Nhlavutelo 11 - Testamente Leyimpsha Xichangana

Ta timboni timbirhi

¹ Kutani ninyikiwa rihlanga ropima ha rona, rofana ni nhonga, nibzeliwa marito lawa mange: “Pfuka upima Tempele ya Xikwembu ni alitari ni ntsengo wa lavagandzelaka kona.

² Kambe ungapimi rithangu ra Tempele ra le handle, ritshike, hikuva rinyikiwile vamatiko, kutani vatakandziyela doropa lerokwetsima hi xipimo xoringana tihweti ta mune wa makume ni timbirhi.

³ Nitanyika timboni ta mina ta timbirhi matimba, kutani titaprofeta hi xipimo xa khulu ni madzana mambirhi ni ntlhanu wa makume ni rin'we (1260) wa masiku, na tiyambale sviyambalu sva masaka.”

⁴ Timboni leti i minsinya yimbirhi ya maolivha ni svitlhomativoni svimbirhi, lesvi svinga mahlweni ka Hosi ya misava.

⁵ Loko munhu aringeta kuvayendla svobiha, kutahuma ndzilo hi le milon'weni ya vona, wuhelisa valala va vona; hi mukhuva wolowo mani na mani lweyi angataringeta kuvayendla svobiha, afanela kudlayiwa.

⁶ Lava va ni matimba yopfala tilo lesvaku mpfula yingani, masikwini ya kuprofeta ka vona; nasvona va ni matimba henhla ka mati kumahundzula mayendla ngati; vanyikiwile ni matimba ya kuba misava hi mintungu ya tinxakaxaka, makhambi lawa vamalavaka.

⁷ Loko vaheta kuvula vumboni bza vona, xivandzana lexihumaka hi le kheleni leroyenta svinene rokala makumu, xitalwa na vona, xivahlula, xiva xivadlaya.

⁸ Kutani mintsumbu ya vona yiku chanjala ntsendzeleni wa doropa lerikulu, laha Hosi ya vona yingavambiwa kona xihambanwini, doropa leri loko vafanisa vange, i Sodoma ni Gibita.

⁹ Kuhundze masiku manharhu ni hamfu na mintsumbu leyi yili karhi yihlaleliwa hi vanhu va svib'ongo lesvotala, va tinxaka ni tindzimi letotala, lavahumaka matikweni lawa yotala, kutani vangapfumeli lesvaku mintsumbu leyi yilahliwa sirheni.

¹⁰ Lava vayakeke misaveni vatatsaka hi kudlayiwa ka vona, vacina, vanyikana ni svihiwa, hikuva vaprofeta lava vambirhi avaxanisile svinene vayaki va misava.

¹¹ Kambe ndzhaku ka masiku lawo ya manharhu ni hamfu, amoya wa vutomi lowuhumaka hi le ka Xikwembu, wunghenile ka vona, kutani vasuka vayima hi milenge ya vona. Hinkwavu lava vavavoneke vakhomiwa hi kuchava lokukulu.

¹² Kutani vatwa rito leritlakukeke na rihuma tilweni rivabzela lesvi: “Tlhantukani mita halenu!” Hi loko vatlhantukela tilweni hi refu, na valala va vona vali karhi vavavona.

¹³ Hi nkarhi wolowo kuva ni kutsekatseka lokukulu ka misava, kutani xikhemu xin'we xa vukhume xa doropa xihirimuka, kufa vanhu va ntlhanu wa makhulu ni makhulu mambirhi (7 000) na vadlawa hi kutsekatseka loku. Lava vasaleke vakhomiwa hi kuchava lokukulu, kutani vadzunisa Xikwembu xa le tilweni.

¹⁴ Kuhundzile yowee wa vumbirhi. Kambe vonani, yowee wa vunharhu wata kungali kangani.

Ta mhalamhala ya vuntlhanu ni timbirhi

¹⁵ Hi loko ntsumi ya vuntlhanu ni timbirhi yiba mhalamhala ya yona, kutani kutwakala marito lamatlakukeke ya le tilweni maku: “Matimba ya mimfumu ya misava, svosvi manyikiwile Hosi ya hina na Kriste wa yona, kutani atafuma hilaha kungaheliki.”

¹⁶ Kutani vakulukumba va makume mambirhi ni mune lava vatshameke sviluvelweni sva vona mahlweni ka Xikwembu, vakhinsama vakorhamisa tinhloko, vagandzela Xikwembu,

¹⁷ vaku: “We Hosi, Xikwembu xa matimba hinkwawu, wena lweyi anga kona, lweyi aali kona, hakukhensa, hikuva utirhisile matimba lamakulu ya wena, kutani svosvi usungulile kufuma.

¹⁸ Matiko ya misava mahlundzuka svinene, kambe siku ra vukarhi bza wena rifikile; i nkarhi wa kuyavanyisa lavafeke. I nkarhi wa kunyika hakelo ka vaprofeta, malandza ya wena, ni ka vahlawuliwa va wena hinkwawu, ni ka hinkwavu lava vakuchavaka, lavakulu ni lavatsongo. I nkarhi wa kuhelisa lavahahlulaka misava.”

¹⁹ Hi loko kupfuliwa Tempele ya Xikwembu leyinga tilweni, kutani Areka ya Ntwananu yivonaka Tempeleni leyi ya xona. Kutani kuva ni kuhatimahatima, ni kudzindza ka tilo, kutwakala ka marito, misava yitsekatseka, kuwa ni marhalana lamakulu.