Nhlavutelo 17 - Testamente Leyimpsha Xichangana

Ta kuyavanyisiwa ka muwosvi lwenkulu

¹ Kutani yin'we ka tintsumi leta ntlhanu ni timbirhi leti atili ni mindzheko ya ntlhanu ni yimbirhi, yita yiku ka mina: “Tana, nitakukomba hilaha muwosvi lwenkulu, lweyi atshameke henhla ka mati layotala, angatayavanyisiwa hakona,

² lweyi tihosi ta misava tiwosvaneke na yena, lweyi angadakwisa vayaki va laha misaveni hi vhinyu ra vuwosvi bza yena.”

³ Hi loko ntsumi yiniteka, yiniyisa mananga hi Moya. Kutani nivona wansati na atshamile henhla ka xivandzana xopshuka lexi axitele hinkwaku hi mavito yosandza Xikwembu; xivandzana xakona axili ni tinhloko ta ntlhanu ni timbirhi ni timhondzo ta khume.

⁴ Wansati lweyi aayambale sviyambalu svovangama sva xivunguvungu ni lesvopshuka, nasvona aatisasekisile hi golidi, ni maribze ya risima ngopfu, ni tinwarhu ta nxavu wa kudura; vokweni ra yena aatamele ndzheko woyendliwa hi golidi lowutaleke hi svilo sva manyala ni chaka ra vuwosvi bza yena.

⁵ Mombzeni wa yena akutsaliwile vito leri nhlamuselo ya rona wunga wa xihundla, lowunge: “BABILONA LWENKULU, MAMANA WA TINGHWAVANA NI WA LAVAYENDLAKA SVA MANYALA LAHA MISAVENI.”

⁶ Kutani nivona wansati lweyi, aadakwisiwile hi ngati ya vahlawuliwa va Xikwembu ni ngati ya lavadlayiweke hi mhaka ya kulandza Yesu. Loko nimuvona, nihlamala ngopfu.

⁷ Kambe ntsumi yiku ka mina: “Uhlamalela yini? Nitakubzela xihundla xa wansati lweyi, ni xa xivandzana lexi atshameke henhla ka xona, xa tinhloko ta ntlhanu ni timbirhi ni timhondzo ta khume.

⁸ Xivandzana lexi uxivoneke, axili kona, kutani axahali kona, kambe xitafanela kutlhantuka xihuma hi le kheleni leroyenta svinene rokala makumu, xiya kuloveni. Kutani vayaki va laha misaveni, lava mavito ya vona makalaka mangatsaliwanga bukwini ya vutomi khale, na misava yingasitumbuluka, vatahlamala kuvona xivandzana, hikuva axili kona, kutani axahali kona, kambe xitafanela kutlhela xiva kona.

⁹ “Lesvi svilava miyanakanyu ya vutlhari. Tinhloko leti ta ntlhanu ni timbirhi i tintshava ta ntlhanu ni timbirhi leti wansati atshameke henhla ka tona. Nasvona, i tihosi ta ntlhanu ni timbirhi;

¹⁰ ntlhanu wa tona tiwile, yin'wana yi kona, leyi yin'wana ayisita, kambe loko yita, yitafanela kuva kona nkarhinyana ntsena.

¹¹ Loko xili xivandzana lexi axili kona, lexi svosvi xingahaliki kona, i hosi ya vuntlhanu ni tinharhu, kambe i yin'we ni letosungula ta ntlhanu ni timbirhi, kutani xivandzana xexo xiya kuloveni.

¹² “Timhondzo ta khume leti utivoneke i tihosi ta khume; atisinyikiwa kufuma, kambe titanyikiwa matimba ya vuhosi kuringana nkarhinyana ntsena, na tili ni xivandzana.

¹³ Tihosi leti ti ni kupimisa kofana, kutani tinyika ntamu wa tona ni matimba ya tona ka xivandzana.

¹⁴ Titalwa ni Xinyempfana, kambe Xinyempfana xitatihlula, hikuva i Hosi ya tihosi, ni Mufumi wa vafumi; ni malandza ya xona lawa mavitaniweke, lawa mahlawuliweke ni lawa matshembekaka, xitamanyika kuhlula.”

¹⁵ Kutani ntsumi yitlhela yiku ka mina: “Mati lawa umavoneke, laha kungatshama wansati lweyi wa muwosvi, i vanhu va svib'ongo lesvotala ni xitshungu lexikulu, i vanhu vamatiko layotala ni tindzimi letotala.

¹⁶ Timhondzo ta khume leti utivoneke, ka xivandzana, hi tona tingatavenga ni kukwatisa wansati lweyi wa muwosvi, titayendla lesvaku ava xisiwana ni kusala na angayambalanga nchumu, titaja nyama ya yena, timuhisa hi ndzilo.

¹⁷ Hikuva Xikwembu xinghenisile timbilwini ta tona lesvaku tiyisa mahlweni makungu ya tona: Hi kutwanana ka tona, titanyika matimba ya vuhosi bza tona ka xivandzana, kukondza marito ya Xikwembu mahetiseka.

¹⁸ “Loko ali wansati lweyi umuvoneke, i doropa lerikulu, lerifumaka tihosi ta misava.”