Nhlavutelo 16 - Testamente Leyimpsha Xichangana

Ta mindzheko ya vukarhi bza Xikwembu

¹ Kutani nitwa rito leritlakukeke na rihuma Tempeleni, riku ka tintsumi leti ta ntlhanu ni timbirhi: “Yanani, miyachulula misaveni lesvi svinga ka mindzheko leyi ya ntlhanu ni yimbirhi ya vukarhi bza Xikwembu.”

² Ntsumi yorhanga yiyachulula lesvi asvili ndzhekweni wa yona misaveni. Kutani vanhu lavanga ni mfungu wa xivandzana, vanga lavagandzelaka xifaniso xa xona, vahuma svilondza lesvonyenyentsa, svovavisa ngopfu.

³ Ntsumi ya vumbirhi yichulula lesvi asvili ndzhekweni wa yona lwandle, kutani lwandle rihundzuka rifana ni ngati ya munhu lweyi afeke; kutani hinkwasvu lesvihanyaka lwandle svifa.

⁴ Ntsumi ya vunharhu yichulula lesvi asvili ndzhekweni wa yona minambzeni ni le svihlobzeni sva mati, kutani svihundzuka ngati.

⁵ Hi loko nitwa ntsumi leyinga ni matimba henhla ka sva mati yiku: “Ululamile kuyavanyiseni ka wena, wena lweyi akwetsimeke, wena lweyi anga kona, lweyi aali kona.

⁶ Hikuva vanhu lava vahalatile ngati ya vahlawuliwa va wena ni ya vaprofeta, kutani uvanyikile ngati vanwa. I hakelo ya vona.”

⁷ Kutani nitwa rito lerihumaka hi le alitarini riku: “Ina, we Hosi Xikwembu xa matimba hinkwawu, kuyavanyisa ka wena katshembeka, kululamile.”

⁸ Ntsumi ya vumune yichulula lesvi asvili ndzhekweni wa yona ka jambu, kutani jambu ripfumeleliwa kuhisa vanhu hi ndzilo.

⁹ Vanhu vapsha hi kuhisa loku kuchavisaka ngopfu, kutani varhuketela vito ra Xikwembu lexinga ni matimba henhla ka mintungu leyi, kambe avahundzukanga, ni kuxidzunisa avaxidzunisanga.

¹⁰ Ntsumi ya vuntlhanu yichulula lesvi asvili ndzhekweni wa yona xiluvelweni xa xivandzana. Hi loko mfumu wa xona wufunengetiwa hi munyama, kutani vanhu vatiluma tindzimi hikolaho ka kuvaviseka;

¹¹ varhuketela Xikwembu xa le matilweni, hi mhaka ya kutwa kuvava ni kuxaniseka hi svilondza, kambe avahundzukanga mintirhweni ya vona.

¹² Ntsumi ya vuntlhanu ni yin'we yichulula lesvi asvili ndzhekweni wa yona nambzeni lowukulu wa Ewufrata, kutani mati ya wona mapsha lesvaku ndlela ya tihosi letitaka hi le vuxeni yipfuleka.

¹³ Hi loko nivona mimoya yinharhu leyi ya chaka yofana ni makhele, na yihuma hi le non'weni wa dragona, ni le non'weni wa xivandzana, ni le non'weni wa muprofeta wa mavunhwa.

¹⁴ Leyi i mimoya ya madimoni leyiyendlaka masingita, leyirhendzelekaka ka tihosi ta misava hinkwayu, yirhamba nyimpi, kuyalwa ni Xikwembu xa matimba hinkwawu hi siku lerikulu leritaka.

¹⁵ (“Languta, nata kufana ni muyivi. Kukatekile lweyi ahitekaka, lweyi ahlayisaka sviyambalu sva yena, lesvaku angafambi na angayambalanga, kutani kuvoneka tingana takwe!”)

¹⁶ Kutani mimoya yihlengeleta tihosi ndhawini leyi vange i Armaxjedoni hi ririmi ra Xiheberu.

¹⁷ Ntsumi ya vuntlhanu ni timbirhi yichulula lesvi asvili ndzhekweni wa yona mpfhukeni, kutani kutwala rito lerotlakuka, na rihuma hi le Xitshan'wini xa Vuhosi Tempeleni ya tilo, riku: “Sviyendlekile!”

¹⁸ Kutani kuva ni kudzindza ni kuhatimahatima ni marito ni kutsekatseka lokukulu ka misava, loku akutshukanga kuva kona kusukela loko vanhu vavile kona laha misaveni; kutsekatseka loko kuvile ka matimba ni lokukulu svinene.

¹⁹ Kutani, doropa lerikulu rikhemeka kuhuma svikhemu svinharhu, kutani madoropa ya vamatiko mahirimuka. Hi loko Xikwembu xitsundzuka Babilona, doropa lerikulu, kulinwisa ndzheko wa vhinyu ra vukarhi lebzikulu bza xona.

²⁰ Svihlale hinkwasvu svinyamalala, ni tintshava tingahali kona.

²¹ Hi loko ku na mpfula ya marhalana lamakulu ngopfu, maribze yakona amali ya mpimo wa mune wa makume ya makilu, mawa hi le tilweni, mawela vanhu vakondza varhuketela Xikwembu hi mhaka ya ntungu wa marhalana. Hikuva, ntungu wakona awuli wukulu nasvona awuchavisa ngopfu.