Nhlavutelo 10 - Testamente Leyimpsha Xichangana

Ta Yohani loko aja xibukwana lexiteke hi le tilweni

¹ Kutani nivona ntsumi yin'wana ya matimba yixika hi le tilweni na yiyambale refu, yili ni nkwangulatilo henhla ka nhloko ya yona; nghohe ya yona ayifana ni jambu, milenge ya yona ayifana ni timhandze ta ndzilo.

² Vokweni ra yona ayili ni xibukwana lexipfuliweke. Kutani yiveka nenge wa yona wa xinene ka lwandle, lowu wa ximantsi yiwuveka laha ka misava,

³ yihuwelela hi rito leritlakukeke kufana ni loko nghonyama yibonga. Loko yihuwelelile, kutwakala kudzindza ka matilo ka ntlhanu ni ka mbirhi.

⁴ Kuteloko matilo ya ntlhanu ni mambirhi madzindzile, ni tilulamisela kutsala, kambe nitwa rito lerihumaka tilweni riku: “Pfala hi mfungu lesvivuliweke hi kudzindza ka svingwalangwandza lesvi sva ntlhanu ni svimbirhi, kambe ungasvitsali.”

⁵ Kutani ntsumi leyi niyivoneke na yiyimile lwandle ni ka misava, yitlakusela voko ra yona ra xinene tilweni,

⁶ yihlambanya hi vito ra Lweyi ahanyaka hilaha kungaheliki, lweyi atumbuluxeke tilo ni lesvinga ka rona, ni misava ni lesvinga ka yona, ni lwandle ni lesvinga ka rona, kutani ntsumi yiku: “Akungahavi na kuhlwela,

⁷ kambe masikwini ya rito ra ntsumi ya vuntlhanu ni timbirhi, loko yitachaya mhalamhala, xihundla xa Xikwembu lexi axifihliwile, lexi xixibzeleke vaprofeta, malandza ya xona, xitahetiseka.”

⁸ Kutani rito leri niritweke rihuma tilweni, ritlhela rivulavula na mina riku: “Famba uyateka buku leyipfuliweke, vokweni ra ntsumi leyiyimeke lwandle ni laha misaveni.”

⁹ Hi loko niya ka ntsumi niyakombela lesvaku yininyika xibukwana lexinga vokweni ra yona. Ntsumi yiku ka mina: “Xiteke uxija; khwirini ra wena xitabava, kambe non'weni xitatsokombela kufana ni vulombe.”

¹⁰ Hi loko niteka xibukwana vokweni ra ntsumi, nixija. Axitsokombela kufana ni vulombe non'weni, kambe loko nixijile, nitwa kubava khwirini ra mina.

¹¹ Kutani yinibzela lesvinge: “Wahafaneliwa hi kuyaprofeta kambe ka vanhu va svib'ongo svohambanahambana, ni vamatiko layotala, ni va tindzimi tohambanahambana, ni ka tihosi letotala.”