Nhlavutelo 2 - Testamente Leyimpsha Xichangana

Ka kereke ya le Efesa

¹ Tsalela ntsumi ya kereke ya le Efesa, uku: Marito ya lweyi atamelaka tinyeleti ta ntlhanu ni timbirhi vokweni ra yena ra xinene, lweyi afambaka xikarhi ka svitlhomativoni sva ntlhanu ni svimbirhi sva golidi, hi lawa:

² Nitiva mintirho ya wena, ni kutikarhata ka wena, ni kutiyisela ka wena. Nitiva lesvaku awukoti kutwanana ni vanhu lavohomboloka; nasvona uxiyaxiyile svinene lavativulaka vapostola, na vangali vona, kutani usvivonile lesvaku vahemba.

³ Nasvona waxaniseka kambe watiyisela; utwisiwe kuvaviseka hikolaho ka vito ra mina, kambe awukarhalanga.

⁴ Hambi svilitano, ku ni lexi univilelisaka ha xona: Hi lesvaku utshikile rirhandzu leri awuli na rona kusunguleni.

⁵ Hikolaho-ke, tsundzuka laha ungawa kona, kutani hundzuka uvuyela mintirhweni leyi awuyiyendla kusunguleni. Loko svingalitano, nitata ka wena, nitasusa xitlhomativoni xa wena laha xinga kona, loko ungahundzuki.

⁶ Hambi svilitano, lesvinene lesvi unga na svona hi lesvi: Uvenga mintirho ya Vanikolayiti, leyi na mina niyivengaka.

⁷ Lweyi anga ni tindleve aayingise lesvi Moya wusvibzelaka tikereke. Lweyi angatahlula, nitamunyika kuja mihandzu ya nsinya wa vutomi lowunga Paradiseni ya Xikwembu.

Ka kereke ya le Smirna

⁸ Tsalela ni ntsumi ya kereke ya le Smirna, uku: Marito ya lweyi wosungula ni lweyi wogamesa, lweyi afeke atlhela apfuka, hi lawa:

⁹ Nitiva maxangu ya wena ni vusiwana bza wena (kambe u xipfundzi), nitiva ni kusandziwa ka wena hi lava vativulaka Vayuda, na vangali vona, kambe na vali va Sinagoga ya Sathana.

¹⁰ Ungachavi lesvinga kusuhi ni kukutwisa kuvava. Vona, Diyavulosi alava kuhoxa van'wana va n'wina jele, lesvaku mitaringiwa, kutani mitava ni kuxaniseka loku kungataheta khume ra masiku. Vana lweyi atshembekaka kufika kufeni, kutani mina nitakunyika hari ya vutomi.

¹¹ Lweyi anga ni tindleve aayingise lesvi Moya wusvibzelaka tikereke. Lweyi ahlulaka, angakala angavavisiwi hi rifu ra vumbirhi.

Ka kereke ya le Pergamo

¹² Tsalela ni ntsumi ya kereke ya le Pergamo, uku: Marito ya lweyi anga ni tlhari lerilotiweke hi matlhelo ha mambirhi, hi lawa:

¹³ Nitiva laha uyakeke kona, laha xiluvelo xa Sathana xinga kona, ukhome svitiya vitweni ra mina, nasvona awulandzulanga kupfumela ka wena ka mina, hambi masikwini ya kudlayiwa ka Antipasi, mboni ya mina leyotshembeka leyidlayiweke xikarhi ka n'wina, laha Sathana ayakeke kona.

¹⁴ Kambe, ku ni svilo svingali svingani lesvi univilelisaka hi svona: Hi lesvaku ku ni van'wana lava unga na vona kolaho, lavakhomeleleke jondzweni ya Balamu, lweyi akuceteleke Balaka kurhiya mintlhamu mahlweni ka Vaisrayele, lesvaku vaja svakuja sva timhamba lesvihumeseliweke svikwembu sva hava, vayendla ni vuwosvi.

¹⁵ Hi mukhuva wolowo na wena u ni van'wana lava valandzelaka jondzo ya Vanikolayiti.

¹⁶ Hundzuka ke! Loko ungahundzuki, nitahantla nikutela koseyo, nitalwa ni vanhu vakona hi tlhari ra nomo wa mina.

¹⁷ Lweyi anga ni tindleve, aayingise lesvi Moya wusvibzelaka tikereke. Lweyi angatahlula, nitamunyika kuja amana leyifihliweke; nasvona nitamunyika ribze lerobasa, leri vito lerimpsha ritsaliweke henhla ka rona, vito leri kungaliki na lweyi aritivaka handle ka lweyi anyikiwaka rona.

Ka kereke ya le Tiyatira

¹⁸ Tsalela ni ntsumi ya kereke ya le Tiyatira, uku: Marito ya N'wana wa Xikwembu, lweyi anga ni mahlo lawa mafanaka ni malangavi ya ndzilo, lweyi minkondzo ya yena yifanaka ni koporo leyipolichiweke, hi lawa:

¹⁹ Nitiva mintirho ya wena, rirhandzu ra wena ni kutshembeka ka wena, ni migingiriko ya wena, ni kutiyisela ka wena, ni lesvaku mintirho ya wena ya svosvi yitlula leyosungula.

²⁰ Kambe ku ni lexi univilelisaka hi xona: Hi lesvaku utshika Jezabele, wansati lweyi ativulaka muprofeta, aya mahlweni ni mintirho ya yena, kasi ajondzisa ni kukanganyisa malandza ya mina kuyendla vuwosvi ni kuja svakuja lesvihumeseliweke svikwembu sva hava.

²¹ Nimunyikile nkarhi lesvaku ahundzuka, kambe wayala kuhundzuka atshika vuwosvi bza yena.

²² Vona, nitamuwisela sangwini ra mavabzi, kutani lavayendlaka vuwosvi na yena nitavavangela maxangu lamakulu, loko vangahundzuki vatshika kuyendla lesvi vasviyendlaka.

²³ Nitadlaya vana va yena, kutani tikereke hinkwatu titativa lesvaku hi mina lweyi akambisisaka miyanakanyu ni timbilu. Kutani nitayavanyisa mun'wana ni mun'wana hi kuya hi mintirho ya n'wina.

²⁴ Kambe n'wina ni van'wana va le Tiyatira, lavangafambiki mayelanu ni jondzo leyi, n'wina mingajondzangiki lesvi van'wana vasvivulaka svihundla sva kuyeta sva Sathana, nili ka n'wina: Anahamirhwexi ndzhwalu wun'wana.

²⁵ Ntsena khomani svitiya ka lesvi minga na svona, kukondza nita.

²⁶ Lweyi ahlulaka ni kuhlayisa mintirho ya mina kufikela makumu, nitamunyika matimba yofuma matiko,

²⁷ kutani atamarisa hi nhonga ya nsimbi, amafayetela kukota timbita ta vumba,

²⁸ kufana ni lesvi na mina hi xiviri ninyikiweke matimba ya kufuma hi Tatana wa mina. Kutani nitamunyika nyeleti ya mixo.

²⁹ Lweyi anga ni tindleve aayingise lesvi Moya wusvibzelaka tikereke.