Nhlavutelo 12 - Testamente Leyimpsha Xichangana

Ta wansati ni dragona

¹ Kutani kuhumelela singita lerikulu tilweni, ra wansati lweyi ayambaleke jambu, n'weti ayili hansi ka minkondzo ya yena, aali ni hari nhlokweni ya yena, ya tinyeleti ta khume ni timbirhi.

² Yena aalun'wa, ali kusuhi ni kuveleka, kutani aba nyandha hi kutwa kuvava ka kulun'wa ka kuveleka.

³ Kuhumelela singita rin'wana tilweni ra dragona lerikulu ropshuka, ra tinhloko ta ntlhanu ni timbirhi ni timhondzo ta khume, ni hari ya vuhosi henhla ka nhloko yin'wana ni yin'wana ya yona.

⁴ Ncila wa rona dragona wuhawula xikhemu xin'we xa vunharhu xa tinyeleti ta le mpfhukeni, wuticukumetela misaveni. Kutani dragona riyayima mahlweni ka wansati lweyi aali kusuhi ni kuveleka, lesvaku ritatekela kuminta n'wana loko ahakuvelekiwa.

⁵ Wansati aveleka n'wana wa mufana, lweyi angatafuma matiko hinkwawu hi nhonga ya nsimbi. Kambe n'wana awutliwa, ayisiwa henhla ka Xikwembu ni le Xitshan'wini xa Vuhosi.

⁶ Kutani wansati ayatumbela mananga, laha Xikwembu ximulungiseleke ndhawu kona, laha angatahlayisiwa aphameliwa kona, hi masiku lawa maringanaka khulu ni madzana mambirhi ni ntlhanu wa makume ni rin'we (1260).

⁷ Kutani kupfuka nyimpi tilweni, ya Mikayele ni tintsumi ta yena loko valwa ni dragona; na rona dragona rilwa na rili ni tintsumi ta rona.

⁸ Kambe dragona rihluliwa, ringahapfumeleliwi kutshama tilweni, rona ni tintsumi ta rona.

⁹ Hi loko dragona lerikulu ricukumetiwa riyawela hansi, rona nyoka ya khale leyivuliwaka Diyavulosi kumbe Sathana, Mukanganyisi wa misava hinkwayu; ricukumetiwa riyawela hansi misaveni, tintsumi ta rona na tona ticukumetiwa kun'we na rona.

¹⁰ Kutani nitwa rito leritlakukeke tilweni riku: “Svosvi, kuhlayiseka ka Xikwembu xa hina ni matimba ya xona, ni Mfumu wa xona, ni vuhosi bza Kriste wa xona, svifikile, hikuva lweyi ahehlaka vamakwerhu, muhehli lweyi avamangalelaka vusiku ni nhlekanhi mahlweni ka Xikwembu xa hina, acukumetiwile ayawela hansi.

¹¹ Vamakwerhu vamuhlulile hi ngati ya Xinyempfana, ni vumboni lebzi vabzihumeseke, kutani avarhandzanga vutomi bza vona kuyafika kufeni.

¹² Hikolaho, tsakani n'wina matilo, na n'wina lavayakeke ka wona; kambe yowee, n'wina vayaki va misava ni va lwandle, hikuva Diyavulosi axikele ka n'wina; akarihile ngopfu hi kutiva lesvaku nkarhi wa yena wukomile.”

¹³ Loko dragona rivona lesvaku ricukumetiwile riyawela hansi misaveni, rihlongolisa wansati lweyi angaveleka n'wana wamufana.

¹⁴ Kambe wansati anyikiwa timpapa timbirhi ta gama lerikulu lesvaku ahahela mananga, kuyatumbela kona, ndhawini leyi angatahlayisiwa aphameliwa ka yona hi xipimo xa nkarhi, ni minkarhi, ni hamfu ya nkarhi kule ni nyoka.

¹⁵ Hi loko dragona rihlanta mati hi nomo wa rona, mafana ni nambu hi kutala, malandza wansati lesvaku mamukoka.

¹⁶ Kambe misava yilamulela wansati hi kuyahlamisa nomo wa yona, yiminta nambu lowu dragona riwuhlanteke hi nomo wa rona.

¹⁷ Dragona rikariha svinene hikolaho ka wansati lweyi, risuka riyalwa ni va rixaka ra yena lavasaleke, lavahlayisaka milawu ya Xikwembu ni kuveka vumboni bza Yesu.

¹⁸ Kutani riyayima ribuweni ra lwandle.