Nhlavutelo 3 - Testamente Leyimpsha Xichangana

Ka kereke ya le Sarda

¹ “Tsalela ni ntsumi ya kereke ya le Sarda, uku: “‘Marito ya lweyi anga ni mimoya ya ntlhanu ni yimbirhi ya Xikwembu ni tinyeleti ta ntlhanu ni timbirhi, hi lawa: Nitiva mintirho ya wena: U ni vito ra lesvaku wahanya, kuve ufile.

² Pfuka uhiteka, utiyisa lesvisaleke, lesvinga kusuhi ni kufa, hikuva anikumanga mintirho ya wena na yihetisekile mahlweni ka Xikwembu.

³ Svosvi-ke, tsundzuka lesvi usviyamukeleke ni kusvitwa; svihlayise, uva uhundzuka. Loko ungapfuki uhiteka, nitata kufana ni muyivi, kutani awungatawutiva nkarhi lowu ningatata ka wena ha wona.

⁴ Nasvona, wahasele ni mavito ya vanhu vangali vangani le Sarda, lava vanganyamisangiki sviyambalu sva vona. Kutani vatafamba na mina na vayambalile sva kubasa, hikuva svivalulamelile.

⁵ Lweyi angatahlula, atayambexiwa hi mukhuva wolowo, anyikiwa sviyambalu lesvobasa. Aningasusi vito ra yena bukwini ya vutomi, nitativisa vito rakona mahlweni ka Tatana wa mina ni le mahlweni ka tintsumi ta yena.

⁶ “‘Lweyi anga ni tindleve aayingise lesvi Moya wusvibzelaka tikereke.’

Ka kereke ya le Filadelfiya

⁷ “Tsalela ni ntsumi ya kereke ya le Filadelfiya, uku: “‘Lweyi akwetsimeke, lweyi anga wa ntiyiso, lweyi atameleke khiya ra Davhida, lweyi apfulaka kungapfali munhu, lweyi apfalaka kungapfuli munhu, avula svosvo ali:

⁸ Nitiva mintirho ya wena. Vona, nivekile mahlweni ka wena xipfalu lexipfulekeke, lexi kungaliki na mun'we lweyi angakotaka kuxipfala. Nasvitiva lesvaku matimba ya wena i matsongo, kambe rito ra mina urihlayisile, ni vito ra mina awuriyalanga.

⁹ Vona, loko vali va ntlawa wa ka Sathana, vahembi lavativulaka Vayuda kuve ahi vona, nitayendla lesvaku vata, vatakhinsama mahlweni ka wena vakugandzela; vatativa lesvaku nikurhandzile.

¹⁰ Lesvi ungahlayisa rito ra mina ra lesvaku ufanela kutiyisela, na mina nitakusirhelela nkarhini wa ndzingo lowu wungatata misaveni hinkwayu, kutaringa vayaki va misava.

¹¹ Nitata kungali khale. Hlayisa lesvi unga na svona, lesvaku kungavi na lweyi angatakutekela hari ya wena.

¹² Lweyi angatahlula, nitamuyendla nsika leyikulu Tempeleni ya Xikwembu xa mina, kutani angakala angahumesiwi ka yona. Nitatsala henhla ka yena vito ra Xikwembu xa mina, ni Vito ra doropa ra Xikwembu xa mina, anga Yerusalema lwemumpsha leri rixikaka hi le tilweni rihuma ka Xikwembu xa mina; nitatsala ni vito lerimpsha ra mina henhla ka yena.

¹³ “‘Lweyi anga ni tindleve, aayingise lesvi Moya wusvibzelaka tikereke.’

Ka kereke ya le Lawudokiya

¹⁴ “Tsalela ni ntsumi ya kereke ya le Lawudokiya, uku: “‘Marito ya lweyi anga Amen, mboni leyitshembekeke ya ntiyiso, masungulu ya lesvitumbuluxiweke hi Xikwembu, hi lawa:

¹⁵ Nitiva mintirho ya wena, ni lesvaku awutitimeli, nasvona awuhisi. Asvitayampsa loko awutitimela, kumbe uhisa.

¹⁶ Kambe lesvi ukufumelaka, ungahisiki, nasvona ungatitimeliki, nitakukampfula non'weni wa mina.

¹⁷ Uvula lesvaku ufuwile, nakona u mufuwi, awupfumali nchumu, kasi awusvitivi lesvaku u mutsandzeki ni muxaniseki ni xisiwana ni xifamahlo ni lesvaku awuyambalanga nchumu!

¹⁸ Loko svilitano, nakukhutaza lesvaku uxava ka mina golidi leyi yibasisiweke yiva yisasekisiwa hi ndzilo, lesvaku uva xipfundzi; xava ni sviyambalu svobasa lesvaku usviyambala, ufunengeta tingana ta vusveti bza wena lesvaku bzingavoneki; xava ni murhi wotota mahlo ya wena lesvaku utakota kuvona.

¹⁹ Nitshinya ni kukhatisa lava nivarhandzaka; hikolaho, tikarhate uhundzuka!

²⁰ Vona, niyimile nyangweni, nagongondza. Loko munhu atwa rito ra mina apfula xipfalu, nitanghena kaya ka yena nija na yena, na yena ataja na mina.

²¹ Lweyi ahlulaka, nitamunyika kutshama na mina xiluvelweni xa mina, kukotisa lesvi na mina hi xiviri nihluleke, kutani nitshamaka ni Tatana wa mina xiluvelweni xa yena.

²² “‘Lweyi anga ni tindleve, aayingise lesvi Moya wusvibzelaka tikereke.’”