Nhlavutelo 14 - Testamente Leyimpsha Xichangana

Ta risimu ra vakutsuliwa va dzana ni mune wa makume ni mune wa makhulu (144 000)

¹ Nilanguta, kutani nivona Xinyempfana na xiyimile ntshaveni ya Siyoni, na xili ni vanhu va dzana ni mune wa makume ni mune wa makhulu (144 000) lava mimombo ya vona yitsaliweke vito ra xona ni ra Tatana wa xona.

² Kutani nitwa rito rihuma tilweni rifana ni mpfumawulu wa mati layotala, ni mpfumawulu wa kudzindza lokukulu; rito leri niritweke arifana ni mpfumawulu wa tiharipa loko tichayiwa hi vachayi va tona.

³ Vayimbelela lesvifanaka ni risimu lerimpsha, na vali mahlweni ka xiluvelo ni le mahlweni ka svivumbiwa lesvihanyaka sva mune, ni le mahlweni ka vakulukumba. Akuli hava ni mun'we lweyi akotaka kujondza risimu rakona handle ka lava va dzana ni mune wa makume ni mune wa makhulu (144 000), lavakutsuliweke misaveni.

⁴ Lava, hi lava vangatinyamisangiki hi vavasati, hikuva vatengile. Hi lava valandzelelaka Xinyempfana hinkwaku lomu xiyaka kona. Lava hi lava vakutsuliweke xikarhi ka vanhu lesvaku vava mihandzu yorhanga ya ntshovelo, vahumeseliwa Xikwembu ni Xinyempfana.

⁵ Akuhumanga vunhwa milon'wini ya vona ni siku ni rin'we; vahava xivati.

Ta tintsumi leti tinharhu

⁶ Kutani nivona ntsumi yin'wana na yili karhi yihaha hi le xikarhi ka tilo, na yili ni Evhangeli leyingaheliki, lesvaku yitayipaluxa ka lava vayakeke misaveni, ka vanhu va matiko hinkwawu, ni va tinxaka hinkwatu, ni va tindzimi hinkwatu, ni va svib'ongo hinkwasvu.

⁷ Kutani yitlakusa rito yiku: “Chavani Xikwembu, mixidzunisa, hikuva nkarhi wa xona wa kuyavanyisa wufikile. Mugandzeleni, yena muyendli wa tilo ni misava ni wa lwandle ni svihlovo sva mati.”

⁸ Kulandza ntsumi yin'wana ya vumbirhi, yiku: “Awile, awile Babilona, doropa lerikulu, rona leri ringanwisa vanhu va matiko hinkwawu vhinyu lerobava ra vuwosvi bza rona!”

⁹ Kutani kulandza ntsumi yin'wana ya vunharhu, yitlakusa rito yiku: “Mun'wana ni mun'wana lweyi agandzelaka xivandzana ni xifaniso xa xona, atlhela akuma ni mfungu mombzeni wa yena kumbe vokweni ra yena,

¹⁰ na yena atanwa vhinyu ra vukarhi bza Xikwembu, leringatacheliwa xinwelweni xa kukariha loku ka xona, na ringatimuliwanga; kutani ataxanisiwa hi ndzilo ni xivavula, mahlweni ka tintsumi letokwetsima ni le mahlweni ka Xinyempfana.

¹¹ Kutani musi wa ndzilo lowu wuvaxanisaka wutuvikela henhla hilaha kungaheliki; lavagandzelaka xivandzana ni xifaniso xa xona, svin'we ni hinkwavu lava vayamukeleke mfungu wa vito ra xona, avakumi kuwisa, vaxaniseka vusiku ni nhlekanhi.”

¹² Lesvi svilava lesvaku vahlawuliwa va Xikwembu vatiyisela, na vali karhi vahlayisa milawu ya xona, ni kupfumela ka vona ka Yesu.

¹³ Kutani nitwa rito rihuma tilweni riku: “Tsala lesvi: Kukatekile vafi lava kusukela svosvi vafelaka Hosini!” Moya na wona wuli: “Ina, vakatekile, hikuva vatahumula minkarhalweni ya vona, kutani mintirho ya vona yitavalandzela.”

Ta kutshoveliwa ka misava

¹⁴ Nilanguta kutani nivona refu lerobasa; henhla ka rona akutshamile lweyi afanaka ni N'wana-wa-Munhu, na ali ni hari ya golidi nhlokweni ni sikelo lerokariha vokweni.

¹⁵ Kutani ntsumi yin'wana yihuma hi le Tempeleni, yihuwelela hi rito leritlakukeke, yiku ka lweyi atshameke henhla ka rifu “Nghenisa sikelo ra wena utshovela, hikuva nkarhi wa kutshovela wufikile, nasvona ntshovelo wa misava wuwupfile svinene, wuwupfele kutshoveliwa.”

¹⁶ Hi loko lweyi atshameke henhla ka refu andzuwetela sikelo ra yena misaveni, kutani misava yitshoveliwa.

¹⁷ Kutani ntsumi yin'wana yita na yihuma hi le Tempeleni ya le tilweni, na yona yili ni sikelo lerokariha.

¹⁸ Hi loko ntsumi yin'wanyana leyinga ni matimba henhla ka ndzilo, yita hi le alitarini, kutani yihuwelela hi rito leritlakukeke, yibzela lweyi atameleke sikelo lerokariha yiku: “Nghenisa sikelo ra wena leri, uhlengeleta svichocho sva mimvhinya ya laha misaveni, hikuva mihandzu yakona yiwupfile!”

¹⁹ Hi loko ntsumi yindzuwetela sikelo ra yona misaveni yihlengeleta mawuvha ya mimvhinya ya laha misaveni, yihoxa xikamelweni xa vukarhi lebzikulu bza Xikwembu.

²⁰ Kutani mihandzu yipshanyeliwa xikamelweni handle ka doropa, kutani ngati yihuma xikamelweni, yikhuluka mpfhuka wa madzana manharhu ya makilometru (300 km), yiyendla nambu woyenta kolomu ka metru ni hamfu.