vagandzela.