Nhlavutelo 22 - Testamente Leyimpsha Xichangana

¹ Kutani ntsumi yinikomba nambu wa mati ya vutomi lowuvangamaka kufana ni “krixtali”, wukhuluka wuhuma Xitshan'wini xa Vuhosi xa Xikwembu ni xa Xinyempfana.

² Xikarhi ka ntsendzele wa doropa ni le matlhelweni ya nambu seni ni seniya, akuli ni nsinya wa vutomi lowupsalaka khume ra mihandzu ni yimbirhi, wupsala mihandzu yakona hweti yin'wana ni yin'wana; nasvona matluka ya nsinya wakona matirhela kujaha vanhu va matiko hinkwawu.

³ Akungahavi na nchumu lexingarhukiwa kona. Xitshamu xa Vuhosi xa Xikwembu ni xa Xinyempfana xitava ndzeni ka doropa, kutani malandza ya xona mataxitirhela.

⁴ Vatavona nghohe ya xona, ni vito ra xona ritava mimombzeni ya vona.

⁵ Vusiku abzingahavi kona, avangahavileli rivoni kumbe jambu, hikuva Hosi Xikwembu xitava kuvonakala ka vona, kutani vatafuma hilaha kungaheliki.

Ta kuta ka Kriste

⁶ Kutani ntsumi yiku ka mina: “Marito lawa matshembeka, ma ni ntiyiso. Hosi Xikwembu, xona lexinyikaka vaprofeta Moya wa xona, xirhumele ntsumi ya xona kukomba malandza ya xona svilo lesvi svifanelaka kuhumelela kungali khale.”

⁷ Yesu ali: “Vonani, nata svosvisvosvi. Kukatekile lweyi ahlayisaka marito ya vuprofeta bza buku leyi.”

⁸ Hi mina Yohani hi xiviri ningatwa ni kuvona svilo lesvi. Kutani loko nisvitwile ni kusvivona, niwa hi matsolo, kugandzela milengeni ya ntsumi leyi yinikombeke svona.

⁹ Kambe yiku ka mina: “Ungatshuki uyendla svosvo! Mina ni nandza ntsena, kukota wena ni vamakwenu, vanga vaprofeta ni hinkwavu lavahlayisaka marito ya buku leyi. Gandzela Xikwembu!”

¹⁰ Yitlhela yiku ka mina: “Ungalemi marito ya vuprofeta bza buku leyi, hikuva nkarhi wukusuhi.

¹¹ Lweyi ayendlaka lesvobiha aaye mahlweni ayendla lesvobiha, wa chaka aaye mahlweni na rona, lweyi alulameke, aaye mahlweni ayendla lesvolulama, ni lweyi akwetsimeke aaye mahlweni atikwetsimisa nakambe.”

¹² Yesu ali: “Vonani, nata svosvisvosvi, nita ni hakelo ya mina, kutahakela mun'wana ni mun'wana hi kuya hi lesvi asviyendleke.

¹³ Hi mina Alfa na Omega, lweyi worhanga ni lweyi wohetelela, kusungula ni kuhela.”

¹⁴ Kukatekile lavahlampsaka sviyambalu sva vona, lesvaku vatava ni matimba ya kuja nsinya wa vutomi, ni kunghena doropeni hi minyangwa ya rona.

¹⁵ Lava vasalaka handle ka doropa hi lava vayendlaka lesvobiha, ni valoyi, ni vawosvi, ni vadlayi, ni lavagandzelaka svikwembu sva hava, ni hinkwavu lavatsakelaka vunhwa ni kuhanya ha rona.

¹⁶ Yesu ali: “Nirhumile ntsumi ya mina tikerekeni lesvaku yimitivisa ntiyiso wa svilo lesvi. Hi mina rimintsu ra Davhida, ni wa rixaka ra yena, nyeleti leyovangama ya mixo.”

¹⁷ Moya ni Mutekiwa vali: “Tana! Ni lweyi asvitwaka aavule aku: ‘Tana!’ Lweyi anga ni torha aate; ni lweyi asvinavelaka aanwe mati ya vutomi mahala, angahakeli.”

¹⁸ Mina Yohani nitivisa mani na mani lweyi atwaka marito ya vuprofeta bza buku leyi, nili: Loko munhu ayengetela svin'wana ka wona, Xikwembu xitayengetela ka yena mintungu leyitsaliweke bukwini leyi.

¹⁹ Ni loko mun'wana angasusa svin'wana ka marito ya vuprofeta bza buku leyi, Xikwembu xitamusivela kuja mihandzu ya nsinya wa vutomi, ni kutshama doropeni Lerokwetsima, svinga svilo lesvihlamuseliweke bukwini leyi.

²⁰ Yena lweyi ativisaka ntiyiso wa timhaka leti, ali: “Hakunene, nata svosvisvosvi.” Amen, tana Hosi Yesu!

²¹ Timpsalu ta Hosi Yesu ative ni hinkwavu!