Nhlavutelo 4 - Testamente Leyimpsha Xichangana

Vugandzeli bza le tilweni

¹ Ndzhaku ka svosvo, nilangutile, kutani nivona xipfalu lexipfulekeke le tilweni. Kutani rito leri ningaritwa kusunguleni loko rivulavula na mina, na rifana ni mhalamhala, riyengeta riku: “Tlhantuka uta halenu, kutani nitakukomba lesvifanelaka kuhumelela ndzhaku ka lesvi.”

² Hi nomo-lo nitala hi Moya, kutani nivona xiluvelo na xivekiwile tilweni. Akutshamile munhu xiluvelweni.

³ Lweyi aatshamile ka xona aalanguteka kufana ni ribze ra nkoka ra “xjaxpe” ni ra “sardoni”, kutani xiluvelo axirhendzeliwile hi nkwangulatilo lowu wulangutekaka kufana ni “exmeralda”.

⁴ Xiluvelo axirhendzeliwile hi sviluvelo svin'wana sva makume mambirhi ni mune, na kutshamile vakulukumba va makume mambirhi ni mune ka svona, lava avayambele sviyambalu lesvobasa, na vali ni tihari ta golidi tinhlokweni.

⁵ Xiluvelweni akuhuma kuhatimahatima ni kudzindza ka tilo; kutani mahlweni ka xiluvelo akupfurha ndzilo ka tivoni ta ntlhanu ni timbirhi, yinga mimoya ya ntlhanu ni yimbirhi ya Xikwembu.

⁶ Nakona mahlweni ka xiluvelo, akuli ni lesvifanaka ni lwandle ra nghilazi, rovangama tani hi “krixtali”. Xiluvelo axirhendzeliwile hi svivumbiwa lesvihanyaka sva mune, lesvi asvili ni mahlo lawa yotala mahlweni ni le ndzhaku.

⁷ Xivumbiwa xohanya lexosungula axifana ni nghonyama; xa vumbirhi axifana ni rhole; xa vunharhu axili ni nghohe yofana ni ya munhu; kutani xa vumune axifana ni gama lerihahaka.

⁸ Xivumbiwa xin'wana ni xin'wana xa lesvihanyaka sva mune, axili ni timpapa ta ntlhanu na rin'we letingatala hi mahlo hinkwaku, ndzeni ni le handle. Kutani asviyimbelela vusiku ni nhlekanhi na svingamiyeli, sviku: “Wakwetsima, wakwetsima, wakwetsima, lweyi anga Hosi Xikwembu xa matimba hinkwawu, lweyi aali kona, lweyi anga kona, lweyi angatata.”

⁹ Nkarhi wihi ni wihi loko svivumbiwa lesvihanyaka svili karhi sviyimbelela tinsimu totwalisa, ni kudzunisa, ni kukhensa lweyi atshameke xiluvelweni, anga lweyi ahanyaka hilaha kungaheliki,

¹⁰ vakulukumba lava va makume mambirhi ni mune avakhinsama mahlweni ka lweyi atshameke xiluvelweni, vagandzela yena lweyi ahanyaka hilaha kungaheliki, vahoxa tihari ta vona mahlweni ka xiluvelo, vayimbelela vaku:

¹¹ “Svakufanela we Hosi, Xikwembu xa hina, kuyamukela kutwala, ni kudzunisiwa, ni matimba, hikuva hi wena Muyendli wa svilo hinkwasvu, kutani hi kurhandza ka wena svitumbulukile, svikuma kuhanya.”