Nhlavutelo 20 - Testamente Leyimpsha Xichangana

Sathana abohiwa hi malembe ya khulu (1 000)

¹ Kutani nivona ntsumi leyixikaka hi le tilweni, na yitamele khiya ra khele leroyenta rokala makumu, yitamele ni chini lerikulu.

² Kutani yikhoma dragona, nyoka leyi ya khale yiriboha nkarhi woringana malembe ya khulu (1 000).

³ Yirihoxa kheleni, yipfala, yilema ndzeni, yiveka ni mfungu lesvaku ringahayi mahlweni hi kukanganyisa vanhu vamatiko, kukondza kuhundza malembe ya khulu (1 000). Ndzhaku ka svona, rifanela kutshunxiwa nkarhinyana.

⁴ Kutani nivona svitshamu sva vuhosi; lavatshameke ka svona, vanyikiwa matimba ya kuyavanyisa. Nasvona, nivona mimoya ya lava vatsemiweke tinhloko hi mhaka ya kupaluxa vumboni bza vona ha Yesu ni kuvula Rito ra Xikwembu. Avagandzelanga xivandzana kumbe xifaniso xa xona, avafungiwanga hi mfungu wa xona mimombzeni ya vona, kumbe mavokweni ya vona. Kutani hi loko vatlhela vahanya, vafuma na Kriste malembe ya khulu (1 000).

⁵ Kambe, vafi van'wana avatlhelanga vahanya, kukondza kuhundza malembe ya khulu (1 000). Xilesvo, loku i kupfuka korhanga kufeni.

⁶ Munhu lweyi avonaka kupfuka kufeni lokorhanga, akatekile, nasvona akwetsimile. Rifu ra vumbirhi ari na matimba henhla ka vanhu lavotano, kambe vatava vaprista va Xikwembu ni va Kriste, kutani vatafuma svin'we na Kriste malembe ya khulu (1 000).

⁷ Loko malembe ya khulu (1 000) matava mahelile, Sathana atatshunxiwa jele lomu apfaleliweke kona,

⁸ kutani atahuma akanganyisa vamatiko lavayakeke matlhelweni hinkwawu ya misava, vanga vona va ka Goge na Magoge. Sathana atahuma nyimpi na vona, na vafana ni misava ya lwandle hi kutala.

⁹ Kutani vahuma vahangalaka misaveni hinkwayu, varhendzela magovela ya vahlawuliwa va Xikwembu svin'we ni doropa lerirhandzekaka; kambe ndzilo wuxika hi le tilweni wuvahisa vaku mbii.

¹⁰ Diyavulosi lweyi aavakanganyisa ahoxiwa tiveni ra ndzilo ni xivavula, laha xivandzana ni muprofeta wa mavunhwa vanga kona, kutani vataxanisiwa vusiku ni nhlekanhi hilaha kungaheliki.

Ta kuhluliwa ka Sathana

¹¹ Kutani nivona Xitshamu xa Vuhosi lexikulu xobasa, na yena lweyi atshameke ka xona; loko tilo ni misava svimuvona, svibaleka sviya kule, kutani ndhawu ya svona ayahavanga kona.

¹² Nasvona, nivona vafi, lavakulu ni lavatsongo, na vayimile mahlweni ka Xitshamu xa Vuhosi, kutani tibuku tipfuliwa. Kupfuliwa ni buku yin'wanyana, yinga buku ya vutomi. Vafi vayavanyisiwa mayelanu ni lesvi svingatsaliwa tibukwini, hi kuya hi lesvi vasviyendleke.

¹³ Lwandle ritlhelisa lavafeleke ka rona. Rifu ni Tihele svitlhelisa vafi lava avali ka svona, kutani hinkwavu vayavanyisiwa mayelanu ni lesvi vasviyendleke.

¹⁴ Rifu ni Tihele svihoxiwa tiveni ra ndzilo, ringa rona rifu ra vumbirhi.

¹⁵ Loko vito ra munhu ringakumiwi na ritsaliwile bukwini ya vutomi, munhu yelweyo ahoxiwa tiveni ra ndzilo.